Éxodo 12 - Qheshwa Biblia DC

Dios munarqa Pascuata ruwanankuta

¹ Señorqa Egiptopi parlarqa Moiseswan Aaronwan, jinata nispa:

² Qankunapajqa kay killa kanqa killaspa qallarikuynin; qankunapajqa chay kanqa wataspa qallarikuynin killa.

³ Qankuna parlaychej israelitasman, ajinata: Kay killapi chunka día kashajtin, sapa ujniykichej ñak'aychej uj allinnin kaj corderota sapa ayllupi, chaytaj kachun sapa wasipi.

⁴ Sichus wakin wasispi pisislla kanku, mana chay corderota tukunankupaj jina chayqa, piwanchá qayllapura kanku chaywan, mashkhachá kasqankuman jina uj corderota ñak'achunku; mashkhatachus sapa uj runa mikhuyta yachasqanman jina.

⁵ Chay uywaqa kanan tiyan mana imanasqa, chantá kanan tiyan orqo, uj watayojllataj. Chaytaj kanan tiyan uj corderitopis, chayri cabritopis.

⁶ Chaykunataqa waqaychallankichej kay killapi chunka tawayoj p'unchaykama. Chayllapi ñak'ankichej sapa ujniykichej chay uywasta ña ch'isiyaykushajtinña.

⁷ Yawarninta jap'ispataj chaywan wasi quejusta ch'ajchunkichej, may wasipichus mikhunkichej chaykunapi.

⁸ Chay ch'isipi mikhunkichej chay aychasta ninapi kankaspa, mana levadurayoj t'antatawan, chantapis jaya qhorastawan.

⁹ Amataj chaykunamanta imasnintapis chawata mikhunkichejchu, nitaj yakupi chayasqatapis, manachayqa ninapi kankasqallatapuni, umanta, ch'unchulisnintapis.

¹⁰ Chay ch'isi mikhuspaqa amapuni puchuchinkichejchu q'ayantimpaj, manapuni tukuyta atinkichejchu chayri, ninapi ruphachinkichej.

¹¹ Chaytataj mikhunkichej ajinata: P'achasniykichej p'achallisqas, chakisniykichejman ujut'asniykichej churasqas, tojnuykichej jap'irisqas; chantapis apurata mikhunkichej, imaraykuchus chayqa Señorpa Pascuan.

¹² Chay ch'isi noqa Egiptoman jamusaj, wasimanta wasi purispataj tukuy egipciospa kuraj kaj qhari wawasninta, jinallataj tukuy uywasninkoj phiwi uñasnintapis wañurachisaj. Chaypimin noqa Señorqa, atiyniyta rikuchisaj Egiptopi kaj chhika lantispa contranta,

¹³ Maypichá yawar ch'ajchusqa kanqa, chaymin señalqa kanqa, chaypitaj qankuna kashankichej. Yawarta qhawariytawan qankunata pasallasqaykichej. Ajinamanta qankuna ukhupi mana wañoyqa kanqachu, Egiptopi wañushajtinku.

¹⁴ Chay diaqa qankunapaj kanqa yuyarikunaykichejpaj. Chayta ruwankichej qankunaj mitaykichejpi sumaj qhochukuta Señorpaj. Chay qhochukuta churanoqankichej wiñaypaj.

¹⁵ Qanchis diata mikhunkichej mana levadurayoj t'antata. Ajinaqa qallariy diamantapacha amapuni wasiykichejpi levadura kachunchu. Pillapis chay qanchis diata levadurayoj t'antata mikhojqa, israelita runas ukhumanta orqhospa wañuchisqa kanqa.

¹⁶ Ñaupaj diata Señorman qonkichej, jinallataj qanchis kaj diatapis paytapuni yupaychaspa. Chay diapeqa ama imatapis ruwankichejchu, imatachus sapa uj mikhunkichej chayllata wayk'ukuychej.

¹⁷ Mana levadurayoj t'anta mikhuna p'unchayta waqaychankichej, imarayuchus chay p'unchaypi ñaupa tatasniykichejta Egipto jallp'amanta orqhomorqani. Chayrayku kay p'unchaytaqa sumajta yuyarikuspa waqaychankichej uj leypis churasqa kanman jina sapa kuti kayta ruwanapaj; ajinata wiñaypaj mirayniykichejmanta miraynintinkama.

