Éxodo 14 - Qheshwa Biblia DC

Puka mar qochata israelitas chimpanku

^1-2 Señorqa Moisesman nerqa: Riy israelitasman, kutirispa jarakuchunku Pi-hahirotpa chimpampi, Migdolwan mar qochawan tinkuypi Baal-zefompa chimpampi. Chay cheqaspa chimpampi jarakunkichej mar qocha qayllapi.

³ Faraonqa nenqa: Israelitasqa mana yachankuchu maymanchus rinankuta. Ch'in pampaspi chinkasqas jina kashanku, jark'asqas jinataj, nispa.

⁴ Noqataj faraompa sonqonta rumiyachisaj qankunata qhatirimunasuykichejpaj. Chaypitaj atiyniyta rikuchisaj paypa patampi, tukuy soldadosnimpa patampiwan. Ajinamanta egipciosqa yachanqanku noqa Señor kasqayta. Israelitastaj chayta uyarispa kikinta ruwarqanku.

⁵ Chaykamataj Egiptomanta reyqa yacharqa israelitasqa ayqesqankuta. Faraonqa mayta phiñarikuspa, jinallataj kamachisnimpis, nerqanku: Imatataj noqanchej ruwashanchejri, imapajtaj israelitasta rejta saqerqanchejri, noqanchejpaj imatapis ruwananku kashajtinri?

⁶ Faraonqa chay ratopacha kamacherqa maqanakunan carronta wakichipunankuta, soldadosnimpis paywan khuska rinankuta.

⁷ Chaymanta aparqa sojta pachaj sumachaj egipcio carrosta caballos qhatatejkunatawan, sapa uj carrospi capitanesnintawan.

⁸ Egipto rey faraompa sonqonta Señorqa rumiyacherqa, israelitasta qhatirinampaj, mana kasuspa israelitasqa chay jina atiywan llojsishajtinku.

⁹ Egipciosqa purirerqanku israelitasta qhatirispa, tukuy soldadosninkuwan, wakin caballospi rejkunawan ima. Jinata rispa karunejmanta israelitasta rikorqanku, mar qocha qayllapiña jarakusqas kashajtinku, Pi-hahirot Baal-zefonwan chimpampi.

¹⁰ Israelitastaj, faraón soldadosninwan qayllaykushajta rikuspa maytapuni mancharikorqanku, Señormantataj mayta mañakorqanku.

¹¹ Moisesmantaj nerqanku: Manachu Egiptopi p'ampakunaykupaj karqa aya p'ampanas, kay ch'in pampapi wañurachichinawaykupajchu orqhomuwarqayku? Imatataj kayta ruwawaykuri? Chaypajchu Egiptomanta orqhomuwarqayku?

¹² Chayrayku qanta nerqayku Egiptollapiraj kashaspa: Saqewayku egipciospa kamachisnin kajta, nispa. Noqaykupajqa walej kanman karqa egipciospa kamachisnin kanayku, kay ch'in pampapi wañunaykumantaqa.

¹³ Moisestaj paykunaman nerqa: Chaymantaqa ama mancharikuychejchu, sumajta sayaychej, rikunkichej Señor imatachus ruwanqa qankunata libranasuykichejpaj; imaraykuchus kunallanña egipciospa uyasninkuta rikushankichej, kaymanta qhepamanqa ni jayk'aj rikunkichejñachu.

¹⁴ Qankunaqa ama chaymanta llakikuychejchu, Señorlla cuentaykichejmanta maqanakonqa.

¹⁵ Chaypachataj Señorqa Moisesman nerqa: Imaraykutaj qanqa noqamanta yanapata mañakuwankiri? Niy israelitasman ñaupajman rinallankutapuni.

¹⁶ Qan tojnuykita oqharikuspa makiykita pataman oqhariy chay mar qochanejman, iskaymantaj t'aqarpariy, israelitas chayninta ch'akipi chimpanankupaj.

