Éxodo 24 - Qheshwa Biblia DC

Moiseswan kurajkunawan Sinaí orqopi

¹ Moisesman Señorqa nerqa: Maypichus noqa kashani chayman wicharimuy Aaronwan, Nadabwan, Abiuwan, israelitasmanta qanchis chunka kurajkunapiwan, karumantapachataj qonqorikunkichej.

² Moisés, qanlla noqaman qayllamuwanki; paykunaqa karunejllapi kanqanku, nitaj runaspis qankunawan jamonqankuchu.

³ Moisesqa chaymanta jamuytawan runasman willarqa, imaynatachus payman Señorqa parlasqanta, kamachisqantataj. Runastaj chay nisqanman jina uj similla kuticherqanku: Noqaykoqa Señorpa tukuy kamachisqasninta ruwasqayku, nispa.

⁴ Chaymanta Moisesqa Señorpa tukuy palabrasninta qelqarqa. Tutamanta jatarispataj uj altarta orqo k'uchupi chunka iskayniyoj rumiswan ruwarqa, chay rumistaj Israel ayllusman jina karqa.

⁵ Moisesqa israelita waynasta kacharqa waka uñasta ruphachina rikuchikunas jina, allinyakuy rikuchikus jinata, Señorman jaywamunankupaj.

⁶ Moisestaj chay uywaspa wakin yawarninta jap'erqa, jatuchaj vasospitaj jallch'arqa. Khuskan yawarwantaj chay altar ruwasqanta ch'ajchorqa.

⁷ Jinaspataj chay trato ruwasqan libro qelqasqanta runasman leerqa. Chaypachataj runasqa nerqanku: Noqaykoqa Señorpa palabrasninta, kamachisqasninta ima ruwasqayku, nispa.

⁸ Moisestaj yawarta jap'iytawan runaspa patasninman ch'ajchorqa, nispa: Kay yawarqa Señorwan uj tratota ruwasqaykichejmanta, qankuna kay palabrasta Señorman nisqaykichejrayku, nispa.

⁹ Chaymantataj Moisesqa orqoman wicharerqa Aaronwan, Nadabwan, Abiuwan, israelitasmanta qanchis chunka kurajkunawan khuska.

¹⁰ Chaypitaj Israelpa Diosninta rikorqanku, chakisnin urapitaj rikorqanku lliphipirishajta safiromantapis pampan ruwasqs kanman jinata, cielo jina sut'isituta.

¹¹ Chay ajllasqa israelitastaqa Diosqa mana imanarqachu, paykunaqa tukuy sonqo Diosta rikorqanku, chantaqa mikhorqanku, ujyarqankutaj.

Moisés Sinaí orqopi

¹² Señortaj Moisesman nerqa: Jamuy, orqoman wicharimuy, maypichus noqa kashani chayman, chaypi suyaway, jaqaypi uj p'alta rumita qosqayki. Chay rumipi uj ley qelqasqa kanqa, kamachiykuna ima qankunaman yachachinaypaj.

¹³ Moisesqa sayariytawan Josué yanapajninwan khuska wicharerqa Diospa orqonman.

¹⁴ Chay qanchis chunka kurajkunamantaj Moisesqa nerqa: Kayllapi suyashawayku kutimunaykukama. Qankunawan, Aarón, Hurwan qhepakushanku, paykunaman ima kajtapis willakunaykichejpaj, nispa.

¹⁵ Chayta paykunaman willaytawan Moisesqa orqoman wicharerqa, phuyutaj chay ratopacha chay orqota pakaykorqa.

¹⁶ Señorpa kusiy k'anchaynintaj chay Sinaí orqoman uraykamorqa. Chay phuyutaj chay orqopi sojta p'unchayta sayarqa. Qanchis kaj p'unchaypitaj Señorqa Moisesta wajyamorqa phuyu ukhumanta.

¹⁷ Chay p'unchaypi Señorpa kusiy k'anchaynin israelitasman rikhurimorqa uj nina qanqey jina.

¹⁸ Moisestaj chay phuyu ukhuman yaykuspa orqoman wicharerqa. Chaypitaj payqa kamorqa tawa chunka p'unchayta, tawa chunka tutatawan.