Ester (hebreo) 6 - Qheshwa Biblia DC

Mardoqueoj atipasqan

¹ Chay kikin ch'isipacha reyqa mana puñuyta aterqachu. Chayraykutaj kamachisninman nerqa, ima sumaj ruwasqaschu chay naciompi ñaupajmantapacha libropi qelqasqa kashan chaykunata apamuspa leenankuta.

² Chay libropitaj qelqasqata tarerqanku, Mardoqueoj willasqanta, reypa iskay kamachisnin reyta wañuchinankupaj wakichikushasqankumanta. Chay kamachisqa Bigtanwan, Tereswan karqanku, reypa palacion punkuta qhawajkuna.

³ Chaymantataj reyqa nerqa: Chay jinata ruwasqanmanta ima allintataj Mardoqueopaj ruwapunchej, chayri ima t'inkatataj qorinchej? Chay kamachisnintaj reyman nerqanku: ana imatapis paypajqa ruwapunchejchu.

⁴ Chanta reyqa taporqa: Pitaj chay patiopi kashan?, nispa. Amanrí chaypachapuni palacio patioman yaykumusqa reywan parlanampaj, mañakunampajtaj Mardoqueota warkhuchinampaj chay sipichinata ruwachisqampi.

⁵ Kamachisnintaj reymanqa nerqanku: Amanqa patiopi kashan. Reytaj, yaykumuchun, nerqa.

⁶ Amán yaykojtintaj reyqa payta tapurerqa: Imatataj ruwana kanman, pi runatachus reyqa pataman oqhariyta munashan chaypajri?, nispa. Amantaj sonqompi nerqa: Pipajtaj reyqa chay jinata ruwanmanri, noqamanta astawanri?, nispa.

^7-8 Amantaj kuticherqa: Pi runatachus reyqa pataman oqhariyta munashan chaypajqa, reypa churakunan p'achata, reypa purinan caballotawan, reypa umampi kashan kay pillutawan ima apamuchunku.

⁹ Chaypachaqa caballotawan ima, reypa mayqen kamachinchus aswan kuraj kaj kashan chayman jaywachunku. Chay runataj p'achallichichun, pitachus reyqa jatunchayta munan chay runaman, reypa caballonman lloq'aykuchispataj plazanta muyurichimuchun, ñaupaqentataj richun sinch'ita qhaparispa. Ajina ruwasqa kachun pitachus reyqa jatunchayta munan chay runawanqa.

¹⁰ Chaymanta reyqa Amanman nerqa: Usqhayllata caballoytawan p'achaytawan jap'ispa, imatachus nisqaykita kikisitunta ruway, judío Mardoqueowan mana uj chhikanta qonqarispa. Payqa palacio punkupi kunan tiyasqa kashan. Chay nisqaykitaqa kikintapuni ruway ama imatapis qonqaspa.

¹¹ Amanqa reypa p'achanta orqhomuspa Mardoqueota p'achallicherqa, caballopi lloq'aykuchispataj llajta plazanta muyurichimorqa. Payqa Mardoqueoj ñaupaqenta qhaparispa rerqa. Ajinatapuni ruwakonqa pitachus reyqa pataman oqhariyta munanqa chay runawanqa!, nispa.

¹² Ajinata muyurimuytawan Mardoqueoqa palacio punkuman kutiporqa. Amantaj usqhay usqhayta wasinman kachaykukorqa may llakisqa, uyanta pakaykukuspa.

¹³ Wasimpitaj Amanqa warmin Zeresman, tukuy kausaqesninman ima willarqa, imaschus paywan pasasqanmanta. Yachayniyoj kausaqesnin, warmin Zerespiwan nerqanku: Sichus chay judiospa mirayninmanta kaj, judío Mardoqueoj ñaupaqempi urmayta qallarinki chayqa, manapuni atipawajchu, manachayqa urmallankipuni chay runaj ñaupaqempi, nispa.

¹⁴ Ajinata manaraj parlayta tukushajtinku, reypata kamachisnin chayaykamorqankupacha Amanta pusanankupaj, Esterpa sumaj mikhuyta wayk'uchisqanta mikhumunankupaj.