Éxodo 15 - Qheshwa Biblia DC

Moisespa takiynin

¹ Chaymantaqa Moiseswan israelitaswan Señorman takerqanku kay takiyta, ajinata: Noqa takisaj Señorta yupaychaspa, imaraykuchus jatun atiyninwan atipan, yakuwan p'ampaykuchispa, caballospi rejkunata caballosnintinta.

² Señorman takisaj. Pay noqaj salvacionniy, kallpaytaj. Kaymin Diosneyqa, Payta yupaychasaj, tataypa Diosnin; Payta jatunchasaj.

³ Señorqa tukuy maqanakupi atipaj, sutintaj Señor.

⁴ Mar qochaman Señorqa wijch'uykun faraompa carrosninta, soldadosnintawan. Faraompa ajllasqa capitanesnin puka mar qochapi chinkanku.

⁵ Rumis jina ukhuman chinkaykunku; musphay yana laqha millp'uykun.

⁶ Señor, paña makiykeqa may kallpasapa, atiyniyojtaj. Chay paña makiyki enemigota phirita ruwan.

⁷ Qanqa jatun atiyniykiwan chinkarparichinki contraykita oqharikojkunata, chayri qanwan maqanakuyta munajkunata. K'ajaj phiñakuyniyki trigo pajata jina q'olarparin.

⁸ May phiñakuywan phukuspa yakusta k'uchuncharparinki; yaku ukhoqa wayq'o jina purajman khallarparikun. Yanayarishaj mar qochaj sonqon tikayarparin.

⁹ Chejnikojqa wampu yuyaynimpi nin: Qhatirisaj taripanaykama, jap'imusaj, imastachus qhechusqayta rak'irasaj, almay sajsakonqa paykunawan sajsakunaykama. Espadayta orqhokuspa, makiy paykunata t'ojsispa tukuchenqa.

¹⁰ Qantaj wayraykiwan phukuchimunki, mar qochataj ujllata millp'uykun. Paykunataj titi jina chinkaykunku chay jina yaku oqharikoj ukhuman.

¹¹ Ay, Señor, pitaj qan jinari, dioskunaj chaupimpiri? Ni pipis qan jina llimphu santo kanchu. May jina t'ukuna imasta ruwanki, mana yuyay atinasta, musphanapaj jina.

¹² Paña makiykita oqharejtiykikama, jallp'a paykunata millp'uykun.

¹³ Khuyakuspa, munakuyniykiwan kay salvasqayki israelitasta pusashanki. Atiyniykiwan pusashanki llimphu k'achitu wasiykiman.

¹⁴ Llajtasqa yachaspa kharkatitenqanku. Nanayqa tukuy filisteosta q'ewiykachachenqa.

¹⁵ Edompi tiyakoj capitanespis mayta llakikonqanku. Moabpi kamachejkuna manchachikuywan kharkatitenqanku. Canaampi tukuy tiyakojkuna manchachikuywan q'ewakonqanku.

¹⁶ Paykunaman urmachun kharkatitiy, sustullikuytaj. Makiykej atiyninwan qhasayaspa chujruyachunku rumi jina; Oh Señor, Israel aylluyki pasanankama; kay rantikapusqayki aylluyki pasanankama.

¹⁷ Oh Señor, qan pusawayku ari tiyakunaykupaj sumaj llimphu orqoykiman, chayaqeyki orqopi tiyakunaykupaj, maypichus qan tiyakunki chaypi, maynejtachus qan Señor ajllakorqanki chaypi; chay llimphu cheqata makisniyki sayacherqa.

¹⁸ Señorqa kamachenqa wiñaypa wiñaynimpajpuni.

Maríaj takiynin

¹⁹ Mar qochaman yaykorqanku faraompa carrosnin, caballospi rejkuna soldadosnin, Señortaj mar yakuwan ujllata p'ampaykuchin. Israelitasrí chakipi pasarqanku mar qochata, ch'aki jallp'atapis rishankuman jina.

²⁰ Aarompa panan María profetiza tamborsitota oqharikuspa llojserqa, qhepantataj tukuy warmis panderas oqharisqas tususpa llojsillarqankutaj, tocarispa.

²¹ Mariataj takerqa ajinata: Takiychej Señorta yupaychaspa, imaraykuchus payqa manchay t'ukuytapuni atipan, mar qochapi carrosta, caballospi rejkunata ima chinkachispa.

Jaya yaku

²² Moisesqa israelitasman nerqa Puka Mar qocha cantomanta puririnankuta. Chaymantataj paykunaqa rerqanku Shur ch'in pampaman, chaymanta rillarqankupuni ch'in pampanta kinsa p'unchay puriyta mana yakuta tarispa.

²³ Maraman chayaspataj, chaypi kaj yakuta mana ujyayta aterqankuchu, imaraykuchus manchay jaya karqa. Chayrayku chay cheqata suticharqanku Mara, nispa.

²⁴ Israelitastaj Moisespa contranta rimayta qallarerqanku: Imatataj kunanqa ujyasunri?, nispa.

²⁵ Moisestaj Señormanta mañakorqa yanapata, Señortaj rikucherqa uj sach'ata. Moisestaj chayta yakuman chhapuykorqa, chaywantaj yakusta misk'iyacherqanku. Chaypi Señorqa paykunaman qorqa kamachiykunata, imaynatachus purinankupaj, yachanampajtaj imaynachus sonqonku kasqanta.

²⁶ Nerqataj: Sichus qankuna Señor Diosniykichejpa parlasqanta tukuy sonqo uyariwankichej, ruwankichejtaj imatapis cheqanta noqaj ñaupaqeypi kamachiykunasniyta, waqaychankichejtaj imaschus ruwaykunasniyta chayqa, egipciosman apachimorqani chay onqoykunata ni mayqenta qankunaman apachimusqaykichejchu; imaraykuchus noqamin thañichejniykichej Señorqa kani.

²⁷ Chaymantaqa chayarqanku Elimman, maymantachus chunka iskayniyoj juturismanta yakus phullchimusharqanku, qanchis chunka palmastaj karqanku, chayman. Chay yakus qayllapitaj jarakorqanku.