Éxodo 28 - Qheshwa Biblia DC

Sacerdotespa p'achasnin

¹ Wauqeyki Aaronta wajyachispa kamachiy, wawasnintawan, Nadabta, Abiuta, Eleazarta, Itamartawan, paykuna israelitas ukhupi sacerdotesniy kanankupaj.

² Wauqeyki Aarompaj sacerdote p'achasninta ruwapuy, k'achata sumajtataj qhawasqa kanampaj.

³ Qan parlay tukuy yachayniyojkunaman, pikunachus k'acha sonqoyoj kanku chaykunaman, pikunamanchus yachayta yuyaytataj qoni chaykunaman, Aarompaj sumaj p'achasta ruwapunankupaj sumaj respetasqa sacerdotesniy kanankupaj.

⁴ P'achastaqa kaykunata ruwanqanku: kunkanman warkhunata efodta, capata, k'acha ruwasqa puka p'achata, linomanta mana ningriyoj ch'uluta, uj pallayniyoj chumpitawan. Ajinata sumaj p'achasta ruwapunkichej wauqeyki Aarompaj, wawasnimpajwan paykuna sacerdotesniy kanankupaj.

⁵ Chay p'achastaqa ruwankichej qorimanta, lilamanta pukamanta, puka pantimanta, t'ullkusqa linomantawan.

Efod

⁶ Efodtaqa k'acha pallayniyojta ruwanki qorimanta, lilamanta, puka pantimanta, pukamanta, t'ullkusqa linomantawan.

⁷ Chaytaj kanqa sacerdote kunkanman wataykukunampaj puraj cantosnimpi iskay watusniyoj.

⁸ Ura cantosnimpitaj chay kikimpi jap'ichisqas kanqa k'acha colorniyoj iskay chumpis qhepaman wataykukunampaj; chaytaj kanqa lilamanta, puka pantimanta, pukamanta, t'ullkusqa linomantawan.

⁹ Chaymantaqa iskay ónice rumista k'askachinki, chaymantaj Israelpa wawasnimpa sutisninta churay.

¹⁰ Chaymanta churanki kurajmanta sullk'aman jina; ujnin kaj rumiman churanki sojtajta, ujnin kajmantaj sojtajta.

¹¹ Chay rumispi ruwana sutista ruwanki sello ñit'inata jina, sapa ujnin rumisman Israelpa wawasnimpa sutisninta churanaykipaj. Chaymantaqa chay rumista churaranki qorimanta ruwasqa muyuynin pataman.

¹² Iskaynin rumista k'askachinki efod mast'asqa pataman israelitas yuyarikunankupaj. Chantá Aarompis, israelitas yuyarikunankupaj sapa lado lijrasnimpi Señorpa ñaupaqempi paykunaj sutisninta apanqa.

¹³ Muyuyninta qorimanta ruwanki.

¹⁴ Ch'uwa qorimanta phalaspa ruwanki, jinamanta chay muyuynimpa cantosninta chaywan muyuykuchinki.

Warkhuna

¹⁵ Warkhunatapis kikillantataj efodta jina ruwanki. Chay warkhunapi ruwanki imaschus juzganapaj tiyan chaykunasniyojta, k'acha pallayniyojta qorimanta, lilamanta, puka pantimanta, pukamanta, t'ullkusqa linomantawan.

¹⁶ Chayqa kanqa rakhu sapa cantonman chhikachajpura iskay chunka centimetrosniyojkama.

¹⁷ Chaypa patanmantaj junt'achinki k'acha rumisituswan, tawa sinrullata chhitaraspa. Ñaupaj kaj sinroqa kanqa sárdica rumimanta, topacio rumimanta, esmeralda rumimantawan.

¹⁸ Iskay kaj sinrutaj kanqa rubí rumimanta, zafiromanta, diamante rumimantawan.

¹⁹ Kinsa kaj sinrutaj kanqa jacinto rumimanta, agatamanta, uj amatista rumimantawan.

²⁰ Tawa kaj sinrutaj kanqa berilo rumimanta, uj onicemanta, uj jaspe rumimantawan. Tukuynin rumis muyuynin pataspi qorimanta ruwasqas kanqanku.

²¹ Chay rumisqa kanqanku mashkhachus Israelpa wawasnin kanku chayman jina, chunka iskayniyoj sutis. Chay sutis sapa uj rumispi escribisqa kanqa chunka iskayniyoj ayllus.

²² Chaymantaqa warkhunapaj ruwanki ch'uwa qorimanta simp'aspa ch'ankullasta jina.

²³ Ruwallankitaj qorimanta iskay ningrista, chaytataj warkhunaj sapa lado cantosninman k'askachinki.

²⁴ Chaymantataj chay iskay ch'ankullaswan qori ningrista pasarachinki warkhunaj pata cantonta.

