Éxodo 26 - Qheshwa Biblia DC

Diospa tiyakunan toldo

¹ Diospa tiyakunantaqa chunka cortinasniyojta ruwanki; chaytaj kanqa sumaj t'ullkusqa linomanta, colornintaj kanqa azul, puka, puka panti ima. Chayta awaspataj pallaynimpi churanki iskay angelesta.

² Tukuynin cortinasqa uj rejlla kanqanku: Sayt'unmanqa chunka iskayniyoj khuskanniyoj metros kanqa, kinrayninmantaj iskay metros kanqa.

³ Phishqa cortinasta ujllaman siraykunki, jinallataj wakin phishqa cortinastapis ujllaman.

⁴ Ñaupaj kaj sirasqayki azul cortinaj puntasninman q'aytumanta ningrista ruwaranki, jinallataj iskay kaj k'askachisqasniykej puntasninmampis.

⁵ Ñaupaj kaj sirasqasniykej puntasnimpeqa phishqa chunka jusk'usta ruwanki, qhepan kajpipis kikillantataj; jinamanta ningrisnin pura tinkunankupaj.

⁶ Chantaqa ruwallankitaj phishqa chunka ganchosta qorimanta chay sirasqasniyki purajmanta t'inkikunankupaj; jinamanta Diospa tiyakunan toldoqa ujlla sayarinampaj.

⁷ Chaymantaqa awallankitaj chunka ujniyoj bayetasta cabra pelosmanta, Diospa tiyakunanta toldowan jina qhataykunapaj.

⁸ Sapa uj bayetaqa uj rejlla kanqa, sayt'unman kinsa metro khuskanniyoj, jinallataj kinrayninmampis.

⁹ Phishqa bayetasta ujllaman t'inkiykuy, sojta bayetastapis ujllaman. Sojta kaj bayetata, Diospa tiyakunan toldompa ñaupaqempi uraman liwiykuy.

¹⁰ Chay bayetaspa cantosnimpitaj ruwanki phishqa chunka jusk'usta, jinallataj iskay kaj t'inkisqayki bayetaspa cantosnimpipis.

¹¹ Chaymantaqa ruwallankitaj phishqa chunka ganchosta broncemanta chay jusk'usninmanta chhitaranaykipaj, ajinamanta ujlla kajtin muyuykuchinaykipaj.

¹² Chay bayetasmanta kurajyajtataj, khuskan ima kurajyajta Diospa tiyakunampaj wasanman warkhuykunki.

¹³ Chay bayetasmanta sayt'unman kurajyajtin, sapa uj ladonman warkhuykunki. Tawa chunka phishqayoj centimetrosta uj ladomanta, jinallataj uj ladomantapis.

¹⁴ Chay toldota qhatanaykipaj ruwallankitaj cordero qarasmanta pukaman teñispa. Chay pataman qhatanaykipajtaj ruwallankitaj waj animalespa sumaj kaj qarasninmanta.

¹⁵ Diospa tiyakunanta sayachinaykipajqa ruwanki acacia maderamanta tablasta, chaytataj sayarichinki.

¹⁶ Chay maderasqa kanqa tawa metro khuskanniyoj sayt'unman, kinrayninmantaj sojta chunka phishqayoj centimetrosniyoj.

¹⁷ Sapa uj maderastaj kanqa iskay jawapi tarukiyasqas chaywan purajmanta k'askanakunankupaj. Ajinata ruwanki sapa uj tablasta Diospa tiyakunanta sayarichinapaj.

¹⁸ Diospa tiyakunampa tablasninta ruwaspaqa, iskay chunka tablasta ruwanki uraynejmanta sayachinaykipaj.

¹⁹ Chay tablasta sayachinaykipaj uranman churanki tawa chunka chukusta qolqemanta. Chay iskay chukuspa patampi sayanqa sapa uj tablas. Sapa uj tablaj urampi kanqa iskay chukus. Chay iskaynin tarukiyasqas kanqanku chayman sayaykunankupaj.

²⁰ Diospa tiyakunan pata ladonmantaj sayachinki iskay chunka tablasta.

²¹ Tawa chukusmanta iskaytakama churanki sapa uj tablaj urasninman.

²² Diospa tiyakunan qhepa ladonman sayachinki sojta tablasta.

²³ Iskay tablastawan sayachinki qhepa ladon esquinasninman.

²⁴ Chay tablasqa uramantapacha k'askanasqas kanqanku, jinallataj patamantapis maypichus ganchos kashan chaykama. Ajinata ruwakonqa iskaynin tablas iskaynin esquinasnin.

²⁵ Chaypi kanqa pusaj tablas qolqemanta ruwasqas chunka sojtayoj chukus patapi, chayri sapa tablas urapi kanqa iskay chukus.

²⁶ Chaymantaqa ruwallankitaj phishqa k'aspista acacia maderamanta Diospa tiyakuna uj lado uyanmanta jap'ichinaykipaj.

²⁷ Jinallataj phishqa k'aspista uj ladonmanta tablasta jap'ichinaykipaj qhepa ladonmanta inti llojsimuy uyaman jina.

²⁸ Chay k'aspisqa pasanqa tablaspa khuskanninta uj cantonmanta uj cantonkama.

²⁹ Tablastaqa tukuyninta qoriwan jawerqonki, chantaqa qorillamantataj ruwaranki ningrisninta sortejasta jina, chayninta chay k'aspista jusk'urachinaykipaj. Jinaspataj chay k'aspistapis qorillawantaj tukuyninta jawerqonki.

³⁰ Ajinata Diospa tiyakunanta sayarichinki, imaynatachus Sinaí orqopi rikucherqayki ruwanaykita chayman jina.

³¹ Ruwallaytaj uj velota lila telamanta, puka telamanta, puka panti telamanta, t'ullkusqa linomantawan; pallaynintataj churanki iskay angelesta.

³² Chaytataj warkhuykunki tawantin sayasqas kurkusman, acacia maderamanta ruwasqa, qoriwan jawisqa kashan chayman, mayqenchus qolqemanta ruwasqa chukus patapi sayasqa kashan chayman.

³³ Velotaqa warkhunki ganchos uraman; chay velo ukhumantaj churanki Diospa leyninwan kashan chay cajonta. Jinamanta chay velo t'aqanqa qankunata Diospa leyninwan kashan chay cajonmanta, llimphupuni nisqa cheqamantawan.

³⁴ Chaymantataj Diospa cajonninta kirpaykuy Diospaj t'aqasqa cheqapi.

³⁵ Mesatataj churanki velomanta karupi, Diospa tiyakunan toldoj pata ladonnejman. K'anchachinataqa mesaj chimpampi churanki, Diospa tiyakunan urannejpi.

³⁶ Diospa tiyakunampa punkunta wisq'anaykipajtaj ruwanki uj cortinata moradomanta, pukamanta, puka pantimanta, t'ullkusqa linomantawan sumaj k'achanchasqata.

³⁷ Cortinata warkhunaykipajqa ruwanki phishqa k'aspista acacia maderamanta qori ganchosniyojta; chaykunatapis qoriwan jawerqonki. Chaymantataj phishqa chukusta broncemanta ruwanki, chayman chay kurkusta sayachinaykipaj.