Éxodo 23 - Qheshwa Biblia DC

Imastachus enemigospaj ruwanamanta

¹ Ama llullakuspa imatapis willankichu sajra runata yanapaychu qhasi mana kajta juraspa.

² Ama ashkha kasqankurayku sajra juchankuta ruwaysinkichu, ama ashkha kasqankurayku millay juchankuta qhatinkichu paykunata manchachikuspa, mana allin kajta allin ninaykipajqa.

³ Jinapeqa manchachikuspa ni wajchaspajpis mana allin kajtaqa, cheqan kasqanta ninkichu.

⁴ Sichus enemigoykej chinkasqa wakanta, chayri burronta tarinki chayqa, paypaman qhaterqapuy.

⁵ Sichus enemigoykej burron cargawan sayk'uspa wijch'ukushan chayqa, qhawallawajchu jinapi wijch'ukojta? Mana. Astawan qanqa aysariysinayki tiyan chay burronta.

⁶ Imachus cheqan kajtaqa, wajcha runa imaynachus kasqantaqa ama q'ewichinkichu qhasi mana kajmanta.

⁷ Llulla parlaykunamanta t'aqakuy, amataj wañuchinkichu mana juchayojta, cheqan kaj runata; noqa juchasapataqa mana qhawasajchu mana juchayojpaj.

⁸ Ama imatapis lluk'ichikunkichu, imaraykuchus lluk'eyqa runasta ciegoyachin, jinamanta mana juchayojtaqa juchajoyta rikhurichinku.

⁹ Waj llajtayojta ama llakichinkichu; qankunapis Egiptopi waj llajtayojllataj tiyakorqankichej. Chayrayku yachallankichej runaj llajtampi imaynachus tiyakuna kasqantaqa.

Samarikunapuni tiyan

^10-11 Sojta watata jallp'aykita llank'anki, chaymantataj poqoyninta oqharinki. Qanchis kaj watapitaj ama llank'ankichu; saqey samarikojta, llajtaykimanta kaj wajcha runas mikhunankupaj; chantapis chaymanta qhepakojta monte animales mikhunankupaj. Ajinallatataj ruwanki uvas chajraykiwan, olivo chajraykiwan ima.

¹² Sojta diata llank'anki, qanchis kaj diapitaj samarikunki, wakasniyki, burrosniyki samarikunankupaj; jinallataj warmi kamachiykej wawan kallpachakunampaj, jinallataj waj llajtayoj kajpis.

¹³ Tukuy kay ima nisqasniyta waqaychaychej. Ama jayk'ajpis waj dioskunaj sutinta mentankichejchu, ni simillaykichejwampis oqharinkichejchu.

Kinsa jatuchaj fiestas

¹⁴ Kinsa kutita watapeqa jatuchaj fiestata ruwankichej noqata jatunchawaspa.

¹⁵ Mana levadurayoj t'anta fiestata waqaychanki; qanchis día junt'atataj mana levadurayoj t'antata mikhunki, imaynatachus nisusqanman jina. Chaytaqa mikhunki Abib killapi, imaraykuchus chay killapi Egiptomanta llojsimorqanki. Ni pipis noqaman jamuwanqachu makisnin ch'usajlla.

¹⁶ Cosechasniykimantapis fiestata ruwallaytaj, tarpusqasniykimanta ñaupajta poqojkunamanta; jinallataj wata tukukuyta poqochisqasniykimanta, tukuy campopi watantinta poqochisqaykimanta.

¹⁷ Tukuy qharis watapi kinsa kutita Señorman qayllakonqanku.

¹⁸ Uywasta rikuchikuta qoshawaspa, yawarnintaqa ama mana levadurayoj t'antatawan khuska qowankichu, nitaj chay uywaj wiranta q'ayantinkama puchuchinkichu.

¹⁹ Jallp'aykej ñaupaj kaj poqoyninta Señor Diosniykej wasinman apamunki. Ñuñushaj cabra uñastaqa ama mamampa lechempi wayk'unkichu.

Señorpa angelnin israelitasta pusaj jamun

²⁰ Noqa angelniyta kachamusaj qampa ñaupaqeykita rispa pusasunampaj, ñampitaj waqaychasunampaj, chayachisunampajtaj, ima jallp'atachus qampaj wakicherqani chayman.

²¹ Ama paypa ñaupaqenmanta t'aqakunkichu, paypa nisusqantataj uyarinki. Ama paywanqa mana kasukoj jina purinkichu; imaraykuchus payqa chay imasta noqaj sutiypi ruwanqa. Mana jinata ruwankichejchu chayqa, juchasniykichejtapis mana perdonasonqachejchu.

²² Sichus cheqamanta paypa nisqasninta kasunki, ruwankitaj tukuy nisqasniyta chayqa, enemigosniykita jasut'isaj, llakichisajtaj qanta llakichisunki chaykunata.

²³ Angelniy qampa ñaupaqeykita renqa, chayachisonqataj amorreoj jallp'anman, heteojpaman, ferezeojpaman, cananeojpaman, heveojpaman, jebuseojpaman ima, mayqenkunatachus noqa chinkachisaj mana ujniyojta.

²⁴ Ama chay runas jina imatachus ruwayta yachasqankutapis ruwankichu, ama dioskunasninkuman qonqorikunkichu yupaychanaykipaj, manachayqa tukuyninta chinkachinki mana ujniyojta, jinamanta chay lantisninkuta chay yupaychana rumisninkutapis t'unaranki.

²⁵ Señor Diosniykita yupaychanki. Pay bendicenqa t'antaykita, yakuykitawan. Noqa tukuy onqoykunata qankuna ukhumanta orqhosaj.

²⁶ Manaraj wañunayki kashajtenqa mana wañojta saqesqaykichu. Llajtaykipeqa ni pi warmi sullonqachu, nitaj wawata mana rejsiyta atejkunapis kanqankuchu.

²⁷ Noqa astawan manchachiyta jatunchasaj, mayta llakiyta qhapariytawan, qampa ñaupaqeykipi may llajtatachá pasaspa manchachinaykipaj. Enemigosniykitaj qanmanta ayqekusonqanku.

²⁸ Ñaupaqeykita wayronqosta kachasaj, chaytaj manchachispa ñaupaqeykimanta qharqonqa heveosta, cananeosta, hititastawan.

²⁹ Chay runastaqa ñaupaqeykimanta mana uj watallapichu qharqosaj, chay jallp'a ch'umiyanampaj, nitaj chaypi ima monte sajra animalespis chaypi miranankupaj, jinamanta qankunata manchachinasuykichejpaj.

³⁰ Pisimanta pisi ñaupaqeykimanta qharqosaj, ashkhata miranaykikama, jinamanta pisimanta pisi chay jallp'asta jap'ikapunaykikama.

³¹ Mojonesniykita ruwapusqayki Puka Mar qochamantapacha filisteospa marninkama, ch'in pampamanta Eufrates mayukama. Chay jallp'aspi tiyakojkunataqa makisniykiman jaywasqayki, qantaj paykunata wijch'unki.

³² Ama paykunawanqa ni ima tratota ruwankichu, nitaj dioskunasninkuwampis.

³³ Chantaqa ama chay jallp'aykipi kakojta saqenkichu, ama chaykuna juchallichisunankupaj noqaj contrayta dioskunasninkuta yupaychaspa, chaytaj qampajqa mana allinchu kanqa.