¹⁸ Qallarikuy kaj killapi mikhunkichej mana levadurayoj kaj t'antata, chunka tawayoj diamanta qallarispa, chay killapi iskay chunka ujniyoj día ch'isiyaykuykama.

¹⁹ Chay qanchis diapi levaduraqa mana wasiykichejpi kanqachu. Sichus mayqen levadurayojta mikhonqa chayqa, israelita ukhumanta wijch'usqa kanqa, kikin llajtayoj kajpis, chayri karu llajtayoj kajpis.

²⁰ Chayrayku amapuni mikhunkichejchu levadurayojtaqa. Maynejpichá tiyakunkichej chaypipis mana levadurayojllatapuni mikhunkichej.

²¹ Chaymantaqa Moisés tantacherqa tukuy kurajkuna israelitasta, nerqataj: Rispa ajllamuychej watayoj corderota chayri watayoj cabritota sapa uj familiasniykichejpaj, chaytataj ñak'ankichej Pascuata ruwaspa mikhunaykichejpaj.

²² Oqharimuychej uj q'apiy hisopota, chaywantaj ch'illamipi kashan chay yawarta chhapunkichej, jinaspataj wasi wisq'aña quejosta ch'ajchunkichej chay yawarwan. Chantaqa ni pipis llojsenqachu wasinmanta sut'iyamunankama.

²³ Imaraykuchus Señor jamuspa egipciosta wañurachenqa; may wasi wisq'aña quejuspichá yawarta tarenqa chaytaqa pasallanqa. Chay wañuchejtataj mana saqenqachu wasisniykichejman yaykuspa wañuchinanta.

²⁴ Kay kamachiytaqa sumajta kasunkichej, kayqa churasqa kanqa wiñaypaj, wawasniykichejpis waqaychanakupaj.

²⁵ Maypachachus sumaj jallp'aman chayankichej, Señor qosqaykichej nerqa chayman chaypachapis, kaytaqa Señormanta yuyarikuspa ruwallankichejpuni.

^26-27 Sichus mayk'aj wawasniykichej tapusonqachej: Qankunapajqa imatataj kay ruwasqaykichej niyta munanri?, nispa; chaypachaqa ninkichej: Kay uywaqa, uj rikuchiku jaywasqa Pascuapi Señormanta yuyarikuspa. Mayk'ajchus israelitas Egiptopi kashajtinku, egipciosta Señor wañurachisharqa chaypacha, Señorqa pasallarqa israelitaspa wasisninta, ajinamanta ayllusninchejta salvarqa. Chaypacha israelitasqa qonqoriykukuspa Señorta yupaycharqanku.

²⁸ Israelistastaj rispa tukuy imata ruwarqanku Señorpa kamachisqanman jina Moisesman Aaronmanwan.

Kuraj wawaspa wañuynin

²⁹ Khuskan tutata Señorqa Egiptopi wañuracherqa sapa wasipi egipciospa kuraj wawasninkuta, tronopi tiyasharqa chay faraompa kuraj wawanta, presochasqa runa carcelpi kasharqa chaynintimpata, jinallataj tukuy uywasninkoj phiwi uñasnintapis.

³⁰ Khuskan tutata faraonqa jatarerqa, jinallataj kamachisnin, chanta tukuy egipcio runas ima; imaraykuchus qhapariytaj manchay waqaytaj karqa tukuynin Egiptopi. Imaraykuchus ni uj wasipis karqachu mana wañusqayojqa.

³¹ Chay tutapacha faraonqa Moisesta Aarontawan wajyachimuspa nerqa: Llojsiychej kaymanta, t'aqakuychej runasniymanta qankuna, israelita masisniykichejwan khuska. Rispa Señorta yupaychamuychej, qankuna nisqaykichejman jina.

³² Ovejasniykichejta, wakasniykichejtapis apakapuychej, nisqaykichejman jina. Riychej kaymanta, chantaqa noqapajpis Diosmanta mañapuwaychej.

