Ester (hebreo) 2 - Qheshwa Biblia DC

Esterta reinapaj ajllanku

¹ Chay qhepantataj rey Asueroqa, phiñakuynin thasnukojtin Vastimanta yuyarikorqa, mana allinta ruwasqanmanta, Vastej contranta uj kamachiyta orqhosqanmantawan.

² Chanta reymanqa yanapajkunasnin nerqanku: Qampajqa, reyníy, qharita manaraj rejsejkuna k'acha sipaskunata mask'achunku.

³ Chaypajtaj, maymantapachachus kamachishanki chay llajtaspi uj runata ajllaspa churay, pay chay llajtasmanta sumaj sipaskunata ajllaspa kay Susa llajtapi palacioykiman pusachimunampaj, maypichus warmispaj wasi kashan chayman. Chaypitaj reypa kamachin warmista waqaychaj Hegai qhawachun. Chaypitaj chay runaqa k'achanchakunapaj kaj imasta jaywachun.

⁴ Chaypitaj mayqen sipaschá reyman allin rijch'anqa chay kajtaj Vastej cuentanmanta reinanqa. Chayta nisqankutaj reypajqa sumaj allin karqa, kikintataj ruwarqa.

⁵ Reypa tiyakunan Susa llajtapi uj judío runa karqa. Payqa karqa Jairpa wawan Mardoqueo nisqa. Payqa karqa Cispa mirayninmantawan, Simeej mirayninmantawan. Chanta Jairpa mirayninmanta, Benjamín ayllumantawan karqa.

⁶ Chay ñaupajta Mardoqueotaqa Jerusalenman apachisqanku, ashkha runastawan, chanta Judá llajtaj reynin Jeconiastawan khuska. Paykunataqa Babiloniamanta rey Nabucodonosor apachimusqa.

⁷ Mardoqueoqa uj Hadasa sutiyojta uywakusqa. Chaytaj karqa tiompa wawan Ester nisqa. Payqa wajchita karqa tatasnin wañurapusqanrayku. Chanta chay sipasqa may sumaj k'achita sumaj qhawaykachayniyoj karqa. Payta Mardoqueoqa wawanta jina uywakusqa.

⁸ Maypachachus reypa kamachisqan tukuynej llajtasman llojserqa chaypacha, ashkha sipaskunata Susa llajtapi reypa palaciompi, warmispaj wasi kashan chayman tantaykukorqanku, maypichus Hegaeqa warmista waqaychaj chayman. Esterpis chayllamantaj pusasqa karqa.

⁹ Ester sipasqa mayta reywan munachikorqa, pay aswan munasqa kajtintaj, sumaj p'achaswan p'achallicherqanku, mikhunastapis sumajnin kajta qorqanku. Kamachisnin kanampajtaj reypa wasimpi kaj qanchis sipaskunata qorqanku. Reyqa Esterta, chay sipaskunatawan aswan sumachaj wasispi kaj cuartospi tiyacherqa.

¹⁰ Esterqa mana willakorqachu maymantachus kasqanta, nitaj ima ayllumantachus kasqantapis, Mardoqueo, ama chaymanta willakunanta kamachisqanrayku.

¹¹ Mardoqueoqa sapa p'unchay warmispa palacion punkusta puriykachamorqa, yachanampaj imaynachus Ester kashasqanta, imaynatatajchus payta qhawashasqankutawan.

¹² Chay sipaskunaqa chunka iskayniyoj killasta k'achanchakunanku karqa warmispaj kamachiy churasqa kasqanman jina, reypa ñaupaqenman ujtaj ujtaj rinankupaj. Sojta killa ukhupi mirra nisqa aceitewan tukuy ukhunkuta jawikunanku karqa. Sojta killapitaj waj sumaj q'apashaj jawinawan jawikunanku karqa, warmis jawikuyta yachanku ajinata. Chay jinata k'achanchakuyta yachaytawantaj, sapa uj sipas mit'ampi rinan karqa rey Asueroj ñaupaqenman rikuchikoj.

¹³ Chay sipaskunaqa warmispa palacionmanta rispa reyta watukamoj kanku, imatachá chay sipas mañakoj chaywan p'achallikuspa.

¹⁴ Chay sipasqa ch'isiyaykuyta reypa palacionman rej. Q'ayantin paqarintaj warmispa ujnin kaj palacionman rej. Paykunataqa waqaychaj reypa kamachin Saasgaz sutiyoj. Paytaj reypa warmisninta qhawaj. Payqa mana reymanqa rillajchu. Rey pitachus wajyamuy nejtillan payqa kasoj.

¹⁵ Mardoqueoj tion Abihailpa wawan Esterman, rinan chayamojtintaj Esterqa ni imata apakorqachu, reypa kamachin Hegai imatachus apakuy nerqa chaykunasllawan rerqa. Chaykama Esterqa tukuywanña mayta munachikorqa, payta rikoj kanku chaykunantinwan.

¹⁶ Esterqa rey Asueroj palacionman pusasqa karqa chunka killa kashajtin, Tebet nisqa killapi, qanchis watataña kamachishajtin.

¹⁷ Reyqa Esterta maytapuni munakorqa tukuynin warmismanta astawan. Ajinamanta, Esterqa reypa sonqonta astawan suwarqa tukuy sipaskunamanta nisqaqa. Chaypacha, reyqa Esterpa umanman uj pilluta churarqa Vastej cuentanmanta reina kanampaj.

¹⁸ Chaymanta, reyqa jatun mikhuykunata wayk'ucherqa Esterpa sutimpi, ajllasqa kurajkunasninman, kamachisninmanwan mikhuchinampaj. Impuestostataj chay kamachisharqa chay llajtasmanta pisiyacherqa. Chay reyqa atisqanta uj rey jina t'inkasta jaywararqa, may jina qhapaj k'acha kayninman jina.

Reypa contranta oqharikojkunata Mardoqueoqa willaykun

¹⁹ Chaypacha ujtawan chay sipaskuna tantasqas kashajtinku, Mardoqueoqa reypa palacion punkupi tiyasharqa.

²⁰ Esterqa, Mardoqueoj nisqanman jina, mana willakorqachu may nacionmantachus kasqanta, nitaj pi ayllumantachus kasqantapis. Chayrayku payqa Mardoqueoj nisqallanta kasorqa, juch'uymantapacha yachachisqa kasqanman jina.

²¹ Chaypacha reypa palacion punkupi Mardoqueo tiyashajtin, mayta phiñakorqanku reypa iskay kamachisnin Bigtanwan, Tereswan. Wakichikushasqankutaj rey Asuerota wañuchinankupaj. Paykunaqa palacio punkuta qhawajkuna karqanku.

²² Chay imasta yachaytawan Mardoqueoqa, reina Esterman willarqa. Estertaj Mardoqueoj sutimpi reyman willaykorqa.

²³ Reytaj chay imasta tapuchispa cheqatapuni kasqanta yachaytawan, iskaynin kamachista warkhuchispa sipirparicherqa. Chay imasta reypa ruwasqasnenqa, Crónicas nisqa reypa librompi qelqasqa kashan.