Éxodo 16 - Qheshwa Biblia DC

Dios qon Maná nisqa t'antata

¹ Elimmanta tukuynin israelitas puririllarqankutaj, chaymanta chayarqanku Sin ch'in pampaman. Chayqa kashan Elimwan Sinaí orqowan chay chaupipi. Chaypachaqa karqa iskay kaj killapi, chunka phishqayoj p'unchaykunaña Egiptomanta llojsisqankumantapacha.

² Chay ch'in pampapi ujtawan rimayta qallarerqanku Moisespaj, Aarompaj ima.

³ Ajinata nerqanku: Allin kanman karqa Egiptopi Señorqa wañurachinawayku. Chaypi aycha mankaykoqa ni jayk'aj pisejchu, chantapis t'antata mikhoj kayku sajsakunaykukama. Qankunaqa kay ch'in orqoman pusamuwayku yarqhaymanta wañuchinawaykupaj kay tukuyniykuta.

⁴ Chaymanta Señorqa Moisesman nerqa: Noqa t'antata parachimusaj patamanta. Israelitasqa sapa paqarin jatariytawan pallakonqanku, mashkhatachus uj día mikhunanku chaypaj jinalla. Chaypi yachasaj piskunachus kamachisqasniyta kasuwanku, manachus chayta.

⁵ Sojta kaj p'unchaytaj q'ayantin mikhunankupajwan jina pallakonqanku.

⁶ Chaymantaqa Moiseswan Aaronwan israelitasman nerqanku: Kunan ch'isiyaykuyta yachankichej, imaynapichus Señorqa Egiptomanta orqhomusorqachej chayta.

⁷ Tutamanta rikunkichej Señorqa may jina jatunchus kasqanta. Pay uyarimusunkichej Señorpa contranta rimasqaykichejta. Noqaykoqa, pistaj kayku contraykuta rimanaykichejpajri?

⁸ Moisesqa nillarqataj: Ch'isiyaykuyta Señorqa aychata qosonqachej mikhunaykichejpaj; tutamantataj t'antata qosonqachej sajsakunaykichejkama mikhunaykichejpaj, imaraykuchus Señorqa uyarimusunkichej paypa contranta rimasqaykichejta. Noqaykoqa, pistaj kaykuri? Qankunaqa mana noqaykoj contraykutachu rimankichej, manachayqa Señorpa contranta rimashankichej.

⁹ Chaymanta Moisesqa Aaronman nerqa: Niy tukuynin israelitasman: Paykuna qayllakuchunku Señorman, imaraykuchus pay uyarikamun contranta rimasqankuta.

¹⁰ Aarón jinata israelitasman willashajtintaj, paykunaqa ch'in orqonejta qhawarerqanku, Señorpa jatun kaynintaj rikhurimorqapacha uj jatun phuyupi.

^11-12 Chaymanta nillarqataj Señorqa Moisesman: Noqa uyarimuni israelitaspa rimasqankuta. Paykunaman niy kay jinata: Ch'isiyaykuyta mikhunkichej aychata, tutamantataj t'antata mikhunkichej sajsakunaykichejkama; chaypi yachankichej noqa qankunaj Señor Diosniykichej kasqayta.

¹³ Chay ch'isiyaykuytapacha p'isaqas tukuy jarasninkuman junt'aykamorqanku, sut'iyaytataj rikhurerqa chhullalla jarasninkoj muyuynimpi.

¹⁴ Chhulla thañejtintaj, tukuy ch'in pampaspi rikhurerqa juch'uy mujitus jinalla, tukuy pampaspi chhulla rit'iman rijch'akoj.

¹⁵ Chayta rikuspa israelitasqa ninakorqanku ujkuna ujkunawan: Imataj kaykunari?, nispa, imaraykuchus mana yacharqankuchu imaschus kasqanta. Chaymanta Moisesqa paykunaman nerqa: Kayqa t'anta; chayta Señorqa qosunkichej mikhunaykichejpaj.

¹⁶ Kayta Señorqa apachimusunkichej: Chayta sapa ujniykichej pallakuychej mashkhatachus sapa ujniykichej mikhunaykichejpaj jina. Chantaqa mashkhachus sapa jarapi kankichej chayman cabenampaj jina, chantapis uj librata jinalla sapa ujpaj.

¹⁷ Israelitasqa ajinata ruwarqanku. Wakenqa ashkhasta pallaykorqanku, wakintaj pisillata.

