Éxodo 7 - Qheshwa Biblia DC

¹ Ujtawan Señorqa Moisesman nerqa: Qhawariy, noqa niyki, qan noqaj cuentaymanta faraompa ñaupaqempi ruwanki, jinallataj wauqeyki Aarón profetayki jina qampa cuentaykimanta parlanqa.

² Qan payman willanki noqa imatachá nisqayki chayta; wauqeyki Aarontaj faraonman parlanqa israelitasta jallp'anmanta llojsejta saqenanta.

³ Noqataj faraompa sonqonta rumiyachisaj, astawantaj ashkhayachisaj may t'ukunasta ruwayta, milagrostawan ruwayta Egipto jallp'api.

⁴ Faraonqa mana uyarisonqachejchu, noqataj atiyniyta rikuchisaj Egiptopi, soldadosniyta orqhokapusaj, aylluyta, Egipto jallp'amanta ashkha jasut'iykunata rikuchispa.

⁵ Chaymantaraj Egiptopi atiyniyta rikuchejtiy, egipciosqa yachanqanku noqa Señorqa kasqayta, paykunaj chaupinkumanta israelitasta orqhomusqaymanta.

⁶ Moiseswan Aaronwanqa kikinta ruwarqanku, imaynatachus Señor Dios paykunaman kamacherqa, ajinata.

⁷ Chaypacha Moisesqa karqa pusaj chunka watasniyoj; Aarontaj karqa pusaj chunka kinsayoj watasniyoj, faraonwan parlasharqanku chaypacha.

Aarompa tojnun

⁸ Señorqa parlallarqataj Moisesman Aaronmanwan, nispa:

⁹ Sichus faraón nisonqachej milagrosta rikuchiychej nispa chayqa, qan ninki Aaronman: Tojnuykita jap'ispa choqay faraompa ñaupaqenman katariman tukunampaj.

¹⁰ Moiseswan Aaronwantaj kachaykukorqanku faraonwan parlaj. Paykunaqa ruwarqanku imaynatachus Señor paykunaman kamacherqa chayman jina. Aaronqa tojnunta choqarqa faraompa ñaupaqenman kamachisninwan kashajtin, chay tojnutaj katariman tukorparerqa.

¹¹ Faraontaj wajyacherqa yachajkunasninta, yatirisnintawan; paykunapis jamuspa kikillantataj ruwarqanku tukuy atiyninkuwan;

¹² Sapa ujninku tojnusninkuta choqallarqankutaj, chaykunapis katariman tukorqanku. Aarompa tojnuntaj tukuynin yachajkunajta, yatirispatawan tojnusninkuta mikhurarqa.

¹³ Chay tukuywampis faraompa sonqon astawan rumiyarqa, paykunata mana kasuta ruwarqachu, Señorpa nisqanman jina.

Yaku yawarman tukun

¹⁴ Chaymanta Señorqa Moisesman nerqa: Faraompa sonqonqa anchatapuni rumiyan, mana munashanchu israelitas llojsinankuta.

¹⁵ Q'aya tutamanta mayuman uraykushajtin qhawarej rinki. Qantaj chay mayu cantopi suyanki, katariman tukorqa chay tojnuykita.

¹⁶ Chaypitaj ninki: Señormin, hebreospa Diosnin kachamuwan qanman willajta: Saqey ayllayta jallp'aykimanta llojsejta, ch'innejman rispa yupaychanawampaj. Kunankamataj qanqa mana kasukunkichu.

¹⁷ Chayrayku Señorqa nimusunki: Kaypi yachawanki noqa Señor kasqayta: Kay tojnuywan kay mayupi kashaj yakuta wajtasaj, yakutaj yawarman tukonqa.

¹⁸ Tukuy kay yakupi kaj challwas wañonqanku, mayutaj millayta asnanqa, tukuy egipciospis millachikonqanku, kay yakuta ujyayta.

¹⁹ Chanta Señorqa Moisesman nillarqataj: Niy Aaronman, tojnunwan Egipto mayu yakusta wajtaramuchun, wayq'ospi, tapisnimpi qochasta, yaku jallch'anasninkuta, maypichá yakus kashan chayta yawarman tukunankupaj. Ajinamanta tukuynin Egiptopi yawar kanqa k'ullu bateasninkupi; jinallataj rumi bateasninkupipis.

²⁰ Moiseswan Aaronwan kikinta ruwarqanku, Dios imaynatachus paykunaman kamacherqa, ajinata. Tojnunta oqharispa Egipto mayu yakuta wajtarqa faraón qhawashajtin. Tukuy mayu yakustaj yawarman tukorqanku.

²¹ Jinallataj chay mayupi kaj challwas wañurarqanku. Mayutaj millayta asnarqa, egipciospis mana ujyayta aterqankuchu, imaraykuchus Egiptopi maypichá yaku kaj chaykunapi yawarlla tarikorqa.

²² Egiptomanta tukuy yatiris kikillantataj ruwarqanku imatachus yachasqankuwan. Faraompa sonqontaj astawan rumiyarqa, chayta rikushaspapis paykunata mana kasorqachu, Señorpa nisqanman jina.

²³ Faraonqa chaymanta kutispa wasinman riporqa, chaytapis manapuni kasuta ruwaspa.

²⁴ Tukuynin Egiptopi yaku wisinasta ruwarakorqanku mayu cantospi yakuta ujyanankupaj, imaraykuchus mayu yakusta mana ujyayta aterqankuchu.

²⁵ Chay jinata Señorpa ruwasqanqa junt'akorqa qanchis diapi.