Éxodo 39 - Qheshwa Biblia DC

Sacerdotespa p'achasta ruwanku

¹ Diospa tiyananman yaykuspa churakunanku p'achasta t'iparqanku, lilamanta, puka pantimanta, pukamanta. Chaymantaqa sumajnin kaj p'achasta Aarompaj ruwaporqanku Señorman qayllanampaj, imaynatachus Moisesman Señorqa kamachisqanman jina.

² Chaymantaqa ruwallarqataj qorimanta efod nisqa p'achata, lilamanta, puka pantimanta, pukamanta, t'ullkusqa sumajnin linomantawan.

³ Chaymantataj, qorimanta laminasta jina ruwarqanku; chaymantataj ñañu alambresta k'acha pallayniyojta ruwarqanku lilamanta, puka pantimanta, pukamanta, t'ullkusqa sumajnin linomantawan.

⁴ Chay efod p'achataqa ruwarqanku puraj puntasnimpi watusniyojta, jinamanta puraj puntasninmanta wasaman watakunapaj.

⁵ Efod nisqa p'achaj cantosnimpi chumpipis kikin ruwasqallataj karqa qorimanta, lilamanta, puka pantimanta, pukamanta sumajnin kaj linomantawan imaynatachus Señorqa Moisesman kamachisqanman jina.

⁶ Chanta ruwallarqankutaj ónice rumista ch'eqospa, chayta churararqanku qori patasman, chaymantaj churarqanku selloswan jina Israelpa wawasninmanta yuyarikuy jina.

⁷ Chaymantataj Bezaleelqa efod nisqa p'achaj lijrasninman chay rumista k'askaykucherqa, Israelpa wawasnin yuyarikunankupaj, imaynatachus Moisesman Señor kamachisqanman jina.

⁸ Warkhuna nisqa p'achata efodta jina sumaj k'achituta ruwarqa: Qorimanta, lilamanta, puka pantimanta, pukamanta, sumajnin kaj t'ullkusqa linomantawan.

⁹ Karqa rakhu sapa cantonman chhikachajpura iskay chunka centimetrosniyojkama.

¹⁰ Warkhunataqa ruwarqa tawa suyusniyojta sumachaj rumismanta. Ñaupaj kaj suyupi karqa rubí rumi, crisólito, esmeralda rumiwan.

¹¹ Iskay kaj suyoqa karqa granate rumiwan, zafirowan, uj jadewan.

¹² Kinsa kaj suyutaj karqa jacinto rumiwan, agatawan, amatista rumiwan.

¹³ Tawa kaj suyutaj karqa topacio rumiwan, cornalinawan uj jaspe rumiwan. Chay rumisqa k'askachisqas karqa qori patapi.

¹⁴ Chantapis chay rumisqa karqanku ima sutisniyojchus Israelpa wawasnin karqanku chayman jina sapa uj rumispi uj suti ruwasqa karqa sello jina, chunka iskayniyoj ayllus kasqankuman jina.

¹⁵ Warkhunaj patanmantaj churarqanku ch'uwa qori ch'ankullasta, chayqa q'aytu jina iskayman k'uyusqas karqa.

¹⁶ Chaymantaqa ruwallarqankutaj warkhunaj muyuyninta qorimanta, iskay qori sortejastawan. Chaytataj warkhunaj puraj cantosninman chhitararqanku.

¹⁷ Jinallataj chay ch'ankullatapis warkhunaj patanman churaykorqanku.

¹⁸ Qori ch'ankullaspa puntasnintataj wataykorqanku, chaywan sumajta wataykorqanku efodpa iskaynin lijrasninman, astawanqa ñaupaj ladoman.

¹⁹ Chaymantaqa ruwallarqankutaj iskay qori sortejasta, chaytataj warkhunaj ura cantosninman churarqanku efodwan tinkuyman.

²⁰ Ruwallarqankutaj iskay qori sortejastawan, chaytataj efodpa ñaupajninman puraj cantosninman ujtakama churararqanku ura cantonnejman, maynejpichus siraynin karqa chaynejman, chumpin patanejman.

²¹ Jinaspataj wataykorqanku warkhunaj sortejasninmanta, efodpa sortejasninmantawan lila q'aytuwan efodpa cantompi chumpej patanmanta ama t'aqakunampaj, warkhunapis efodpa patampi kanampaj, imaynatachus Señorqa Moisesman kamachisqanman jina.