¹⁸ Medidapi pallakusqankuman jina ashkhata pallakushajtinkupis mana puchorqachu, nitaj piserqachu pisillata pallakushajtinkupis. Sapa ujninku pallakorqanku mashkhatachus mikhunankupaj jina.

¹⁹ Chaymanta Moisesqa nillarqataj paykunaman: Ama mayqenniykichejpis puchuchinkichejchu q'ayantimpaj.

²⁰ Chaywampis wakenqa Moisesta mana kasorqankuchu, q'ayantin mikhunankupaj puchuchikorqanku, chaykunataj khuruykorqa asnaykorqataj. Chaymanta Moisesqa paykunapaj phiñakorqa.

²¹ Chaymantaqa sapa ujninku pallakorqanku sapa paqarin mashkhatachus mikhuyta yachasqankuman jinalla. Chay pampaspi puchoj mikhuykunataj q'oñitatamojtinkama unuyarparipoj.

²² Sojta kaj diapitaj uj jinatawan pallakorqanku iskay medidaspi sapa ujninkupaj. Chaymantaqa israelitaspa tukuy kurajkunasninkutaj Moisesman jamuspa willaj kanku mashktachus pallakusqankuta.

²³ Moisestaj nerqa: Chayta ruwanaykichejta Señorqa kamachin. Q'ayaqa samarikuna p'unchay Señorta yupaychanapaj. Kunan chayachikuychej imatachus chayachinaykichej kajta; t'impuchiychej imatachus t'impuchinaykichej kajta. Chantaqa ima mikhunachus puchun chaytapis q'ayapaj waqaychaychej.

²⁴ Moisespa nisqanman jina ima mikhunachus puchej chayta waqaychakorqanku q'ayantin mikhunankupaj, chayqa manaña khurorqachu, nitaj asnaykorqachu.

²⁵ Chaymanta Moisesqa nerqa: Kunanqa mikhuychej, imaraykuchus kay diaqa Señorpa p'unchaynin samarikuna p'unchay; kay p'unchaypi jinaqa kay mikhunata campopi mana tarinkichejchu.

²⁶ Sojta p'unchaypi sapa paqarin pallakullankichej; qanchis kaj p'unchayrí Señorpata, chaypajqa mana imapis tarikonqachu.

²⁷ Wakin israelitasqa qanchis kaj p'unchaypi llojserqanku pallakoj, nitaj imatapis tarerqankuchu.

²⁸ Chaymanta Señorqa Moisesman nerqa: Mayk'ajkamataj mana kasuwankichejchu kamachisqasniyta, yachachisqasniyta imari?

²⁹ Qhawariychej, noqa Señor uj samarikuna p'unchayta qoykichej, chayrayku sojta kaj p'unchaypi qoykichej t'antata iskay p'unchaypaj pallanaykichejpaj. Ajinata sapa ujniykichej jarasniykichejpi kaychej, samarina p'unchaypi ama llojsiychejchu.

³⁰ Chaymanta israelitasqa qanchis kaj p'unchaypi samarikorqanku.

³¹ Israelitasqa chay t'antata suticharqanku Maná nispa. Chay t'antaqa yurajsitus karqa culandro muju jina, misk'itaj misk'iyoj t'antapis kanman jina.

³² Chaymanta Moisesqa nerqa: Kayta Señorqa kamachiwanchej: Uj medida iskay litroyojman kay Maná t'antata junt'achiychej, chaytataj waqaychaychej mirayniykichejpaj paykuna yachanankupaj, ima t'antatachus qankunaman ch'in pampapi mikhuchisqayta, Egipto jallp'amanta qankunata orqhomushaspa.

³³ Chaymanta Moisesqa Aaronman nerqa: Uj juch'uy mankitaman churaykuy uj libraman nikojta Maná nisqa mikhunata. Chaytataj Señorpa ñaupaqenman churanki, waqaychasqa kanampaj mirayniykichej rejsinankupaj.

³⁴ Aaronqa chayta kikinta ruwarqa, jinaspataj Señorpa ñaupaqenman churarqa, maypichus ley karqa chayman, jallch'asqa kanampaj, imaynatachus Señorqa Moisesman kamachisqanman jina.

³⁵ Israelitasqa Maná nisqa t'antata mikhorqanku tawa chunka watasta, may jallp'aspichus runas tiyakorqanku chayman chayanankukama. Chay t'antata mikhorqanku Canaán jallp'aj mojonninman chayanankukama.

³⁶ Chay medidaqa karqa efapi chunka kajmanta ujnin kaj.