Éxodo 25 - Qheshwa Biblia DC

Ofrendas Diospa ajllasqa wasimpaj

^1-7 Señorqa Moisesman nerqa kay jinata: Niy israelitasman noqapaj ofrendasta oqharipunawankuta tukuy qharis maytachá munasqankuman jina, tukuy sonqowantaj. Ajinata oqharipuwachunku ofrendasniyta. Ofrendastaqa oqharipuwankichej kaykunata: Qorita, qolqeta, cobreta, morado tocuyota, puka telata, puka kulli telata, sumaj kaj linota, cabra pelosta, pukaman teñisqa oveja toro qarasta, waj animalespa sumaj kaj qarasninta, acacia, maderasta, k'anchachina aceiteta, sumajta q'apashaj imasta jawina aceitepaj, inciensopaj, ónice rumispaj, sumachaj rumista efodman churanapaj, kuraj kaj sacerdotej pectoralnimpajwan.

⁸ Runasqa ruwapuwachunku uj toldota, noqataj paykuna ukhupi tiyakusaj.

⁹ Chay toldota, chaypi kanay tiyan, chaykunatapis ruwankichej imaynatachus noqa nisqaykichej chayman jina.

Diospa leynimpaj uj cajonta ruwanamanta

¹⁰ Uj cajonqa acacia maderamanta, sayt'unman kanqa uj metro chunka phishqayoj, centimetrosniyoj, kinrayninmantaj kanqa khuskan metro kuraj, patamantaj kanqa khuskan metro kuraj.

¹¹ Chay cajompa ukhunta jawantawan qori puruwan jawerqonki, cantosnintataj qorillawantaj muyuykuchinki awakipasqata jina.

¹² Chaymantataj tawa ningrista ruwanki ch'uwa qorimanta. Chaykunatataj churaranki tawantin cantosninman, iskayta ñaupajman, iskaytataj qhepaman.

¹³ Chantaqa ruwallankitaj jatuchaj k'aspista, acacia maderamanta, jinaspataj qoriwan jawerqonki.

¹⁴ Chay k'aspistaj jusk'urachinki chay qori ningrisninta sortejasta jina k'askachisqasniykiman. Ajinamanta chay k'aspismanta oqharispa apaykachanapaj.

¹⁵ Chay k'aspisqa kikin cajompa ningrisnimpi qhepakonqanku, chaymantaqa ni pipis orqhonqachu.

¹⁶ Cajón ukhuman churanki qosqayki chay leyniyta.

¹⁷ Chay cajonta kirpanaykipaj ch'uwa qorimanta ruwanki uj kirpanata, sayt'unman kanqa uj metro chunka centimetrosniyoj, kinrayninmantaj sojta chunka phishqayoj centimetrosniyoj.

¹⁸ Chaymantaqa ruwanki iskay querubinesta qorimanta martillowan llusk'achaspa, churankitaj cajompa patanman ujninta uj ladoman, ujnintataj uj ladoman.

¹⁹ Querubenqa cajompa kirpananman sumaj k'askachisqa kanqa ujllapis kanman jina. Chaykunataj ujnin uj lado cantopi kanqa, ujnin kajtaj uj lado cantompi.

²⁰ Chaykunaqa kirpana patapi purajmanta qhawarinasqas kanqanku, lijrasninkuwan chay cajonta ujllaykoj jina, uyasninkupis chay qhawarisqas.

²¹ Chaymantaqa chay cajonta kirpaykuy. Chay ukhunmantaj leyta churaykunki, mayqenkunatachus noqa qosqayki chayta.

²² Chaypi qanwan tinkukusaj. Cajón patapi kashanku chay iskay querubines chaupinkumanta, noqa qanman willamusqayki israelitaspis imastachus ruwanankuta.

T'anta mesa

²³ Uj mesata ruway acacia maderamanta, chaytaj sayt'unman kanqa isq'on chunka centimetrosniyoj, kinrayninmantaj tawa chunka phishqayoj centimetrosniyoj, patamantaj kachun sojta phishqayoj centimetrosniyoj.

²⁴ Chaymantaqa ch'uwa qoriwan tukuyninta jawerqonki, cantosnintapis qorillawantaj awakipasqata jina muyuykuchinki.

²⁵ Chay mesaqa phatunman kanqa qanchis centimetrosniyoj. Chantaqa cantonta muyuykuchillankitaj qoriwan awakipasqata jina.

²⁶ Ruwallankitaj tawa ningrista qorimanta, chaytataj maynejpichus mesaj chakisnin kashan chayman k'askarachiy, tawantin cantosninman.

²⁷ Chay ningrisqa kanqa mesaj rakhun urapi, chayninta k'aspista jusk'uchinapaj, chay k'aspismanta oqharispa mesata apaykachanapaj.

²⁸ Chay k'aspisqa kanqa acacia maderamanta, jinaspataj qoriwan chay k'aspista jawerqonki, chaymanta oqharispa mesata apaykachanapaj.

²⁹ Chaymantaqa ruwallankitaj qorillamantapuni kucharasninta, chuwasninta, jarrasninta, vasosninta, k'aspisninta ima, chayman misk'i ofrendasta jap'inapaj.

³⁰ Ñaupaqeypi chay mesaman churankipuni, Diospa ñaupaqempi kaj, nisqa t'antata.

Qori k'anchachina

³¹ Chaymantaqa uj k'anchachinata ruwanki qorimanta martillowan. Chay k'anchachinaqa kanqa qorimanta, jap'inan, sayanan, copasnin, mut'usnin, t'ikasnin, chaytaj uj qorillamanta ruwasqa kanqa.

³² Chaytaj qanchis palqasniyoj kanqa, uj ladoman kinsa, uj ladomantaj kinsa, chaupipitaj uj.

³³ Sapa uj palqaj puntampi mechero almendro t'ika jina kanqa mut'uyoj t'ikayojtaj.

³⁴ Chaupi kaj palqaqa tawa copasniyoj kanqa almendro t'ikayoj phancharishaj.

³⁵ Sapa uj palqaj urampitaj uj mut'u kanqa. Ñaupaj palqaspa urampi, jinallataj iskay kajpa urampipis kanqanku. Ajina kanqa chay sojtantin palqaspa urampi.

³⁶ Chay palqasnin, wiñaynin imaqa ujlla kanqanku, martillowan llusk'achasqa qori purumanta.

³⁷ Churankitaj sapa uj palqasnimpa puntasnimpi kaj mecherosman pabilosta. Chaymantaj ninata jap'ichinki ñaupajman k'anchamunampaj.

³⁸ Pabilosnimpa puntasnimpi ushpha jap'inasnimpis qorimantapuni kanqa.

³⁹ Kay k'anchachinataqa ruwanki kinsa chunka kinsayoj kilo qorimanta, jinallataj tukuy imasnintapis.

⁴⁰ Chaykunataqa ruwanki imaynatachus Sinaí orqopi rikuchisorqa ajinata.