Ezequiel 11 - Qheshwa Biblia DC

Jerusalempaj jasut'i

¹ Diospa atiynin pataman oqhariwarqa. Apawarqataj Señorpa wasinman, inti llojsimuy punkunnejman. Chay punkupi iskay chunka phishqayoj runas kasharqanku. Paykunawan khuskataj Azurpa wawan Jaazaniasta rikorqani, chantá Benaiaspa wawan Pelatiastawan, paykunaqa ayllupi kamachejkuna karqanku.

² Señorqa niwarqa: Kay kurajkuna runasta wañuchiyta yuyaychashanku, sajra imasta ruwanankupajtaj Jerusalén llajtapeqa umachashanku.

³ Mana tukukonqarajchu, wasista ruwakusunchej, chay wasistaj manka jina kanqanku, noqanchejtaj aycha jina waqaychasqas kasunchej chay mankaspi.

⁴ Chayrayku sutiypi paykunaj contrampi sut'inchay.

⁵ Señorpa atiynin yaykumuwarqa, niwarqataj: Kay jinata Señorqa nin: Kay jinata qankuna yuyashankichej, noqa yachani yuyaychakusqasniykichejta.

⁶ Kay llajtapi qankuna may ashkhata wañuracherqankichej, callesnintataj wañusqaswan junt'acherqankichej.

⁷ Chayrayku noqa Señorqa cheqatapuni niykichej: Jerusalenqa uj manka jina kanqa, aychataj mana qankunachu kankichej, manachayqa qankuna wañurachinkichej chay ayas aychasqa kanqanku. Aswampis qankunataqa chaymanta jawaman wijch'usqaykichej.

⁸ Ch'ajwatachu manchachikorqankichej? Ch'ajwata pataykichejman chayachimusaj. Noqa Señormin kaytaqa parlani.

⁹ Llajtamanta orqhosqaykichej, waj llajtayojkunamantaj jap'ichisqaykichej. Qankunaqata juchachasqaykichej.

¹⁰ Espadawan t'ojsisqas wañurankichej. Israel jallp'api cheqanchasqaykichej, chaypacharaj noqa Señor kasqayta rejsiwankichej.

¹¹ Mana qankunapajchu llajtaqa manka jina kanqa, nitaj qankunachu kay pacha jina kankichej. Israel jallp'aj cantosnimpi qankunata cheqanchasqaykichej.

¹² Chaymantataj noqa Señor kasqaytaqa rejsiwankichej. Qankunaqa mana kamachisqasniyman jinachu, nitaj leyesniyman jinachu kausarqankichej, manachayqa muyuyniykichejpi kaj nacionespa ususninta ruwarqankichej.

¹³ Señorpa sutimpi paykunaman parlashajtillayraj, Benaiaspa wawan Pelatiasqa wañorqa. Noqataj pampakama k'umuykorqani, jatunmanta qhaparispataj nerqani: Way Señor! Pisi puchoj israelitastapis tukuynintachu wañurachipunki?

Dios mosoj tratota ruwananmanta willan

^14-15 Dios parlamuwarqa, niwarqataj: Runa, Jerusalempi tiyakoj runa llajta masisniykimanta, wauqesniykimanta, tukuy israelkunamantawan kay jinata parlarqanku: Paykunaqa Señormanta karupi kashanku. Astawampis noqaykuman kay jallp'ataqa qopuwayku, noqayku dueños kanaykupaj.

¹⁶ Chayrayku paykunaman sutiypi niy: Noqa Señormin paykunata waj nacionesman, waj runakunaj jallp'asninkuman wijch'orqani, chaytaj pisi p'unchaykunallapaj kashan. Mayqen jallp'amanchá renqanku chaypeqa noqallataj Diosta yupaychana wasinku kasaj.

¹⁷ Noqaj sutiypi nillaytaj, kay jinata Señorqa nin: Noqa Señormin chay jallp'asmanta, karu llajtasmanta ima paykunata tantaykamusaj, maykunamanchá ch'eqeracherqani chaykunamanta. Thantaykamuspataj israelitasman jallp'asninkuta kutichipusaj.

¹⁸ Paykuna llajtankuman kutimponqanku, chantá chinkachenqankutaj kay jallp'api millay ruwaykunata, lanti yupaychaykunata ima.

¹⁹ Noqa paykunamanta chay rumi sonqonkuta qhechusaj, mosoj espirituta, mosoj sonqotawan qosaj.

²⁰ Chantá paykuna leyesniyman jina kausanqanku, kamachisqasninman jinataj purenqanku, junt'anqankutaj. Paykunaqa aylluy kanqanku, noqataj paykunaj Diosninku kasaj.

²¹ Chantapis pikunachus sajra imasta ruwaspallapuni kausanqanku, millachikunapaj imasta ruwaypitaj, chaykunamanta cuentata mañasaj. Noqa Señor chaytaqa nini.

Jerusalenmanta Señorqa karunchakun

²² Querubines phawarerqanku, ruedastaj paykunawan khuska oqharikorqanku. Israelpa Diosnimpa k'anchaynintaj paykunaj patankupi kasharqa.

²³ Chantá Diospa k'anchaynenqa llajta chaupimanta oqharikuspa karuman riporqa. Llajtamanta inti llojsimuy cheqapi kaj loma patapi tiyaykukorqa.

²⁴ Chaymanta Diospa atiynenqa oqhariwaspa Babiloniaman kutirichiwarqa, jap'isqas kasharqayku chayman. Kaytaqa Diospa espíritun mosqoypi jina rikuchiwarqa. Chantá chay mosqoypi jina rikhurejqa chinkaporqa.

²⁵ Chay jap'isqa karqanku chaykunamantaj, Señorpa tukuy imata rikuchiwasqanta willarqani.