Ester (hebreo) 8 - Qheshwa Biblia DC

Judiospa allinnimpaj uj ley llojsin

¹ Chay kikin p'unchaypacha rey Asueroqa reina Esterman, judiospa enemigonku Amampa wasinta qoporqa. Mardoqueotaj reyman qayllamorqa, imaraykuchus reinaqa willarqaña Mardoqueoqa ayllun kasqanta.

² Chanta reyqa Amanmanta qhechukapusqan sortejanta Mardoqueomanñataj qoporqa. Estertaj Mardoqueota mayordomomanta churarqa, Amampata karqa chay tukuy kapuyninmanta qhawanampaj.

³ Chaymantataj Esterqa ujtawan reyman parlarqa, mayta waqaspa chakisninman wijch'uykukuspa mañakorqa, Amampa sajra ruwasqasninta judiospa contrampi chayta chinkachinanta.

⁴ Chaymanta reyqa qorimanta ruwasqa tojnunta Esterman aysarerqa. Estertaj jatariytawan sayarerqa reypa ñaupaqempi.

⁵ Nerqataj: Sichus, reyníy, kay imas qanman allin rijch'asunki, kay nisusqaytaj cheqan, khuyakuyniykitataj tarini, munakuyniykitaj noqapaj tiyan chayqa, uj kamachiyta qelqasqata apachiy ari, Amán, judiospa contranta kamachiykunasta kamachisqasninta amaña ruwanankupaj. Chay kamachisqasqa churasqa kashan kamachishanki chay tukuynin llajtaspi judiosta wañuchinankupaj.

⁶ Imaynatataj noqaqa qhawayman llajtayman kay llakiy chayanantari, nacionniy tukuchisqa kanantari?, nispa.

⁷ Chanta reyqa Esterman, judío Mardoqueomanwan nerqa: Estermanña Amampa wasinta qopuni, paytataj warkhunapi sipinkuña, judiospa contranta makinta oqharisqanrayku.

⁸ Kunanqa qankuna imachus allin rijch'asusqaykichejta reypa sutimpi qelqaspa, reypa sortejanwan sellaspa tukuy judiosman apachiychej. Ima leypis reypa sutimpi ruwakojqa, reypa sortejanwan sellasqa kajtintaj, mana qhesachakuyta atinchu.

⁹ Chaypacha reypa tukuy qelqerisnenqa wajyachisqas karqanku, Sivas nisqa kinsa kaj killapi, iskay chunka kinsayoj p'unchaynimpi. Chay qelqerisqa imatachus Mardoqueoj nisqasninta qelqarqanku: Judiosman, suyuspi kamachejkunaman, sapa llajtaspi kamachejkunaman, waj kurajkunamanwan. Chaypacha iskay chunka qanchisniyoj suyusman, Indiamanta Etiopiakama. Chantapis chay qelqasqa apachisqa karqa sapa llajtasman imaynatachus qelqayta yachasqankuman jina, parlayninkuman jinataj. Chanta judiosmampis parlayninkuman jina, qelqayninkuman jinataj.

¹⁰ Chay qelqasqasqa rey Asueroj firmasninwan karqa, sortejanwan sellasqataj. Chaykunatataj chaskis aparqanku reypa aswan sumaj caballosnimpi lloq'aykuytawan.

¹¹ Chay cartaspi reyqa kamachisharqa tukuy judiosman, may llajtaspichá tiyakunku chaykunapi, tantaykukuytawan enemigosninkuwan maqanakunankupaj, mayqen llajtamantapis, chayri mayqen suyumantapis paykunaj contrankupi jamojtinku chay enemigosninkuta wañuchinankuta, chinkarichinankuta mana ujniyojta saqespa, warmista, nitaj wawastapis, tukuy kapuyninkutataj jap'ikapunankupaj.

¹² Chay tukuy imasqa ruwakunan karqa uj p'unchaylla rey Asueroj kamachisqan tukuynin suyuspi, wata tukukuy chunka iskayniyoj killapi, chunka kinsayoj p'unchay kashajtin.

¹³ Reypa kamachisqan uj qelqasqa copiaqa sapa llajtapi willakunan karqa. Chaypitaj nisharqa tukuy judíos chay p'unchaypaj sumaj wakichisqas kanankuta enemigosninkuman sajramanta sajrallatataj kutichinankupaj.

¹⁴ Reypa chay kamachisqantataj chaskis aparqanku reypa sumajta correj caballosnimpi. Chay kamachisqaqa reypa tiyanan Susa llajtapipis willasqa karqa.

¹⁵ Mardoqueoqa reypa ñaupaqenmanta reypa churakunan azulwan yurajwan color p'achasta churaykusqa, umampi jatun qori pillu churaykusqa, linomanta ruwasqa uj jatun puka mantawan qhataykusqataj. Chayta rikuspataj Susa llajtapi tukuy tiyakojkunaqa maytapuni kusikorqanku.

¹⁶ Judiospajqa k'anchay jina karqa, jatun kusiy, allimpi qhawasqa kaytaj.

¹⁷ Tukuy suyuspi tukuy llajtaspi ima, maykunamanchus chay kamachiy chayarqa chaykunapi, judiosqa jatun kusiywan, sumaj mikhunasta wayk'urikuspa kusikorqanku chay diaspi. Waj runaspis chayta rikuytawanqa judiosman tukorqanku, imaraykuchus judiosta manchachikorqanku.