³³ Egipto runasqa usqhay usqhayta israelitasta yanaparqanku chay jallp'ankumanta usqhayta ripunankupaj; imaraykuchus nerqanku mana riponqanku chayqa, tukuyninchej wañurasunchej, nispa.

³⁴ Israelitasqa t'anta masasninkuta orqhokaporqanku, amaraj levadurata churashaspa, llijllasninkuman k'iruraspataj lijrasninkuman wishqhataykukuspa apakaporqanku.

³⁵ Chantapis Moisespa willasqanman jina egipciosmanta mañararqanku imaschá qolqemanta, qorimanta ruwasqa karqa chaykunata, p'achasta ima.

³⁶ Señortaj egipciosta may k'achasman tukucherqa, tukuy sonqo imatapis israelitasman qonankupaj imastachá mañakusqankuta. Ajinamanta israelitasqa egipiospa imasninkuta atisqankuta apakaporqanku.

Israelitas Egiptomanta llojsinku

³⁷ Israelitasqa Ramsesmanta llojsispa Sucotman rerqanku. Karqankutaj chakipi riyta atejkuna sojta pachaj waranqa qharis mana wawastawan yupaspa.

³⁸ Paykunawan imaymana rijch'aj ashkha runas rerqanku, jinallataj ovejasninkuwan wakasninkuwan.

³⁹ Chaypitaj ruwakorqanku Egiptomanta mana levadurayoj masasta orqhosqankumanta tortillasta. Ajinata Egiptomanta apurasqata llojsishajtinku egipciospata mana tiemponku karqachu israelitaspaj qoqawitapis wakichipunankupaj.

⁴⁰ Egiptopi israelitas tiyasqankoqa karqa tawa pachaj kinsa chunkayoj watas.

⁴¹ Mayk'ajchus tawa pachaj kinsa chunkayoj watas junt'akorqa, chay kikin p'unchayllataj Señorpa soldadosnin Egiptomanta llojsiporqanku.

⁴² Chay ch'isi Señorqa qhawarqa israelitasta Egiptomanta orqhonampaj. Chay ch'isita israelitaspis Señorpaj waqaychanku jinallataj wawasninku, mirayninkupis wiñaypaj.

Pascuamanta kamachiykuna

⁴³ Chaypacha Señorqa Moisesman Aaronmanwan nerqa: Kaykuna kanku Pascuamanta kamachiykunaqa: Ni pipis waj llajtayojqa mikhunanchu tiyan chay rikuchiku uywata jaywasqamanta.

⁴⁴ Manachayqa pi kamachischus qolqewan rantisqas kanku chaykunalla mikhuysikunanku tiyan, sichus ñaupajtaña circuncidasqas karqanku chayqa.

⁴⁵ Chaypachallaraj chayamoj waj llajtayoj runas, chanta unaytaña chaypi peoneyakojkuna karu llajtayoj runaspis manapuni chay aychasmantaqa mikhunankuchu tiyan.

⁴⁶ Chaytaqa uj wasillapi mikhunkichej. Chay aychamantaqa ni uj chhikallantapis jawaman orqhonankuchu tiyan, nitaj tullullantapis p'akinaykichejchu tiyan.

⁴⁷ Kaytaqa ruwanqanku tukuy israelitas.

⁴⁸ Sichus qankunawan waj llajtayoj tiyakunman, munanmantaj jinata Señorman ruwayta chayqa, circuncidachikunankuraj tiyan tukuynin qharis. Chaymantaraj chaytaqa ruwanan tiyan, chaymantaqa qankunaj nacionniykichejmantapis kanman jina kanqa. Mana circuncidachikojri manapuni chaymantaqa mikhunanchu tiyan.

⁴⁹ Chay kikin leyllapuni kanqa chay kikin llajtayojkunapaj, jinallataj waj llajtayojkunapajpis qankuna ukhupi tiyakojkunapaj.

⁵⁰ Ajinata ruwarqanku tukuynin israelitas; imaynatachus Señorqa kamacherqa Moisesman Aaronmanwan chayman jina.

⁵¹ Chay kikin diallataj Señorqa orqhorqa Egiptomanta israelitaspa soldadosninta.