Éxodo 22 - Qheshwa Biblia DC

Uj jinatawan qopunamanta ley

¹ Sichus pipis wakata suwakun, chayri ovejata, ñak'antaj chayri vendentaj chayqa, chay suwa qopuchun phishqa wakasta; ovejasmantarí tawa ovejasta.

² Sichus uj suwata suwashajta jap'inku, maqaspataj wañuchinku chayqa, chay wañuchej mana juchayojchu kanqa.

³ Sichus p'unchay wañuchin chayqa, chay wañuchej juchayoj kanqa. Pichus suwajtaj mashkhatachus suwasqampa valorninta qoponqa; mana qolqen tiyan chayri, pay kikin vendesqa kanqa, chaywan suwakusqanmanta junt'anampaj.

⁴ Sichus suwaj makimpi kausashajllataraj tarikapunku suwasqan wakata, chayri burrota, chayri ovejata chayqa, chay suwa qopunan tiyan uj jinatawan chay uywayojman.

⁵ Sichus mayqen uywasninta wajpa pastompi chayri uvas chajrampi michichimun chayqa, camponmanta chayri uvas chajranmanta aswan sumaj pagaykunawan pagachun.

⁶ Sichus pipis ninata campopi jap'ichin, ninataj iqaspa khiskasman jap'iykukuspa chaynejpi trigo karmantawan ruphaykun, chayri ruthunapaj jina kashajtin ruphaykun, chayri trigo chajra enterota ruphaykun chayqa, chay ruphachisqanmanta qoponqa.

⁷ Sichus mayqen pi rejsisqanman qolqenta jap'ichikun, chayri waj imatapis allin valorniyojta, chay runataj kikin wasinmanta suwachikun chayqa, chay suwa uj jinatawan qopunan tiyan, sichus jap'ichikun chayqa.

⁸ Sichus chay suwata mana jap'inkuchu chayqa, chay wasiyojta pusachunku Diospa wasinman ajinamanta yachakunampaj, cheqatapunichus runa masimpa imasninta suwachikun manachus chayta.

⁹ Chinkasqamanta jap'ikapojkunamantaqa kay jina kanqa: Sichus pipis wakanta chinachikun, chayri burronta, chayri ovejanta, p'achanta; dueñontaj rikhurimuspa ninman kayqa noqajta, ujpis nillanmantaj, mana kayqa noqajtapuni, noqajtapuni kakushan nispa ninakojtinkoqa, iskayninku Diospa wasinman richunku, chaypitaj mayqenchus juchayoj kasqanman jina, juchachasqa kaspa chay suwa kajqa uj jinatawan dueñonman qoponqa.

^10-11 Sichus mayqen runa masinman mink'akun, burronta, chayri wakanta, ovejanta, chayri waj uywasnintapis; jinapi kashaspataj wañun, chayri tulluyaykuspa wañun, chayri suwanku mana pejpa yachasqan chayqa; chay mink'asqa runa juramentota ruwanqa Señorpa sutimpi, mana pay chay uywasta imanasqanta. Uywayojtaj chayta creenan tiyan, ajinamanta chay ujnenqa mana paganqachu.

¹² Sitajchus pay rikushajtin ima uywallatapis suwanku chayqa, pay dueñonman qopunan tiyan.

¹³ Sichus ima sajra monte animal mikhuykun chayqa, chay sarwita wañusqa uywayojman rikuchichun, chaywanqa mana paganqachu.

¹⁴ Sichus pi ima uywallatapis mañarikun, paypa makimpitaj wañun, chayri khuyayaykuspa wañun mana dueñon rikushajtin chayqa, chay pichus mañakoj paganan tiyan uywayojman.

¹⁵ Chantaqa sichus dueñon rikushajtin uywan wañun chayqa, pichus mañakojqa mana pagananchu tiyan, mashkhamantachus mañakorqa chayllata qopunan tiyan.

Imastachus mana ruwanamanta

¹⁶ Sichus mayqempis qharita manaraj rejsej sipasta ch'aukiyan, manaraj casarakunampaj parlapayasqa kashajtin, paywantaj puñun chayqa, tatasninman qonan tiyan t'inkata, mañaqakunan tiyan yachasqa kasqanman jina, chaymantataj casaranan tiyan.

¹⁷ Sichus chay sipaspa tatasnin mana entregayta munankuchu chayqa, chay qhari qonan tiyan qolqeta, qharita manaraj rejsej sipaskunamanta qonapuni yachasqa kasqanman jina.

¹⁸ Layqa warmista cantomanta wañurachinki.

¹⁹ Pikunachus uywaswan qhenchachakonqanku chaykunapis wañonqanku.

²⁰ Pikunachus lantisman rikuchikusta jaywajkuna, Señorllaman jaywanankumanta nisqaqa, chaykunapis wañonqanku.

²¹ Waj llajtayoj runastaqa ama ch'aukiyankichu, nitaj llakichinkichu, imaraykuchus qankunapis Egiptopi waj llajtayojllataj karqankichej.

^22-24 Ama ni mayqen viudata, nitaj wajcha wawatapis llakichinkichejchu. Sichus qankuna llakichinkichej, noqamantaj willakuwanqanku chayqa, paykunata uyarisaj. Phiñakuyniytaj qankunaj contraykichejta k'ajarenqa, espadawantaj wañurachisqaykichej, chantaqa warmisniykichej viudas qhepakonqanku, wawasniykichejpis mana tatasniyoj qhepakonqanku.

²⁵ Sichus qolqeykita mañarinki runasniy ukhupi kaj wajcha runaman, mayqenchus qampapi kashan chayman chayqa, ama paypaj phiñasqa kankichu uj qolqe mañaj runa jina, nitaj qolqe redituntapis mañankichu.

²⁶ Sichus chay wajcha runa, qolqeta mañarisqaykimanta ima p'achanta saqesorqa chayqa, inti yaykuyta qopuy chay p'achanta kutichipuy.

²⁷ Chay p'achitallan tiyapun chirimanta qhataykukunampaj. Manachayqa, imawantaj qhataykukonqari? Pay willakuwanqa chayqa, noqa payta kasusaj, imaraykuchus noqaqa khuyakuyniyoj kani.

²⁸ Ama Diospa contrantaqa rimankichu, nitaj pichus llajtaykita kamachejta maldicinkichu.

²⁹ Ama qonqankichu cosechasniykimanta ofrendata apamuyta, manachayqa usqhayta apamunki, jinallataj uvasniykimantapis. Chantaqa kuraj kaj wawaykita qopuwanki.

³⁰ Kikillantataj wakasniykej kuraj kaj uñasninta apamuwanki, jinallataj ovejasniykimantapis. Chay phiwi uñasqa qanchis p'unchaykunata kanqanku mamasninkuwan nacesqankumanta qhepaman; pusaj kaj p'unchaypitaj noqaman apamuwanki.

³¹ Qankunaqa noqaman sonqoykichejta qowankichej, ama mikhunkichejchu monte animalespa jap'isqan sarwi aychata, chaykunataqa alqosman qopunkichej.