¹⁷ Noqataj egipciospa sonqosninta rumiyachisaj, qhepaykichejta qhatimunasuykichejpaj. Chaypitaj noqa atiyniyta rikuchisaj faraompa soldadosnimpi, carrosnimpi, caballosnimpi, maqanakoj soldadosnimpi ima.

¹⁸ Maypachachus atiyniyta rikuchisaj faraompi, carrosnimpi, caballospi rej soldadosnimpi, chaypacharaj egipciosqa yachanqanku noqa Señor kasqayta.

¹⁹ Diospa angelnintaj israelitaspa ñaupaqenkuta rishaspa, qhepankutañataj rerqa. Jinallataj ñaupaqenkuta risharqa chay phuyupis qhepankuman kutirimuspa qhepankutañataj rerqa.

²⁰ Ajinamanta phuyoqa chaupipi rikhurerqa egipcioswan israelitaswan ama rikunakunankupaj. Chay phuyoqa egipciosta laqhaykorqa, israelitastataj tutan k'ancharqa. Chay tutaqa ni mayqen qayllaykunakorqankuchu. Chayrayku egipciosqa israelitasta mana taripayta aterqankuchu.

²¹ Moisesqa mar qochanejman makinta oqharerqa, Señortaj tukuy chay tuta inti llojsimuynejmanta sumajta wayrachimuspa yakuta iskayman khallarparerqa. Ajinamanta mar qochaqa iskayman ukhu wayq'o jina khallerparikuspa, chay cheqa ch'akiman tukorqa.

²² Israelitastaj mar qochaj chaupinta yaykuspa ch'aki jallp'api pasarqanku, yakustaj qhepakorqa jatun perqa jina lloq'enkupi, pañankupitaj.

²³ Egipciostaj caballosninkupi, carrosninkupi ima israelistaspa qhepanta yaykuykorqanku, paykunata qhatiykuspa, marpa khuskanninkama.

²⁴ Señortaj q'ayantin sut'iyarpamuyta egipciospa campamentonta, phuyu ukhumanta, nina k'anchay ukhumantawan qhawarimuspa, egipciostaqa q'alata pejturparerqa.

²⁵ Carrosninkoj ruedasnin urmararqa, umankupis muyusqa jina kajtin manaña ñaupajman riyta aterqankuchu. Chaymanta egipciosqa ninakorqanku: Ayqekunachej israelitaspa ñaupaqenmanta, Señor maqanakushan paykunapaj sayakuspa noqanchejpa contranchejta.

²⁶ Señortaj nerqa Moisesman: Makiykita oqhariy marnejman ujllata tinkuykuspa egipciosta p'ampaykunampaj, carrosninkuta, tukuy caballosninkuta ima.

²⁷ Moisesqa marnejman makinta oqharerqa sut'iyarpayamushajtin, mar yakutaj ujllata manchay kallpawan wisq'aykakaporqa. Egipciostaj kutiripushaspa yakuwan p'ampaykuchikorqanku. Ajinata Señorqa egipciosta yakuwan marpi chinkarparicherqa.

²⁸ Yakoqa tinkuykushaspa tukuyninkuta p'ampaykorqa carrosta, caballospi rejkunata, faraompa tukuynin caballosninta, pikunachus israelitaspa qhepanta yaykorqanku chaykunata. Chaykunamanta mana ujpis kausashaj puchorqankuchu.

²⁹ Israelitasri mar qochata pasarqanku ch'akipi, yakustaj pañankupitaj, lloq'enkupitaj perqaspis kanman jina sayaykorqanku.

³⁰ Ajinata Señorqa israelitasta salvarqa chay p'unchaypi egipciospa makinmanta. Israelitasqa rikorqanku wañusqa egipciospa ayasninta mar qocha cantospi wijch'urayashajta.

³¹ Israelitasqa chayta rikorqanku mayta musphaspa t'ukunata jina, imaynatachus Señorqa egipciosta ruwasqanta. Chaymanta israelitasqa Señorta manchachikorqanku, creerqankutaj Señorpi, jinallataj kasorqanku Señorpa kamachin Moisestapis.