Esdras 6 - Qheshwa Biblia DC

¹ Rey Darioqa chaypacha kamacherqa chayta mask'anankuta Babiloniapi, maypichus librosta waqaychaj kanku chaypi.

² Uj libro tarisqa karqa Media sutiyoj jallp'api, Ecbatana llajtaj palaciompi, chaypitaj kay jina qelqasqa kasharqa: Kaytaqa tukuy yachananku tiyan:

³ Persianmanta kaj rey Ciroqa, uj watataña kamachishaspa kay jinata kamacherqa: Jerusalempi kaj Diospa templonqa qallarikuchun, ruwasqataj kachun, chaypi uywasta wañuchispa Diosman jaywanapaj. Chay waseqa pataman kanqa, iskay chunka qanchisniyoj metros, anchonmantaj iskay chunka qanchisniyoj metrosllataj.

⁴ Perqanqa kachun kinsa sinru jatuchaj ch'eqosqa rumismanta, ujnin sinrutaj mosoj tablamanta kachun. Chaykuna ruwakunampajqa rey paganqa.

⁵ Qorimanta, qolqemanta ruwasqa imasta Jerusalempi kaj Diospa templonmanta rey Nabucodonosor orqhospa Babiloniaman aparqa. Chay imastaj Jerusalenman kutichisqas kachunku. Chaypitaj Diospa templompi maypichus kaj chaj kikinman churasqas kanqanku, nispa.

^6-7 Chayrayku rey Darío kamacherqa kay jinata: Eufrates mayu chimpapi kamachej Tetnaí, chanta Setar-boznai, kamachej masisniykichejtawan ima, Jerusalenmanta llojsiychej, saqeychejtaj, judíospa kamachejnin, kurajkunasninku ima, Diospa templonta maypichus kanampi ruwanankuta,

⁸ Kay kamachiykunata qoni judiospa kuraj runasninkuta yanapanaykichejpaj, Diospa templonta mosojmanta ruwachinankupaj: Eufrates mayu chimpamanta reypaj qonku, chay qolqemanta orqhospa gastosta chay runasman pagachunkupuni, ajinamanta ruwanasqa ama sayanampaj.

⁹ Sapa p'unchay paykunaman entregasqapuni kachun Jerusalempi kaj sacerdotespa nisqankuman jina, imastachá mañanqanku chay tukuyta: Torillustachus, carnerostachus, corderostachus, janaj pachapi kaj Diosman jaywaspa ruphachinankupaj; manachayqa, trigotachus, kachitachus, vinotachus, aceitetachus.

¹⁰ Ajinamanta chay imasta k'acha q'apashajta janaj pachapi kaj Diosman jaywanankupaj, chantapis reypa wawasnimpaj ima Diosmanta mañapunankupaj.

¹¹ Kamachillanitaj, pillapis kay kamachisqayta mana kasojtaqa, kikin wasinmanta uj k'aspita sik'ispa, chay k'aspipi t'ejsisqa warkhurayachun. Wasintaj thuñisqa kachun, uj montonman tukusqataj qhepakuchun.

¹² Mayqen reychus, chayri llajtachus, Jerusalempi kashan chay temploj contrampi mana allinta ruwayta munajtaqa, tiyakunampaj Jerusalenta ajllakoj Dios t'unaykuchun! Noqa Darío kaytaqa kamachini. Kay nisqayqa kikimpuni junt'akuchun, nispa.

Ruwallarqankupuni tukuychanankukama

¹³ Chaypacha, Eufrates mayu chimpapi kamachej Tatnai, chanta Setar-boznaiwan, kamachej masisninwantaj, rey Daríoj kamachisqantaqa kikintapuni junt'arqanku.

¹⁴ Ajinamanta, judiokunata kamachejkunaqa, mosojmanta ruwasharqanku chay templota ruwallarqankupuni, profeta Hageoj nisqanman jina, chanta, Idompa wawan Zacarías profetaj nisqanman jinataj. Mosoj temploqa tukuychasqa karqa Israelpa Diosnin kamacherqa chayman jina. Chantapis, Persiamanta reykuna: Ciro, Darío, Artajerjes ima kamachisqankuman jinataj.

¹⁵ Kay temploqa tukuychasqa karqa, Adar nisqa killamanta kinsa p'unchay uraykusqanman, Persiapi, rey Darío sojta watataña kamachishajtin.

¹⁶ Chaypachaqa, israelitakuna, sacerdotekuna, levitakuna, chanta wajkunawantaj, jap'isqa kasqankumanta kutimporqanku chaykunaqa, may kusiywan Diospa templontaqa payman qoporqanku.

¹⁷ Chaypacha jaywarqanku Diosman, pachaj torillosta, iskay pachaj carnerosta, tawa pachaj malto corderostataj. Chantapis chunka iskayniyoj chivosta jaywallarqankutaj, tukuynin israelitaspa juchasninkumanta, mashkha aylluchus kasqankuman jina.

¹⁸ Chaymanta sacerdotestaqa mit'ankuman churararqanku. Jinallataj levitastapis sapa ujta ruwanasninkuman, Jerusalempi ruwanasta Diospaj ruwanankupaj, Moisespa librompi qelqasqaman jina.

¹⁹ Jap'isqamanta kutimpojkunaqa, Pascua fiestata ruwarqanku, ñaupaj kaj killamanta chunka tawayoj p'unchaypi.

²⁰ Sacerdotes, chanta, levitas imaqa llimphuchakusqankuña. Ajinamanta tukuyninku llimphusña karqanku. Chaymanta Pascuapi jaywana kajta jaywarqanku, jap'isqamanta kutimporqanku chay tukuyninrayku, sacerdotesninkurayku, jinallataj paykuna kikinkuraykupis.

²¹ Tukuynin israelitas, jap'isqamanta kutimporqanku chaykunaqa mikhorqanku Pascuapi wakichisqa mikhuyta. Chay jallp'amanta wakin runas millay kausayninkumanta t'aqakorqanku, Israelpa Señor Diosninkuta yupaychayta munaspa, chaykunapis israelitaswan khuska mikhullarqankutaj.

²² Qanchis p'unchay junt'aqa mana levadurayoj t'anta nisqa fiestata may kusiywan ruwarqanku, imaraykuchus Señor paykunata kusicherqa, Persiapi kaj reypa sonqonta paykunaman kutirichimuspa, yanapananampajtaj Diospa templonta ruwaypi. Chay Diosqa, Israelpa Diosnin.