Esdras 7 - Qheshwa Biblia DC

Rey Artajerjesqa Esdrasta yanapan Jerusalenman rinampaj

¹ Chaymantataj Persiapi rey Artajerjes kamachishajtin, uj runa karqa Esdras sutiyoj. Payta Seraiaspa wawan karqa. Seraiastaj Azariaspa wawan. Azariastaj Hilciaspa wawan.

² Helcíastaj Salumpa wawan. Salumtaj Sadocpa wawan. Sadoctaj Ahitobpa wawan.

³ Ahitobtaj Amariaspa wawan. Amariastaj Azariaspa wawan. Azariastaj Meraiotpa wawan.

⁴ Meraiot-taj Zeraiaspa wawan. Zeraiastaj Uzej wawan. Uzitaj Buquej wawan.

⁵ Buquitaj Abisuajta wawan. Abisuataj Fineespa wawan. Fineestaj Eleazarpa wawan. Eleazartaj ñaupaj kaj sacerdote Aarompa wawan karqa.

^6-7 Kay Esdrasqa may umayoj yachachej karqa, Israelpa Señor Diosnin kamachiyta Moisesman qorqa chaymanta sumajta pay yacherqa. Señortaj paywan karqa yanapanampaj, chaynejta rey Artajerjesqa tukuy ima mañasqanta payman qorqa. Chay jinamanta Esdrasqa kutimporqa Babiloniamanta Jerusalenman. Paywantaj kutimporqanku ashkha israelitas. Chaykunamanta wakin karqanku sacerdotes, wakintaj levitas, takejkuna, punkuta qhawajkuna, wakintaj templopi sirvejkuna. Paykunaqa Babiloniamanta llojsimusqanku rey Artajerjes qanchis watataña kamachishajtin.

^8-9 Esdrasqa Diospa yanapayninwan Babiloniamanta llojsimorqa, ñaupaj killamanta uj p'unchay uraykusqampi, qanchis watataña Artejerjes kamachishajtin. Jerusalenmantaj chayamorqa, phishqa killamanta ñaupaj p'unchaypi chay kikin watapi.

¹⁰ Esdrastaj, sumajta unanchakorqa Señorpa kamachiyninta allintapuni yachaykuyta, chanta junt'aytataj. Chantapis israelitasman yachachiyta Señorpa kamachisqasninta yachachisqasnintawan.

¹¹ Kaytaj rey Artajerjespa cartanqa. Chaytaqa Esdrasman qorqa. Esdrastaj sacerdote karqa; chantapis sumaj yachayniyojtaj Israel Señor qorqa chay tukuy yachachisqasninmanta, kamachisqasninmantawan.

¹² Chay cartataj kay jina karqa: Reykunaspata kuraj reynin Artajerjesqa napaykun, janaj pachapi kaj Diospa yachachiyninmanta sumaj yachayniyoj sacerdote Esdrasta:

¹³ Noqa kamachini, reinoypi kashanku chay tukuy israelitasmanta qanwan khuska Jerusalenman ripuyta munajkunaqa ripullachunku, chanta sacerdotespis, jinallataj levitaspis.

¹⁴ Noqa reyqa, qanchis umachaj runasniywan ima qantaqa kachashasuyku yachamunaykipaj, Judapi, jinallataj Jerusalempipis imaynatachus junt'ashasqankuta Diospa kamachisqasninta, makiykipi jap'ishanki chayta.

¹⁵ Reyqa umachaj runasninwantaj, qolqeta, qoritawan, Jerusalempi tiyakoj Israelpa Diosninman, sonqonkumanta qoyta munanku, chaykunata qan apay.

¹⁶ Chantapis, Babilonia jallp'antinmanta qolqeta, qoritawan tantachispa apallankitaj. Jinallataj imastachus israelita runas, chanta sacerdotespis, Jerusalempi kaj Diosninkoj templompaj sonqonkumanta ofrendasta qonqanku chaytawan.

¹⁷ Chay qolqewantaj allinta unanchaspa rantinayki tiyan torillosta, carnerosta, corderosta, grano ofrendastawan, vino ofrendastawan, Jerusalempi kaj Diosniykichejpata altarnimpa patanman jaywanaykichejpaj.

¹⁸ Chay qolqemanta qorimantawan puchojwantaj, imaynapichus allin rijch'asunkichej qanman, hermanosniykimampis, Diosniykichejpa munayninman jinaqa, chayta ruwaychej,

¹⁹ Qanman qosqa kanku Diosniykichejpa templompi chay imastaqa, Jerusalempi kaj Diosman qampuni qoponki.

²⁰ Sichus waj imastawan Diosniykichejpa templompaj qoyta munawaj chayqa, reypa wasinmanta orqhoyta atinki.

²¹ Noqa, rey Artajerjes kaytaqa kamachini, Eufrates mayoj chimpampi kaj tukuynin qolqe waqaychajkunata kay jinata: Janaj pachapi kaj Diospa kamachiykunasnimpi sumaj yachayniyoj Esdras sacerdotemanqa, tukuy ima mañasqanta jaywankichejpuni:

²² Kinsa waranqa kinsa pachajniyoj kilo qolqeta, iskay chunka iskayniyoj waranqa kilo trigota, iskay waranqa iskay pachajniyoj litro vinota, iskay waranqa iskay pachajniyoj litro aceiteta ima. Kachitataj mashkhatachus mañasqanta qonkichej.

²³ Tukuy imata janaj pachapi kaj Diosqa templompaj, chay tukuytaqa usqhaytapuni qonkichej, ama ima jasut'ipis chayamunampaj reypa wawasninman, chanta reinonmampis.

²⁴ Yachanallaykichejtaj mana atikusqanta impuestota orqhoytaqa, sacerdotesmanta, levitasmanta, takejkunamanta, punku qhawajkunamanta, yanapajkunamanta, Diospa templompi sirvejkunamanta ima.

²⁵ Qantaj Esdras, Diosniyki yachayta qosunki chayman jinaqa, juecesta churay, kamachejkunatawan, Eufrates mayoj chimpampi kaj tukuy runasta cheqanchanankupaj, Diosniykej leyninta yachanku chaykunata. Manaraj yachankuchu chaykunamantaj yachachiy.

²⁶ Diosniykej kamachisqanta, chayri reypa kamachisqantapis mana junt'anqachu chay tukoyqa chay ratopacha juchachasqa kanan tiyan: Wañuchisqa kanqa, chayri wijch'usqa kanqa, chayri multata paganqa, chayri carcelman wisq'asqa kanqa.

Esdrasqa Diosta yupaychan

²⁷ Chaypacha Esdrasqa Diosta yupaycharqa kay jinata: Tatasniykojpata Diosnenqa Señornintaj yupaychasqa kachun, Pay churarqa reypa sonqompi Jerusalempi kaj Señorpa templonta jatunchanampaj.

²⁸ Paytaj rikhuchiwarqa k'acha kayninta reypa ñaupaqempi, umachajkunasnimpa ñaupaqenkupi, chanta reinompi kuraj runaspa ñaupaqenkupitaj. Dios sonqochawarqa. Paypa yanapayninwan tantaykuyta aterqani, Israelpa kuraj runasninta, noqawan khuska kutimpunankupaj, nispa.