Éxodo 21 - Qheshwa Biblia DC

Kamachispaj leyes

¹ Kay leyesta qonki:

² Sichus qan rantinki uj hebreo kamachita chayqa, sojta watata llank'anqa, chaymantataj qanchis kaj watapi libre llojsiponqa ni imamanta manuyoj.

³ Sichus sapallan yaykumorqa chayqa, sapallantaj llojsiponqa. Sichus warmiyoj yaykumorqa chaypis, warminwan khuska llojsiponqa.

⁴ Sichus patronnin casarachin, chaypitaj qhari wawasta warmi wawasta ima rejsin chayqa, chay warmeqa wawasninwan patronnimpapi qhepakonqa, kamachillaña sapan llojsiponqa.

^5-6 Sichus chay kamachi mana munanchu sapallan ripuyta, warminta, wawasninta, patronnintawan munakusqanrayku chayqa, patronnin pusanqa Diospa ñaupaqenman, chaypitaj sayachenqa punkuman, chayri punku quejoman, chaypi uj ningri jusk'unawan ningrinta jusk'onqa. Ajinamanta chay kamacheqa chay runajta wiñaypaj kamachin kanqa.

⁷ Sichus chay kamachej warmi wawanta vendenman kamachi kanampaj chayqa, mana llojsenqachu imaynatachus qhari kamachis llojsinku jinataqa.

⁸ Sichus chay sipas chay patronman mana gustanmanchu, chayrayku paywan mana casaranmanchu chayqa, patronnin saqenqa wajkuna rantikunankuta. Chantaqa manataj waj llajtayojman vendeyta atinchu.

⁹ Sichus payta chay patrón qhari wawanwan casarachin chayqa, warmi wawanta jina qhawanqa.

¹⁰ Sichus chay patrompa wawan chay warmiwan casarasqa kashaspa waj warmiwantaj casaran chayqa, warmin jinallapuni kanqa, kikillantapuni mikhonqa, p'achakonqa; qosanwampis kanallampuni tiyan.

¹¹ Sichus chay kinsa imasta mana ruwanchu chayqa, libre llojsipunan tiyan, ni imamanta manuyoj.

Allinta kausakunamanta leyes

^12-13 Pichus runa masinta wajtaspa wañuchejqa, paypis wajtaspa wañuchisqallataj kanqa. Sichus pipis wañuchinampaj mana mask'ashajtillan, Diospuni makinman chayachimun chayqa, noqa nisqayki maymanchus chay wañuchej pakakamunanta.

¹⁴ Sichus pi phiñakuspa runa masinta jinata ruwan, wañuchintaj qhasimanta chayqa, altarniymanta wijch'unki, qharqonkitaj wañunampaj.

¹⁵ Pichus tatanta, chayri mamanta maqajqa wañuchun,

¹⁶ Pichus runa masinta suwan, vendentaj, chayri paypa makimpi rikhurin chayqa, wañonqa.

¹⁷ Kikillantataj pichus tatanta, chayri mamanta maldicin chayqa, wañonqa.

^18-19 Chantaqa pichus runa masinwan phiñanakun, ujnintaj rumiwan ch'anqarparin, chayri sajmaspa nanaykuchin, chayraykutaj chay runaqa camanman onqosqa yaykupun, manataj wañunchu; pisimanta sayarispa tojnunwan puririn chayqa, chay pichus jinata ruwajqa mana juchachasqachu kanqa; chaywampis jampichinan tiyan. Chanta mashkha unaytachus mana imata ruwaspa karqa chaymanta paganan tiyan.

²⁰ Sichus mayqen patrompis qhari kamachinta, chayri warmi kamachinta k'aspiwan wajtarparinman, makimpitaj wañun chayqa, chay runa jasut'isqa kanqa.

²¹ Chanta sichus kausanraj uj diata, chayri iskay diata chayqa, mana jasut'isqachu kanqa, chay kamachi paypata kasqanrayku.

²² Sichus iskay runas maqanakushaspa uj onqoj warmita nanaykuchinku, chay warmitaj sullun mana wañuspalla chayqa, paganqanku mashkhatachus chay warmej qosan nin chayta, juecespa nisqankuman jina.

^23-25 Sichus chay warmi wañonqa chayqa, pagasqa kanqa kausaymanta kausaywan, ñawimanta ñawiwan, kirumanta kiruwan, makimanta makiwan, chakimanta chakiwan, ruphasqamanta ruphasqawan, nanachisqamanta nanachisqawan, sajmasqamanta sajmasqawan.

²⁶ Sichus mayqempis qhari kamachinta, chayri warmi kamachinta sajmaspa ñawinta cherqoyachin chayqa, libreta saqenan tiyan, ñawinta jinata ruwasqanmanta.

²⁷ Chanta sichus maqaspa kirunta urmachin chaypis, librellatataj saqenan tiyan, kirunta jinata urmachisqanmanta.

Uywasniyojkuna imaynachus kanankumanta

²⁸ Sichus uj waka uj qharita, chayri uj warmita wajraykuspa wañuchin chayqa, chay waka ch'anqaspa wañuchisqa kanqa, aychantataj ni pi mikhonqachu; chay wakayojtaj chay wañojmanta mana cuentayojchu kanqa.

²⁹ Chanta sichus chay waka wajrakojpuni, jinamanta mayqentapis wajraspa wañuchin, dueñompis yachashaspa chay wakanta mana wañuchinchu, chayqa, chay wakaqa rumiwan ch'anqaspa wañuchisqa kanqa, jinallataj chay wakayojpis wañonqa.

³⁰ Sichus chay runamanta wañunan kashajtin multata mañanku ama wañunampaj chayqa, chay runa multata pagachun ama wañuyta munaspaqa.

³¹ Kikillantataj ruwanqanku, kay leyman jina, sichus chay waka uj qhari wawata, chayri warmi wawata wajranman chayqa.

³² Sichus waka wajranman uj qhari kamachita, chayri uj warmi kamachita chayqa, chay wakata rumiwan ch'anqaspa wañuchichunku. Chay wakayojtaj mayqen kamachitachus wajrarqa chaypa patronninman qopuchun kinsa chunka qolqeta.

^33-34 Sichus mayqempis uj pozota ruwaspa, mana tapaspalla saqen, chaymantaj pejpa wakampis, chayri burrompis urmaykunman chayqa, chay pozota jusk'oj qopunan tiyan chay wakayojman, chayri burroyojman; chanta chay wañusqa uywataj paypaj qhepakaponqa.

³⁵ Sichus mayqempa wakan, wajpa wakanta wajraspa wañuchin chayqa, chay wajraj wakata vendespa qolqeta khuskanmanta rak'inakuchunku, chay wañusqa wakaj aychantapis kikillantataj chay wañusqa wakayojwan.

³⁶ Sichus uj runaj wakan unaymantapuni wajrayta yachan, dueñontaj chayta qhawallan jinata ruwajta chayqa, chay wakayojman kausashaj wakata qoponqa, chay wañusqa wakataj paypaj kanqa.