²² Efodpa patampi kaj p'achata t'ipaspa ruwarqanku lilamanta.

²³ Chayqa karqa khuskampi khallayoj, cuelloyojtaj qara chalecos jina, flecosniyoj, awakipasqayoj, ama imaynamantapis llik'ikunampaj.

²⁴ Chay p'achaj cantosninmantaj t'ikacharqanku ruwasqa t'ika tullmaswan. Chay t'ikasqa ruwasqs karqa lila q'aytumanta, puka q'aytumanta, panti q'aytumanta, sumaj kaj t'ullkusqa linomantawan.

²⁵ Chaymantaqa ruwallarqankutaj qorimanta campanillasta jina, chaytataj chay q'aytu t'ikaspa chaupisninman chhitaykorqanku.

²⁶ T'ikastaraj ñaupajta churaykorqanku, chay qhepanmantaj qori campanitasta, t'ikatataj, ajinata tukuy cantonta muyuricherqanku chay p'achata; chayqa churakuspa sacerdote imatapis ruwanampaj, Moisesman Señor kamachisqanman jina.

²⁷ Jinaspataj ruwallarqankutaj sumajnin kaj linomanta p'achasta k'acha pallayniyojkunata Aarompaj wawasnimpajwan.

²⁸ Kikillantataj sumajnin kaj linomanta ruwarqanku mana ningriyoj t'ikasniyoj ch'ulusta, calzoncillostawan.

²⁹ Chumpitapis sumajnin kaj t'ullkusqa linomanta ruwarqanku. Chaytaj karqa lilamanta, puka pantimanta, pukamantawan, sumaj k'acha pallayniyojta, imaynatachus Moisesman Señor kamachisqanman jina.

³⁰ Chaymantataj uj laminata nisqata qorimanta ruwarqanku. Chaymantaj escriberqanku uj sellota jina, “Kayqa Señorpaj t'aqasqa, nispa.

³¹ Jinaspataj chay tablerota watucharqanku uj lila q'aytuwan chay ch'ulu pataman warkhunankupaj, imaynatachus Moisesman Señor kamachisqanman jina.

Dioswan tinkukuna toldo tukukun

^32-41 Dioswan tinkukuna toldo tukukun. Chaytaqa israelitas ruwarqanku imaynatachus Moisesman Señor kamachisqanman jina. Moisesman israelitas Dioswan tinkukuna tukuy imasnin tukusqata; ganchosnintinta, tablasnintinta, sayachina maderasta, maderaspa sayanasnin chukusta; tapanapaj pukaman teñisqa oveja qarasta, tapanapaj qowi qarasta, ñaupajninta jark'achinapaj velosta; Diospa leyninwan kasharqa chay cajonta, k'aspisnintawan, kirpanasnintawan; mesata, vasosnintawan, qayllapi nisqa t'antatawan; qorimanta ruwasqa k'anchachinata, k'anchachinasnintawan, chay k'anchachina imaynachus ruwasqa kanan karqa chaykunasninta, tukuy imasninta, k'anchanapaj aceitetawan; qori altarta, jawina aceiteta, sumajta q'apashaj inciensota, Dioswan tinkukuna punkuman yaykuyta jark'achinapaj awasqastawan; bronce altarta, bronce rejillasnintinta, k'aspisninta, imasninchus chay patasnimpi karqa chaykunastawan, ch'illamita, maypichus sayanantawan; patiota jark'achinapaj awasqasta, plantasta jina sayachinapaj maderasninta, chay maderaspa sayanasnin chukusta, patio punkuta jark'achinapaj awasqasta, waskasninta, estacasta, imasninchus kanan karqa chaykunasnintinta Diospa tiyakunampi ruwanapaj Dioswan tinkukuna wasipi; chaypi kaspa imastapis ruwaspa churakuna p'achasta, sacerdote Aarompaj sumaj ruwasqa p'achasta, Aarompa wawasnimpaj p'achasta sacerdoteman p'achallikuspa Diospa tiyakunan wasipi ruwanankupaj.

⁴² Chay tukuy imasta israelitasqa ruwarqanku, imaynatachus Moisesman Señor kamachisqanman jina.

⁴³ Chay tukuy imasta Moisesqa rikorqa sumaj kasqanta, Señorpa kamachisqanman jina sumaj ruwasqas kasqanmanta, chaymantataj paykunata bendicerqa.