Éxodo 18 - Qheshwa Biblia DC

Jetro Moisesta watukamun

¹ Jetro, Madianmanta sacerdote, Moisespa warmimpa tatan yacharqa Dios imastachus ruwasqanta Moisesnejta ayllusnin israelitaspaj. Chanta yachallarqataj Señorqa israelitasta Egiptomanta orqhomusqanta.

² Moisesqa kacharqa warmin Seforata iskaynin wawasnintawan tatan Jetrojpaman. Jetro tatantaj paykunata wasimpi jap'erqa pisi p'unchayta.

³ Ujnin wawampata sutin karqa Gersón, chayta suticharqa, noqaqa waj llajtayoj kani runaj llajtampi, nispa.

⁴ Ujnimpatataj sutin karqa Eliezer, chayta suticharqa, “tataypa Diosnin yanapawan, faraompa espadanmantataj librawan,” nispa.

⁵ Moisesqa jarakorqa ch'in pampapi, Diospa orqon nisqa karqa chay k'uchupi. Chaypi kashajtin suegron Jetroqa Moisespa warminta, iskaynin wawasnintawan pusariykukuspa Moisesta watukoj rerqa.

⁶ Moisesmantaj nerqa: Noqa suegroyki Jetro jamuyki qanta waturikoj warmiykita, iskaynin wawasniykitawan pusarikuspa.

⁷ Moisestaj jaramanta llojserqa suegron Jetrota taripaj. Ñaupaqenman k'umuykuspa much'aykorqa. Chaymantataj jaranman pusaykorqa.

⁸ Chaypi Moisesqa willarqa imastachus Señorqa ruwasqanta, israelitasta munakusqanrayku faraonta jinataj egipciostapis jasut'isqanta; imaynatachus tukuy ñanta jamusqankuta, imaynatatajchus Señorqa sajra imasmantapis jark'asqanta ima.

⁹ Jetroqa chayta uyarispa mayta kusikorqa, chay jina allin imasta Señorqa ruwapusqanmanta Israelpa wawasninrayku, egipciospa kamachiyninmanta orqhomusqanmantawan.

¹⁰ Chantaqa nerqa: Señorqa jatunchasqa kachun, Señor qhechumusqasuykichejrayku egipciospa makinmanta, faraompa makinmantawan. Jatunchasqallataj kachun israelitastapis egipciospa makinmanta qhechumusqanrayku.

¹¹ Imaraykuchus paykunaqa may jinata ñak'arichisorqachej. Kunanqa yachani Señorqa aswan jatun atiyniyoj kasqanta tukuy dioskunamanta nisqaqa.

¹² Chaymantaqa Moisespa suegron Jetro uj uywata rikuchikuta Señorman qorqa ruphachisqa kanampaj, chantaqa waj ofrendastawan. Chaymantataj Aaronwan tukuy kurajkuna israelitaswan jamorqanku Jetrowan khuska Diospa ñaupaqempi mikhoj.

Juezkunata churanku

¹³ Q'ayantintaj Moisesqa tiyaykukorqa tukuy ima quejasta cheqanchanampaj; israelita runasqa quejasninkuwan yaykoj llojsej kanku paqerinmanta ch'isiyanankama.

¹⁴ Suegron Jetrotaj, Moisesllapuni chay jinata runaspa quejasninta cheqanchajta rikuspa, payman nerqa: Imatataj kunan qan ruwanki kay runaswanri? Imaraykutaj qanlla sapayki tiyaykunki, runastaj diantin ñaupaqeykiman jamuspa yaykunku llojsinkuri?

^15-16 Moisestaj payman nerqa: Runasqa jamuwanku Diosmanta tapukunawankupaj. Imaschus paykuna ukhupi kajtimpis noqaman jamuwanku noqa imatapis ninaypaj, mayqenchus juchayoj, chayri mana juchayojpis kasqankuta, chantapis noqa yachani Dios imatachus kamachisqanta, yachachisqasninta ima.

^17-18 Chaymanta suegronqa nerqa: Mana allinchu qanlla ruwasqaykeqa, qan sayk'unkitaj, qanwan kashanku chay runas sayk'unkutaj. Ruwanasniykeqa, qan sayk'unkitaj, qanwan kashanku chay runas sayk'unkutaj. Ruwanasniykeqa ancha ashkha, qanllaqa mana ruwayta atiwajchu.

¹⁹ Uyariway Moisés, noqaqa kay jinata yuyaychaykiman, Diostaj chay ruwayta yanapasuchun. Qanqa Diosmampuni qayllay runaspa cuentanmanta; imaschus mana allinchu kashan runas ukhupi chaykunatapis Diosman willay.

²⁰ Yachachiy paykunaman Diospa kamachisqasninta yachachisqasnintawan, qan rikuchiy imaynatachus purinankuta, imastatajchus ruwanankutapis.

²¹ Chantapis qan ajllay israelitas ukhumanta allin yuyayniyoj qharista, Diosta manchachikojkunata, imastapis cheqanta ruwajkunata, qolqellamanta mana wañojkunata. Paykunata churaray sapa t'aqapi kurajkunas kanankupaj; paykunataj kamachichunku wakenqa waranqa runasta, wakintaj pachaj runasta, wakintaj phishqa chunka runasta, wakintataj chunka runasta kamachinankupaj.

²² Paykuna cheqanchachunku imaschus mana allinchu kashan chaykunata, imastachá mana ruwayta atinkuchu chaykunallata qanmanqa willasuchunku, chay pisi imastaqa paykuna ruwallanqanku. Ajinamanta qampajqa mana kanqachu tukuy ima ruwana, paykuna yanapasonqanku chay imasta ruwaspa ñaupajman apayta.

²³ Sichus kay imasta ajinata ruwanki, Diospa nisqantaj kanqa chayqa, qan atisqaykiman jina ruwallanki, jinallataj kay israelitaspis, kusisqastaj riponqanku wasisninkuman.

²⁴ Moisesqa suegrompa nisqanta kasorqa, imastachus nisqasninta kikinta ruwarqa.

²⁵ Moisesqa israelitas ukhumanta sumaj yuyayniyojkunata ajllarqa, jinaspataj paykunata churararqa kurajkuna jina kamachinankupaj; wakenqa waranqa runasta, wakenqa pachajta, wakintaj phishqa chunkata, wakintaj chunka runaspaj.

²⁶ Chay kutimantapacha paykuna ukhupi cheqancharqanku. Israelitas imachus mana ruwayta aterqankuchu chayllata Moisesmanqa willamorqanku, imaschus pisi ruwana kajtaqa paykunallaña ruwarqanku.

²⁷ Chaymanta Moisesqa suegronta kacharpayarqa, paytaj llajtanman riporqa.