Éxodo 4 - Qheshwa Biblia DC

¹ Chaymantataj Moisesqa kuticherqa: Imatataj paykuna chaytaqa creewanqankuri, nitaj kasutapis ruwawankumanchu. Paykunaqa niwanqankuchari: Señorqa, qanman mana rikhurisunkichu, nispa.

² Señortaj nerqa: Imataj makiykipi kashanri? Moisestaj nerqa: Kayqa tojnuy, nispa.

³ Chanta Señorqa Moisesman nerqa: Pampaman choqay chay tojnuykita, nispa. Paytaj pampaman choqarqa. Chay kikimpachataj tojnonqa katariman tukorqa. Moisestaj manchariywan ayqerqa chay katarimanta.

⁴ Chantá Señorqa Moisesman nerqa: Ama ayqeychu, makiykiwan chupanmanta jap'iykuy. Paytaj kasuspa makinwan chupanmanta jap'iykorqa, chay kikimpachataj tojnullanmantaj tukuporqa jap'iykojtinkama.

⁵ Chay kanqa uj señal, Señorqa qanman rikhurisusqanta, ñaupa tatasniykej Diosnin, Abrahampata, Isaacpata, Jacobpata ima.

⁶ Chanta Señorqa ujtawan nillarqataj Moisesman: Makiykita ujllayniykiman churaykuy, nispa. Moisestaj makinta ojllayninman churaykorqa, orqhospataj makinta qhawarikorqa lepra onqoywan tukuy llillisqata, rit'i jina yurajpachata.

⁷ Chaymanta Señorqa nillarqataj: Ujtawan makiykita ojllaykiman churaykuy, nispa. Moisestaj kasuspa ujtawan makinta ojllayninman churaykorqa. Chaymanta orqhospa qhawarinampajtaj makenqa mana imanasqa rikhurerqa tukuy ukhun jina.

⁸ Sichus mana creesonqankuchu nitaj kay ñaupaj kaj señalta uyarisonqankuchu chayqa, kay qhepan kaj señalta creesonqanku.

⁹ Sichus kay iskay señalta mana creenqankuchu, ni uyarillasonqankupischu chayqa, yakuta mayumanta oqharimunki, chaytataj jallp'aman jich'anki; chay jallp'aman jich'asqayki yakutaj yawarman tukonqa.

¹⁰ Chanta Moisesqa nerqa: Ay, Señor! Ni jayk'aj noqaqa runasman allinta parlayta atinichu, mana qan parlawasqaykimantapachallachu, ni qaynallamantachu, nitaj kunallanmantachu, noqa kamachiykeqa unaymantapuni jina kani, qalloyqa parlashajtiy watakullawampuni.

¹¹ Chaymanta Señorqa nillarqataj: Chanta pitaj runaman simita qorqa? Manachu noqa Señor upayachini, lojt'oyachini, ciegoyachini, chayri qhawarichini?

¹² Chayrayku kunanqa riy, noqa simiykinejta parlasaj, yachachisqaykitaj imatachus parlanaykita.

¹³ Moisesqa nillarqapuni: Ay Señor, waj runata kachakullay ari!, nispa.

¹⁴ Señorqa Moisespaj phiñarikuspa nerqa: Chaypaj kashan wauqeyki Aarón, Levita. Noqa yachani, payqa sumajta runasman parlayta yachasqanta, chantapis payqa ñapis jamushanña taripasoj, rikususpataj payqa mayta sonqompi kusikonqa.

¹⁵ Qan paywan parlay, willay imatachus ninayki kashan chayta. Noqataj parlashajtiykichej paywan, jinallataj qanwampis kasaj. Chantaqa yachachisqaykichej imatachus ruwanaykichejta.

¹⁶ Qan parlanki, Aaronman noqapis parlashayman jina, paytaj runasman parlanqa qampis parlashawaj jina, imatachus parlanayki kashan chayta.

¹⁷ Kunanqa kay tojnuykita apakuy, chaywanqa t'ukuna imasta ruwamunki.

Moisés Egiptoman kutin

¹⁸ Moisesqa chaymanta riytawan Jetro suegrompaman kuterqa, nerqataj: Kunanqa kutinay tiyan Egiptoman, ayllusniyta, wauqesniyta ima waturikoj, kausakushankurajchus manachus chayta. Jetrotaj nerqa: Jina kajtenqa, riy ari, allillantaj risuchun.

¹⁹ Madianllapiraj kashajtintaj Señorqa ujtawan rikhurispa Moisesman nerqa: Egiptoman kutiy, imaraykuchus qanta wañuchiyta munajkunaqa tukuyninkuña wañuranku.

²⁰ Moisestaj warminta pusariykukuspa, wawasnintawan burroman montaykuchispa Egiptoman kutirerqa; Diospa qosqan tojnu oqharisqa.

²¹ Chantaqa Señor nillarqataj Moisesman: Egiptoman kutispa faraompa ñaupaqempi kay t'ukunasta qosusqayta, ruwankipuni atiyta qosusqaywan. Noqataj faraompa sonqonta rumiyachisaj, paytaj israelitasta mana llojsejta saqenqachu.

²² Qanqa ninki faraonman: Señorqa, ajinata nin: Israelqa noqaj kuraj wawaymin.

²³ Ña niykiña, wawayta saqey llojsejta, rispa yupaychamunawampaj. Qantaj llojsejta mana saqeshankichu, chayrayku noqaqa wañuchisaj kuraj wawaykita.

²⁴ Ñanta rishajtintaj, maypichus Moisesqa familianwan uj ch'isi puñunanku kashajtin Señorqa rikhurerqa, wañuchiytataj munarqa.

²⁵ Seforataj chayta rikuspa, uj q'achi rumita oqharispa, wawampa phichilitumpa qaritampa puntitanta khuchurerqa. Chaymantataj Moisespa chakinta llujchirispa nerqa: Cheqamanta qanqa yawarmanta qosay kanki, nispa.

²⁶ Chaymantaña Señorqa Moisesta rejta saqerqa, Seforataj nerqa, Moisesqa yawarmantapacha qosan kasqanta circuncidasqanrayku.

²⁷ Chaymantataj Señorqa Aaronman parlarqa: Riy ch'in pampaman Moisesta taripaj, nispa. Paytaj kachaykukuspa Moisesta taripamorqa Diospa orqon nisqa chaypi, napaykuspataj wauqenta much'aykorqa.

²⁸ Chaypi Moisesqa Aaronman allinta willarqa Señor imastachus kamacherqa payman willananta chayta, jinallataj jatuchaj t'ukunasta ruwasqantawan.

²⁹ Chaymantaqa Moiseswan Aaronwan iskayninku rispa tantacherqanku israelitaspa tukuy kurajkunasninta.

³⁰ Aarontaj paykunaman willarqa, imastachus Señorqa Moisesman nerqa chayta. Chantapis Moisesqa jatuchaj t'ukunasta ruwananta runaspa ñaupaqempi Diospa kamachisqanman jina.

³¹ Israelitastaj creerqanku chay nisqanta. Yachaspa Señorqa Israelpa wawasninmanta yuyarikusqanta llakiyninkuta rikusqanta. Jinaspataj tukuyninku qonqoriykukuspa Señorta yupaycharqanku.