Éxodo 2 - Qheshwa Biblia DC

Moisespa nacekuynin

¹ Uj Leví ayllumanta kaj qhari, kikin Leví ayllullamantataj kaj warmiwan casararqa.

² Chay qharipajtaj chay warmeqa uj qhari wawata rejserqa; k'acha wawa kajtintaj payqa pakayllapi chay wawanta kinsa killata uywarqa.

³ Manaña astawan pakana jina kajtintaj totoramanta juch'uy sayt'u canastata ruwaspa, jusk'usnintataj mach'awan, breawan ima sumajta llut'aykuspa ruwarqa ama yaku yaykunampaj. Jinaspataj chay canastawan wawata churaykuspa chuchiyu ukhuman churaykamorqa Nilo mayu cantoman.

⁴ Wawaj kurajnin imillitamantaj nerqa qhepakuspa karullamanta qhawananta, chay sullk'an wawa imanakonqachus chayta.

⁵ Chay qhepatataj faraompa ususin chay mayuman uraykorqa mayllakoj, kamachisnin sipaskuna pusarisqa. Chay kamachisnin mayu cantosta puriykachashajtinkutaj, payqa rikorqa chuchiyu ukhupi uj canasta jina tuyushajta. Chaymantaqa ujnin kaj kamachin sipasta kacharqa chay canastata orqhomojta.

⁶ Paytaj chay canastata qhawaykuspa rikorqa uj wawata waqashajta. Faraompa ususenqa chay wawamanta khuyakuspa nerqa: Kayqa hebreospa wawasninmanta ujnin kaj.

⁷ Wawaj panantaj chay kikimpacha faraompa sipasninman qayllaykuspa nerqa: Qan munawajchu kunampacha uj wawa uywaj hebrea warmita wajyampusunayta kay wawata chuchuchispa uywapusunampaj?

⁸ Faraompa ususintaj nerqa: Yastá, rispa wajyamuy, nispa. Chay imillitataj usqhayta rispa wawaj mamallantataj wajyamorqa.

⁹ Chay warmi jamojtintaj faraompa ususin payman nerqa: Kay wawata apaspa uywampuway, noqataj chay uywasqaykimanta pagapusqayki. Chay warmitaj wawata apaspa uywamorqa.

¹⁰ Jatunña kajtintaj wawata faraompa ususinman apaporqa, paytaj wawataqa, wawampaj rejsikaporqa, suticharqataj Moisesta, chaywan niyta munarqa, yakumanta orqhorqani, nispa.

Moisés Egiptomanta ayqekun

¹¹ Moisesqa ñapis jatunña kaspa ayllusninmanta kajkunata watukoj uj kuti llojserqa, chaypi rikorqa may llakisqas sinch'itataj llank'asqankuta. Chayllapitaj rikorqa uj egipcio runa uj yawar masin hebreota maqashajta.

¹² Paytaj tukuynejta qhawarispa ni pi kajtintataj, chay maqaj runata jap'ispa wañurparicherqa, jinaspataj t'iyuman p'ampaykorqa.

¹³ Q'ayantin ujtawan llojsillarqataj, chaypi rikorqa iskay hebreostañataj maqanakushajta; mayqenchus astawan atipaj kajta nerqa: Imaraykutaj ayllullaykimantataj kajta chay jinata maqankiri?, nispa.

¹⁴ Chay runataj kuticherqa: Pitaj qanta churasunki noqaykuta kamachinawaykupaj, juezniyku kanaykipaj ajinata ninawaykupajri? Egipcio runata wañucherqanki jinatachu wañuchiyta munashawanki? Moisestaj chayta uyariytawan mancharikorqa, nerqataj: Cheqamanta egipcio runa wañuchisqayqa yachakunña, nispa.

¹⁵ Faraontaj egipcio runa wañuchisqanta yachaytawan Moisesta mask'achimorqa wañuchinampaj. Chaypaj Moisesqa ñapis ayqekorqaña Madián jallp'aman, chaypi tiyakoj. Chayman chayaspataj uj yaku pujyu cantoman tiyaykorqa.

¹⁶ Chaypi tiyasqa kashajtintaj Madianmanta Reuel sacerdotej qanchis warmi wawasnin jamorqanku yakuta orqhospa bateaman junt'achinankupaj, tatankoj ovejasninman ujyachinankupaj.

¹⁷ Waj michejkunataj jamuspa chay sipaskunata wakiyarqanku. Moisestaj chayta rikuspa chay sipaskunamanta jark'akorqa, yakuta orqhospataj ovejasninkuman ujyaracherqa.

¹⁸ Tatanku Reuelman kutejtinkutaj tatankoqa nerqa: Imajtintaj kunampeqa aswan usqhayta kutimunkichejri?, nispa.

¹⁹ Paykunataj kuticherqanku: Uj egipcio runa waj michejkuna maqashawajtiyku jark'arakuwayku, pay kikintaj ovejasninchejman yakuta orqhospa ujyarachin, nispa.

²⁰ Reuelqa wawasninman nerqa: Maypi kashan kunan chay runari? Imapajtaj sapanta saqerparinkichejri? Rispa wajyamuychej imallatapis mikhunampaj.

²¹ Jinamanta Moisesqa chay Reuelwan tiyakaporqa; qhepamantaj Reuelqa ujnin ususin Seforatawan Moisesta casaracherqa.

²² Chay warmeqa Moisespaj uj wawata rejserqa, Moisestaj chay wawanta suticharqa Gersonta, pay nerqa: Runaj llajtampi karu llajtayoj kani, nispa.

²³ Watas pasasqanman jina Egiptopi reyqa wañorqaña. Israelitastaj chaykama may jasut'isqas sinch'i llank'ayllapipuni kasqankumanta mayta waqarqanku Diosman willakuspa. Diostaj chay jinata waqasqankumanta mañakuyninkuta uyarerqa, chay ñak'ariypi kasqankuta rikuspa.

²⁴ Dios uyarerqa chay mañakuyninkuta, yuyarikuspa imaynatachus Abrahamwan, Isaacwan, Jacobwan ima uj tratota ruwasqanta.

²⁵ Dios qhawarerqa israelitasta, rikorqataj imaynachus kasqankuta.