²⁵ Iskaynin ch'ankullasta churanki muyuynimpa patasninman. Chaymantaqa sumajta chhitaykunki efodpa ñaupajninman iskaynin puntasninman.

²⁶ Chanta ruwallankitaj iskay qori ningrista, chaytataj warkhunaman k'askachinki ukhu ladonman efod kashan chay ladonman.

²⁷ Ruwallankitaj iskay ningristawan qorimanta, chaytataj k'askachinki efodpa ñaupajninman iskaynin cantosninman, siraynimpa uranman chumpinmanta tumpa patannejman.

²⁸ Ajinamanta warkhunaj ningrisninwan efodpa ningrisninwan ujllaman t'inkisqas kanqanku, lila q'aytuwan, efodpa chumpin patanejpi qhepakunampaj, amataj warkhunaqa efodmanta t'asqa kanampaj.

²⁹ Aaronqa Diospaj ajllasqa toldoman yaykuspa warkhunaj patampi Israelpa wawasnimpa sutisnin ruwasqasta, cheqanchana imastawan oqharisqa yaykonqa. Jinallataj chay sutis pechompi k'askachisqas kanqa. Ajinata Aaronqa Señorpa ñaupaqempi purenqa, sapa kuti paykunamanta yuyarikunampaj.

³⁰ Warkhunaj patanman churanki cheqanchana imasta Urimta, Tumintawan. Ajinamanta Aarón pechon patapi apanampaj sapa Señorpa ñaupaqenman qayllaspa. Ajinamanta Aaronqa pechompi apanqapuni cheqanchana imasta Señorpa ñaupaqempi.

Efodpaj manta ruwasqa

³¹ Efodta qhatanapaj uj mantata ruwanki lilamanta.

³² Chayqa kanqa khuskannejpi khallayoj, chay khallampa puntantataj q'empiykunki qaramanta ruwasqa chalecoj puntanta jina ama llik'ikunampaj.

³³ Chaymantaj puntanman flecosninta k'achanchanampaj churaranki, chanta q'aytu t'ikastawan lilamanta, pukamanta puka pantimantawan. Chaypa chaupisninmantaj warkhuranki qorimanta campanillasta muyuynintinman.

³⁴ Chaytaqa chajrusqata churanki ujta qori campanillata, ujtataj q'aytu t'ikata sapa ujpa wasanman. Ajinata mantaj tukuy cantonta muyurichinki.

³⁵ Chaymantataj Aaronqa churakonqa sapa kuti Diosman jaywaj rispa; chayman yaykushajtintaj, llojsimushajtintaj chay campanillas chhulloj chhulloj nispa sonanqapuni Diospaj ajllasqa wasinman yaykojtin Señorpa ñaupaqempi, ajinamanta pay ama wañunampaj.

Qori letra

³⁶ Chaymantaqa uj jatun p'altata qorimanta ruwallankitaj; chaymantaj uj sellota jina ruwanki “Señorpaj t'aqasqamin”, nispa.

³⁷ Chaytataj uj lila q'aytuwan mana ningriyoj ch'ulloj ñaupajninman warkhuykunki sumajta wataspa.

³⁸ Ajinamanta chay letrasqa Aarompa frentempi warkhusqa kanqa. Aaronqa tukuypa juchasnin q'epirisqas chayman yaykonqa israelitaspa ofrendasninku oqharisqa juchasninkoj cuentanmanta. Chay letrastaj niyta munanqa Dios paykunata uyarisqanta.

Sacerdotespa p'achasnin

³⁹ Uj k'acha pallayniyoj p'achata linomanta ruwanki, ch'ulutapis linollamantataj. Chaymantaqa ruwallankitaj uj k'acha pallayniyoj chumpita.

⁴⁰ Aarompa wawasnimpaj ruwarapunki sumaj p'achasta, chumpista ch'ulustawan, paykuna sumajpaj, k'achaspajtaj qhawasqas kanankupaj.

⁴¹ Ajinata wauqeyki Aaronta wawasnintawan sumajta p'achallichinki, chaymantataj umasninkuta aceitewan jawiranki, paykuna noqapaj t'aqasqas kanankupaj; ajinamanta sacerdotesniy kanqanku.

⁴² Chanta ruwarapullankitaj calzoncillosta linomanta. Chaytataj churakonqanku ñañu wasankumanta piernankukama.

⁴³ Chay p'achasta churarakuspa Aarón, jinallataj wawasnimpis Diospaj tiyakunan toldoman yaykonqanku, chayri altarman qayllaykunankupaj rikuchikusta jaywanankupaj Diospaj t'aqasqa cheqapi, ama juchallikunankupaj, amataj wañunankupaj. Kay leyqa unaypajpuni kanqa, jinallataj mirayninkupajpis.