Ester (hebreo) 3 - Qheshwa Biblia DC

Mardoqueowan Amanwan

¹ Chaymanta qhepata rey Asueroqa Agagpa mirayninmanta Hamedataj wawan Amanta churarqa jatun Kamachej kanampaj, chay palaciopi tukuy kamachejkunatapis pay kamachinampaj.

² Palacio punkupi reypa kamachisnin tukuyninku k'umuykukuspa Amanman qonqorikorqanku, reypa kamachisqanman jina. Mardoqueotaj Amanman mana qonqorikorqanchu, nitaj allintapis kasuta ruwarqachu.

³ Reypa kamachisnin punkupi kasharqanku, Mardoqueota taporqanku: Imajtintaj qan reypa kamachisqanta mana kasunkichuri?, nispa.

⁴ Sapa kuti ajinata payta tapojtinku payqa manapuni kutichejchu, nitaj kasuta ruwajchu. Chayrayku Amanman willaykamorqanku, sapa kutichus jinallapuni kanqa manachus chayta rikunankupaj. Payqa judío kasqanta nisqaña.

⁵ Amanqa ajinata Mardoqueota ñaupaqempi mana qonqorikojta, nitaj k'umuykukojta rikuspa, maytapuni phiñarikorqa.

⁶ Chaywampis Amanqa mana Mardoqueollatachu wañuchiyta munarqa, manachayqa judío kasqanta yachaspa rey Asueroj kamachimpi kaj judiosnintinta, may llajtaspichá judíos tiyakunku chaynintinta wañurachiyta munarqa.

Amanqa judiosta chinkachiyta munan

⁷ Rey Asuero chunka iskayniyoj watastaña kamachishajtin, Nisán nisqapi ñaupaj kaj killapi Amanqa suerteta choqacherqa. Ajinamanta yachanankupaj ima p'unchaypichus, ima killapichus, ima ruway wakichisqankutapis ruwachinankupaj. Chay choqasqankupitaj llojserqa chunka iskayniyoj killapi, chaytaj Adar killa nisqa karqa, wataj tukuykuynin killa.

⁸ Chaymanta Amanqa rey Asueroman nerqa: Reyníy, uj ayllu kashan t'aka t'akalla maymantapachachus kamachishanki chay ukhupi, kamachisqasniykitapis mana kasushankuchu, paykunaj kamachiykunasninkoqa waj jinataj. Chaytaj qampajqa mana allinchu kashan jinata kausajta saqenaykeqa.

⁹ Reyníy, sichus kay nisusqay allin rijch'asunki chayqa, uj kamachiyta orqhoy chay runas chinkachisqas kanankupaj. Noqataj qolqeta waqaychajkunaman chunka waranqa talento nisqa qolqeta jaywasaj reypa qolqe jallch'ana cajanman apamusqa kanampaj.

^10-11 Chaymantataj reyqa sortejanta makinmanta orqhokuspa Amedataj wawan judiospa enemigon Amanman jaywarqa. Nerqataj: Qosaj ninki chay qolqeqa qampaj kachun. Chay ninki chay runastataj qanña munasqaykiman jina ruway imachus allin rijch'asunki chayta.

¹² Chaymantaqa ñaupaj kaj killapi chunka kinsayoj p'unchaypi, reypa tukuy qelqerisninta tantacherqa. Paykunaqa Amán imatachus sapa uj kurajkunaman kamachisqanta qelqarqanku, reypa kamachisninman, sapa llajtapi kuraj kaj kamachejkunaman, sapa llajtaj qelqayninman jina, parlayninkupikamataj. Chayta qelqarqanku reypa sutimpi, reypa sortejanwantaj ñit'iykuspa.

¹³ Chay qelqasqatataj chaskis kayman jaqayman tukuy llajtasman aparqanku. Chay papelespitaj nisharqa tukuy judiosta chinkachinankuta; wata tukukuy killapi chunka kuinsayoj p'unchay kashajtin uj p'unchayllapi wañurachinankuta: Wayna runasta, machu runasta, warmista, wawasta ima. Chaymanta, imasninkuchá tiyan chaykunata jap'ikapunankuta.

¹⁴ Chay kamachisqaspa ujnin kaj copiatataj sapa llajtapi sut'incharqanku, chayqa reymanta uj kamachiy jamusqanta, ima p'unchaypajchus nisqa kashan chay p'unchaypaj tukuyninku wakichisqa kanankupaj.

¹⁵ Chantapis, chaskisqa reypa kamachisqanman jina tukuynin llajtasman usqhayta apararqanku. Chay kamachiy ruwasqataj reypa tiyanan Susa llajtapi sut'inchakorqa. Susa llajtapi runastaj maytapuni qhollpikusharqanku chay imasta yachaspa. Chaykamataj reywan Amanwanqa tiyaykurispa ujyarisharqanku.