Ester (hebreo) 9 - Qheshwa Biblia DC

Judíos atipanku

¹ Chunka iskayniyoj Adar nisqa wata tukukuy killapi, chunka kinsayoj p'unchay kashajtin, reypa kamachisqasnin junt'akunan kashajtin, judiospa enemigosnin paykunata atipayta suyashajtinku; chayqa waj jinaman tukorqa, imaraykuchus judiosqa enemigosninkuta atipaykorqanku.

² Rey Asueroj suyusnimpi judiosqa tiyakorqanku, chay llajtaspi tantakorqanku, pikunachus paykunata sajra kajta ruwayta munarqanku chaykunawan maqanakunankupaj. Ni pipis sayaykorqachu paykunawan maqanakojqa, imaraykuchus sinch'i manchachikuy tukuy llajtasman jamusqa.

³ Suyuspi kamachejkuna, sapa llajtapi kamachejkuna, waj ruwajkuna, yanapajkunapis Mardoqueota manchachikuspa judiosta yanaparqanku.

⁴ Mardoqueoqa manchay mentasqa reypa palaciompi kasqaña. Chay mentasqa kasqanqa tukuy llajtasman chayarqa, sapa p'unchaytaj Mardoqueoqa astawan atiyniyojman tukusharqa.

⁵ Judiosqa enemigosninkuta espadawan t'ojsispa wañuracherqanku, manchay llakiyta ruwaspa mana ujniyojta saqespa, imaynatachus munasqankuman jina wañuracherqanku.

⁶ Reypa tiyanan Susa llajtallapiraj phishqa pachaj qharista wañuracherqanku.

^7-9 Chaypacha wañuchillarqankutaj Parsandatata, Dalfontata, Aspatata, Poratata, Adaliata, Aridatata, Parmastata, Arisaita, Aridaita, Vaizatatawan.

¹⁰ Chay chunka runasqa judiospa enemigosnin, Amampa wawasnin karqanku. Chaywampis imasninkuchus karqanku chaykunata judiosqa jap'ikaporqanku.

¹¹ Chay kikin p'unchaypacha reyman willarqanku chay tiyanan Susa llajtapi mashkha runaschus wañusqankuta.

¹² Chaymantataj reina Esterman nerqa: Kay Susa llajtapeqa judíos wañurachisqanku phishqa pachaj qharista, Amampa chunka wawasnintawan. Chaywampis, imastawanrajchus mana ruwankuchu maymantachus kamachishani chay llajtaspeqa? Kunanqa imatawantaj munankiri? Chay munasqaykeqa ruwasqa kanqa.

¹³ Estertaj nerqa: Sichus, reyníy, allin rijch'asunki chayqa, Susa llajtapi kaj judiosta saqey ari, kamachisqasniykiman jina kunan ruwarqanku, ajinallatataj q'ayapis ruwanankuta, Amampa chunka wawasnintataj sipinaman warkhunankuta.

¹⁴ Chanta reyqa kamacherqa ajinata ruwanankuta. Susa llajtapitaj chay kamacheyqa willakorqa. Judiostaj Amampa chunkantin wawasnimpa ayasnintataj sipinaman warkhorqanku.

¹⁵ Susa llajtapi tiyakorqanku chay judiosqa tantakullarqankutaj Adar nisqa killapi, chunka tawayoj p'unchay kashajtin. Chaypacha kinsa pachaj runasta wañuracherqanku Susa llajtapi, chaywampis imasninkuchus karqa chaykunataqa mana jap'ikaporqankuchu.

¹⁶ Rey Asuero kamachisharqa chay llajtaspi tiyakojkuna judiosqa tantakullarqankutaj tukuy enemigosninkuwan maqanakunankupaj, atipaspataj qanchis chunka phishqayoj waranqa runasta wañuracherqanku. Chaywampis, imasninkuchus karqa chaykunataqa mana jap'ikaporqankuchu.

¹⁷ Chaytaqa ruwarqanku Adar nisqa killapi chunka kinsayoj p'unchay kashajtin. Q'ayantintaj samarikorqanku, sumaj mikhuykunata wayk'urikuspataj mayta kusikorqanku.

