Éxodo 20 - Qheshwa Biblia DC

Chunka kamachiykunas

¹ Diosqa kay tukuy palabrasta parlamorqa, ajinata nispa:

² Noqa Señor Diosniyki kani, Egiptomanta orqhomorqayki, kamachillapuni kanaykimanta.

³ Noqamanta astawan waj dioskunataqa ama yupaychankichu.

⁴ Ama ni ima lantita ruwakunkichu, ni patapi cielopi kajman rijch'akojta, ni urapi jallp'api kajman rijch'akojta, nitaj yakuspi kajman rijch'akojtapis.

⁵ Ama qonqorikunkichu chaykunaman, ama yupaychankichu; imaraykuchus noqamin Señor Diosniykeqa kani, sinch'i, Dios celoso, noqata chejniwajkunaj juchasninkuta jasut'ej, tatasninkoj juchasninkuta wawasninkupi jasut'ini, chantá allchhisninkupi, nieto allchhisninkupi ima.

⁶ Khuyakuyniytaqa waranqa waranqasman rikuchini, pikunachus munakuwanku, kamachisqasniytataj kasuwanku chaykunaman.

⁷ Ama qhasimanta oqharinkichu Señor Diosniykej sutinta. Diosqa jasut'enqapuni pischus sutinta qhasimanta oqharejtaqa.

⁸ Ama qonqankichu samarikuna diamanta, chay diapi Diosmanta yuyarikunaykipaj.

⁹ Sojta p'unchayta llank'anki, chay p'unchaykunapi tukuy ruwanayki kajta ruway.

¹⁰ Qanchis kaj p'unchayrí Señor Diosniykimanta yuyarikuspa yupaychanapaj. Chay diapi ni imata ruwankichu, ni qan, ni qhari wawayki, ni warmi wawayki, ni qhari kamachiyki, ni warmi kamachiyki, ni uywasniyki, nitaj waj llajtayoj qankuna ukhupi tiyakojpis.

¹¹ Señorpis sojta p'unchaypi ruwarqa cielota, kay pachata, mar qochata, chay ruwasqasnimpi imaschus kashanku chaykunatawan. Qanchis kaj p'unchaypitaj samarikorqa, chayrayku Señorqa bendicerqa samarikuna p'unchayta, nerqataj payllapaj kasqanta.

¹² Tataykita mamaykitawan kasuy, unayta kay jallp'a patapi kausakunaykipaj, mayqen jallp'atachus Señor Diosniyki qosunki chaypi.

¹³ Ama wañuchinkichu.

¹⁴ Ama qhenchachakunkichu.

¹⁵ Ama suwakunkichu.

¹⁶ Ama qhasimanta runa masiykej contranta llullakuspa parlankichu.

¹⁷ Ama munapayankichu runa masiykej wasinta; ama munapayankichu runa masiykej warminta, ni qhari kamachinta, ni warmi kamachinta, ni wakanta, ni burronta, nitaj ni iman kajta.

Israelitas Diosta manchachikunku

¹⁸ Tukuy israelitas uyarerqanku rikorqankutaj lliuj lliujkunata, qhon qhonkunata, pututoj waqamusqanta, chay tukuy punta orqopis q'osñorisqanta ima. Chayta rikuspa israelitasqa mayta mancharikorqanku, karunchakorqankutaj, chay orqoman mana chimpaspa.

¹⁹ Chayrayku Moisesman nerqanku: Qanlla parlawayku, noqaykutaj kasusqayku imatachus niwasqaykuta. Diosqa ama noqaykuwanqa parlachunchu ari, pay parlapayawasqayku chayqa wañurasqayku.

²⁰ Moisestaj paykunaman nerqa: Ama manchachikuychejchu; Diosqa qankunata imaynachus kasqaykichejta yachaj jamun, qankuna payta manchachikunaykichejpajpuni, paypa ñaupaqempi ama juchallikunkichejchu.

²¹ Chaykama runasqa karullapi kasharqanku; Moisestaj qayllaykorqa phuyu laqha kasharqa chay orqoman, maypichus Dios kasharqa chayman.

Imaynatachus altarta ruwanamanta

²² Chaypitaj Señorqa Moisesman nerqa: Kay jinata niy israelitasman: Qankuna ña rikunkichejña imaynatachus cielomantapacha qankunawan parlasqayta.

²³ Noqaj ñaupaqeypi ama lantista ruwankichejchu qolqemanta, nitaj qorimantapis, chaykunatapis yupaychanaykichejpaj.

²⁴ T'urumanta altarta ruwapuwankichej, chay patapi ruphachina rikuchikusta jaywawankichej, allinyanakuy ofrendata, wakasta, ovejasta ima apamuwasqaykichejta. Maypichari kay jinasta ruwaspa sutiymanta yuyarikunkichej chayqa, chayman jamuspa bendicisqaykichej.

²⁵ Sichus rumismanta altarta ruwankichej chayqa, ama runaj llusk'achasqan rumismanta ruwapuwankichejchu. Sichus ima herramientawan chay rumista ch'eqonkichej chayqa, uj lantita jinaña qankunaqa ruwashankichej.

²⁶ Altarta ruwapuwaspaqa ama gradasniyojtachu ruwankichej, ama chayninta wicharishajtiykichej q'ala ukhuykichejpis rikukunampaj.