Ester (hebreo) 4 - Qheshwa Biblia DC

Tukuy judiospa llakiynin

¹ Mardoqueotaj chay jina kamachiy llojsimusqanta yachaytawan, p'achasninta llik'ikuspa, qhashqa p'achasta churaykukuytawan, umanman ushphawan qhallaykukuspa, may llakiyta qhaparispa tukuy llajtata uj sonqo nanayta correykachasharqa.

² Jinata qhaparispa reypa palacion punkukama chayarqa; manataj aswan ukhukama yaykuta aterqachu, qhashqa llakiy p'achayoj kaspa mana yaykuna kasqanrayku.

³ Judiostaj tukuy llajtaspi reypa kamachisqanta yachaytawan maytapuni llakikorqanku. Chayrayku paykunaqa ayunarqanku, sonqo nanayta waqarqanku, qhashqa p'achasta churaykukorqanku, wakintaj ushpha pataspi puñorqanku.

Ester judiosta yanapan

⁴ Chaypacha reina Esterpa warmi kamachisninwan, chaypi qhawaj runawan jamuspa, imachus kasqanta Esterman willarqanku. Chaymanta reina Esterqa mayta llakikuspa, Mardoqueoman p'achasta apacherqa, chay qhashqa p'achanta orqhokunampaj, paytaj mana jap'ikuyta munarqachu.

⁵ Jina kajtintaj, Esterqa rey paypaj churaporqa chay kamachi Hatac runata wajyarqa. Kacharqataj Mardoqueota allinta tapumunanta imamantachus chay jina p'achasta churakusqanta.

⁶ Hatacqa llojsiytawan llajtaj plazampi Mardoqueowan parlamorqa. Chaytaj reypa palacion punkun chaynejpi kashan.

⁷ Mardoqueoqa imachus kasqanta sut'inta willarqa. Amanqa ashkha qolqeta qonanta nerqa, reypa cajanman apamunankupaj, sichus judiosta wañurachenqanku chayqa.

⁸ Chanta jaywallarqataj Susa llajtaman apachimusqa kaj papelpa copianta Esterman jaywanampaj, sut'inchanampajtaj, chanta reyman willanampaj, parlanampajtaj llajta masisnin judiosta ama wañuchinankuta, nispa.

⁹ Hatacqa chaymanta kutimuytawan Mardoqueoj tukuy nisqasninta Eserman willarqa.

¹⁰ Chaymanta Esterqa ujtawan Hatacta Mardoqueoman willamunampaj kacharqa:

¹¹ Reypa tukuynin kamachisnin, rey kamachishan chay llajtasmanta kajkunapis, kaytaqa yachanku. Pi qharichus chayri warmichus reypa ukhu pationman mana wajyachisqalla yaykojqa, reypa kamachisqanman jina wañunan tiyan. Pimanchus reyqa qorimanta ruwasqa tojnunta oqharin, chay kajlla mana wañuchisqachu kanqa. Noqaqa mana wajyachisqachu kani reypaman, kay kinsa chunka p'unchaytaña, nispa.

¹² Ajinata Esterpa nisqasninta Mardoqueoman willamorqanku.

¹³ Chanta Mardoqueotaj Esterman kay palabrasta nicherqa: Qanqa ama yuyaychu, reypa wasimpi kanaykirayku tukuy judíos ukhumanta qanlla mana wañunaykitaqa.

¹⁴ Sichus kunan kay jina kashajtin ch'inlla kanki chayqa, wajnejmanta judiospaj salvación jamonqa, qantaj tataykej familiasninwan wañurachisqas kankichej. Ichapis qanqa kay horaspajpuni reina kanaykipaj chayarqanki.

¹⁵ Esterqa ujtawan Mardoqueoman kutichillarqataj:

¹⁶ Qanqa mashkhachus Susa llajtapi judíos tarikunku chaykunata tantaykuy, noqaraykutaj ayunaychej kinsa diasta, tuta p'unchay ama mikhuychejchu, nitaj ujyaychejchu, noqapis kay kamachisniy sipaskunawan ayunallasqaykutaj; chaymantaraj reypaman yaykusaj, amapis leyman jinachu kachun. Wañunay kanqa chaypis wañusaj.

¹⁷ Chaypacha Mardoqueoqa Esterpa kamachisqanman jina ruwamorqa.