¹⁸ Susa llajtapi kaj judiosqa chunka kinsayoj p'unchaypi q'ayantintawan imataj tantakusqankurayku, chunka phishqayoj p'unchay kashajtin samarikorqanku sumaj mikhuykunata wayk'urikuspa, mayta kusikuspataj.

¹⁹ Mana perqawan muyuykuchisqa ranchospi tiyakoj judiostaj Adar nisqa killapi chunka tawayoj p'unchay kashajtin, samarikorqanku sumaj mikhuykunata wayk'urikuspa, maytapuni kusikuspa, imasninkuchá tiyapusqanta ujkuna ujkunaman qokorqanku waqenarikuspa.

Purim nisqa fiesta

²⁰ Mardoqueotaj chay imasta qelqarqa. Cartatataj apacherqa tukuy judiosman rey Asuero kamachisharqa chay suyuspi kajkunaman, chay qayllaspi tiyakojkunaman, karuspi tiyakojkunamanwan.

²¹ Chay cartaspitaj kamacherqa; judiosqa chay fiestata sapa wata ruwanankuta Adar nisqa killapi, chunka tawayoj p'unchayta, chunka phishqayoj p'unchaytawan.

²² Chay imastaqa ruwananku karqa chay p'unchaypi paykunapaj kusikuy kasqanmanta, chay jina llakiymanta, enemigosninkumanta kacharichisqas kasqankumanta. Chay jina llakiywan kashajtinku kusiy p'unchaypi rikhurisqankumanta. Chay p'unchaykunastaqa yuyarikunanku karqa kusikuy fiestata ruwaspa, ujkuna ujkunawan purajmanta waqerinakuspa, jinallataj wajchasmampis imankuchá tiyan chaykunata waqerispa.

²³ Judiosqa chay fiestata sapa wata ruwarqanku, imatachus Mardoqueo qelqaspa apacherqa chayman jina.

²⁴ Amán, suerteta choqaspa tukuy judiospa contranta, wakicherqa mana ujniyojta paykunata chinkachinanta.

²⁵ Estertaj reypaman rejtin, reyqa uj cartata qelqaspa apacherqa, Amampa tukuy sajrata judiospaj yuyasqasnenqa payllamantaj urmananta, ajinamanta paywan wawasninwanqa sipinapi warkhusqas karqanku.

^26-27 Chayrayku chay p'unchaykunataqa Purim nispa suticharqanku, chay niytaj Pur palabramanta jamun. Chay Mardoqueoj cartampi nisqanman jina, paykuna rikusqankuman jina, chanta uyarisqankuman jinataj, judiosqa chayta usuta jina jap'erqanku paykuna ruwanankupaj, jinallataj qhepaman mirayninkupis ruwanampaj, pikunachus judiosman chimpaporqanku chaykunapajwan chay fiestata ruwanankuta, sapa wata mana saqespa, chay iskay diata maychus kasqanman jina.

²⁸ Chay p'unchaykunasqa yuyarisqas kananku karqa, fiestata ruwaspa mirayninkumanta mirayninkukama sapa familiapi, sapa llajtapi, sapa suyupi ima. Chay Purim nisqa p'unchaykunaqa waqaychasqas kananku karqa judiosnejta. Paykunaj mirayninkutaj ni jayk'aj qonqanankuchu karqa.

²⁹ Abihailpa wawan Esterwan, Mardoqueo judiowanqa uj cartatawan tukuy atiyninkuwan qelqarqanku, imaynachus karqa chay Purim nisqa fiestamanta, chay ñaupaj kaj qelqasqanku aswan sinch'i kanampaj.

³⁰ Chay cartastaqa Asuero kamachisharqa chay pachaj iskay chunka qanchisniyoj suyuspi judíos kajkunaman apacherqanku, sonqo tiyakuy palabraswan, cheqan palabraswantaj.

³¹ Kamacherqanku chay Purim fiesta ruwakunanta chay nisqanku p'unchaykunapi, imaynatachus kamacherqanku Mardoqueowan, reina Esterwan paykunapaj, mirayninkupajwan. Ajinallataj nerqanku ayunasqasninkumanta, llakiywan qhaparikusqankumantawan yuyarikunankupaj.

³² Esterpa kamachisqanqa Purim fiesta nisqamanta allinta sut'incharqa, imaynatachus sapa kuti ruwanankumanta. Chay imastaj uj libropi qelqasqa karqa.