Ester (hebreo) 7 - Qheshwa Biblia DC

Amanqa sipisqa wañun

¹ Reywan Amanman reina Esterpa sumaj mikhuyninman rerqanku.

² Chay kaj diapi reyqa vinota ujyashaspa Esterman nerqa: Imatataj kunan mañakuwanki reina Ester? Noqataj mañakuwasqaykita qosqayki. Imatataj mañakuyta munankiri? Mañakuwasqaykiman jina khuskan kamachiyniytawampis qosqayki.

³ Chaypacha reina Esterqa kutichispa nerqa: Sichus qan munakuwanki, allintaj qanman rijch'asunkiman chayqa, mañakuyki ama wañuchinawaykita, jinallataj llajta masisniytapis ama wañurachinaykita.

⁴ Noqawan llajta masisniywanqa vendesqas kayku wañurachinawaykupaj, mana ujniyojta chinkachinawaykupajtaj. Sichus warmi kamachispaj, qhari kamachispaj ima vendesqas kaykuman karqa chayqa, ch'inlla kakuyman karqa. Sichus ajinata wañurachiwasqayku chayqa reyníy, qampajqa manapuni allinchu kanqa.

⁵ Chanta rey Asueroqa Esterman nerqa: Pitaj chanta chay runari, maypitaj kashan, chay jinatapuni ruwayta yuyajri?, nispa.

⁶ Estertaj nerqa: Chay jinata ruwaj, manchay sajra enemigo runaqa, kay Amán. Amantaj mana imanakuyta atispa t'ukorqa reypa ñaupaqempi, reinaj ñaupaqempiwan.

⁷ Rey Asuerotaj mikhusharqa chay mesamanta manchay phiñasqa sayariytawan, palacio ukhupi huertaman rerqa. Amantaj kikimpi qhepakorqa, reinamanta ama wañuchinanta mañakuspa. Payqa yachakorqaña imatachus rey payta ruwananta.

^8-9 Chanta reyqa huertamanta kutimorqa, maynejpichus mikhorqanku chayman. Amantaj maypichus Ester kasharqa chay camanman wijch'uykukusqa ama wañuchinanta mañakuspa. Reytaj chayta rikuspa nerqa: Kikin wasiypichu reinata alqochayta munanki? Chayta rey nejtinkamataj reypa runasnin Amampa uyanta qhataykorqanku. Chaypi kashaj reypa ujnin kaj kamachin Harbonataj reyman nerqa: Amampa wasimpi runa sipina ruwasqa kashan iskay chunka iskayniyoj metros jina patanejman. Chayta ruwacherqa kikin Amán, qanmanta allinta parlaj Mardoqueota chaypi sipichinampaj. Reytaj chayta uyarispa nerqa: Chayman Amanta warkhumuychej, nispa.

¹⁰ Ajinata Amantaqa Mardoqueopaj ruwachisqan sipinallapitaj warkhorqanku. Chaywantaj reypa sonqonqa tiyaykorqa chay phiñakuyninmanta.