Éxodo 31 - Qheshwa Biblia DC

Señorqa iskay runasta wajyan

^1-5 Chaymanta Señorqa Moisesman nillarqataj: Qhawariy, noqa ajllani Judá ayllumanta Urpa allchhin Urej wawan Bezaleelta. Payman junt'achini Diospa Espiritunta, yachayniyoj pay kanampaj, k'usku, tukuy ima kajta yachanampaj, tukuy imata walejta ruwanampaj, ima ruwanatapis sumajta ruwanampaj, qorimanta qolqemanta, broncemanta; sumajta llusk'achanampaj rumista, maderastawan, jinallataj imallamantapis walejta ruwanampaj.

^6-9 Payta yanapanampaj ajllani Dan ayllumanta Ahisamacpa wawan Aholiabta. Tukuy yachayniyojkunamantaj aswan yachakuyta qorqani tukuyninku qanman kamachisqasuyta ruwanankupaj: Dioswan tinkukuna toldota, Diospa leyninwan kaj cajonta, kirpantapis, Dioswan tinkukuna toldopi kashan chaykunatapis mesata, imasninchus chay patapi kashan chaykunatapis qori purumanta k'anchachinata tukuy imasnintinta, incienso altarta, ruphachina rikuchiku altarta, imaschus chay altarpi kashan chaykunatawan; mayllakuna ch'illamita, maypichus sayasqa kashan chaytawan;

¹⁰ chaymanta awasqa p'achasta, p'achasta, sacerdote Aarompa p'achasninta, Aarompa wawasnimpa p'achasnintawan sacerdotes altarman qayllajtinku.

¹¹ Chaymantaqa jawina aceiteta, q'apashaj inciensota Diospaj tiyanan toldopaj. Chaykunata paykuna ruwanqanku imaynatachus kamachisusqayman jina.

Samarikuna p'unchay

^12-13 Ujtawan Señorqa Moisesman parlallarqataj: Israelitasman willanki kay jinata: Cheqamanta qankunaqa waqaychankichej samarikuna p'unchayniyta; imaraykuchus chay p'unchayqa uj señal noqawan qankunawan mirayniykichejwan ima uj tratota ruwasqanchejmanta, yachanaykichejpaj noqa Señor qankunata ajllasqayta.

¹⁴ Samarikuna p'unchayta waqaychaychej, imaraykuchus qankunapajqa respetana p'unchayqa. Pichus chay p'unchayta mana waqaychajqa, wañuchisqa kanqa. Chantapis, pichus chay p'unchaypi llank'ajqa ayllun Israel ukhumanta chinkachisqa kanqa.

¹⁵ Sojta p'unchayta llank'allanqanku, qanchis kaj p'unchaypitaj samarikonqanku Señorta chay p'unchaypi yupaychaspa. Chayrayku pichus chay p'unchaypi llank'ajqa cheqamanta wañonqa.

¹⁶ Ajinata israelitasqa samarikuna p'unchayta waqaychanqanku, uj trato ruwasqa kasqanrayku wiñaypaj.

¹⁷ Kayqa señal kanqa wiñaypaj israelitasmanta noqamantawan. Imaraykuchus Señorqa ruwarqa sojta p'unchaypi janaj pachata kay pachatawan, qanchis kaj p'unchaypitaj manaña imatapis ruwarqachu, manachayqa samarikorqa.

Qori waka uña

¹⁸ Señorqa ajinata Sinaí orqopi Moiseswan parlayta tukuytawan, payman qorqa leyta palqayojta ruwasqa p'alta rumipi kikin Diospa dedonwan escribisqata.