Éxodo 1 - Qheshwa Biblia DC

Egiptopi israelitaspa ñak'ariynin

^1-4 Kaykuna kanku Israelpa wawasnimpa sutisnin, pikunachus Jacobwan khuska sapa uj aylluntin Egiptoman yaykojkunajta: Rubén, Simeón, Leví, Judá, Isacar, Zabulón, Benjamín, Dan, Neftalí, Gad, Aser ima.

⁵ Jacobpa miraynin tukuynimpi karqanku qanchis chunka. Chaypacha Joseqa Egiptopiña karqa.

⁶ Josewan wauqesninwan wañuraporqanku, jinallataj paykunaj mitasninkupis.

⁷ Israelitasqa ashkha kasqankuman jina ashkhata mirarqanku, may atiyniyojtaj karqanku; jinamanta paykunaqa Egiptoman junt'aykorqanku.

^8-9 Chay qhepata waj reyñataj Egiptoman yaykorqa, payqa Joseta mana rejserqachu. Chayrayku payqa runasninman nerqa: Qhawariychej, israelitasqa noqanchejmanta aswan ashkha, aswan atiyniyojtaj.

¹⁰ Chayrayku kunan noqanchejqa sumajta qhawakuspa imatapis ruwananchejpuni tiyan, paykuna ama astawan miranankupaj. Manachayqa mayk'aj guerra kajtin, enemigosninchejman kutikuspa maqawasunchej, jinaspataj riponqanku.

¹¹ Chaymanta Egiptomanta kajkunaqa capatazkunata churarqanku, israelitasta jasut'ispalla mayta llank'achinankupaj. Paykunata iskay llajtasta ruwacherqanku Pitonta, Ramasestawan. Chay llajtasqa karqa rey faraón mikhukunasta waqaychachinampaj.

¹² Jinata astawan jasut'ispa llank'achishajtinkupis, israelitasqa astawan miraykuspa ashkhayarqanku. Chayrayku egipciosqa astawan manchachikorqanku israelitasmanta.

¹³ Egipciosqa israelitasta maytapuni ñak'aricherqanku wata runasta jina llank'achispa.

¹⁴ Ajinata maytapuni llakichispa israelitasta llank'acherqanku, t'uruta sarucherqanku, ladrillosta ruwacherqanku, wakintaqa campospi llank'acherqanku, wakintataj mayta jasut'ispa waj llank'aykunaman churarqanku.

¹⁵ Chantapis Egiptomanta reyqa hebreospa onqochejkunasninman parlarqa, Siframan, Fuamanwan, nispa:

¹⁶ Hebreas wawata nacechikushajtinku yanapankichej chayqa, allinta qhawankichej, qhari kajtenqa wañuchinkichej; warmi kajtintaj saqellankichej kausajta.

¹⁷ Onqochej warmistaj Diosta manchachikuspa Egipto reypa nisqanta mana kasorqankuchu, saqellarqanku qhari wawas kausajta.

¹⁸ Reytaj payta mana kasusqankuta yachaspa onqochejkunata wajyachispa nerqa: Imaraykutaj qankuna kamachisqayta mana ruwankichejchu, qhari wawasta kausajta saqellankichejri?

¹⁹ Paykunataj faraonman kuticherqanku: Hebrea warmisqa mana egipcia warmis jinachu kanku; imarayuchus paykunaqa may sinch'i warmis kanku, manaraj onqochejkuna chayashajtin ñapis onqonkuña.

²⁰ Dios yanaparqa chay onqochejkunata. Chayrayku israelitasqa ashkhayaspa astawan mirarqanku, astawantaj kallpachakorqanku.

²¹ Onqochejkuna Diosta manchachikusqankurayku Diosqa mayta paykunata yanaparqa israelitas astawan miranankupaj.

²² Chaymanta faraonqa tukuy llajtata wajyachispa nerqa: Kunanqa tukuy qhari wawas nacejkunata mayuman wijch'umuychej, warmi wawastataj saqellaychej kausajta.