Esdras 5 - Qheshwa Biblia DC

Templota watejmanta ruwanku

¹ Profeta Hageo, chanta Idompa wawan Zacarías profetawanqa willarqanku, Judapi, jinallataj Jerusalempi tiyakoj judiokunaman, Israelta waqaychaj Señor Diosnimpa sutimpi.

² Chaypacha Salatielpa wawan Zorobabel, Josadacpa wawan Josuetaj watejmanta Jerusalempi kaj Diospa templonta ruwayta qallarerqanku. Diospa profetasnintaj paykunata umachaspa kallpachasharqanku.

^3-4 Chaypacha Eufrates mayu chimpapi kamachej Tatnai, chanta, Setar-boznaiwan, kamachej masisninwan ima rispa, paykunata tapumorqanku: Pitaj kamachisunkichej kay templota watejmanta ruwanaykichejtarí, chanta, kay perqatapis sayarichinaykichejta? Ima sutisniyojtaj kanku kay wasita watejmanta ruwachishanku chaykunarí?, nispa.

⁵ Astawanqa judiosta kamachejkunata Diosqa qhawasharqa. Chayrayku mana jark'arqankuchu, Darioman willanankukama, kutichispa apachimusqanta jap'inankukamataj.

⁶ Rey Darioman uj cartata apachimorqanku, Eufrates mayu chimpapi kamachej Tatnai, Setar-boznaiwan, chanta kamachej masisninkuwan ima.

^7-8 Chay cartapitaj nerqanku: Rey Darío, qanta napaykamuyku, walejlla kanaykita munaspa. Kayta willamuyku qanman: Judá jallp'asta watumuyku, jatun Diospa wasintapis riyku. Chay waseqa mosojmanta ruwakushan, jatuchaj sumaj ch'eqosqa rumiswan. Kunanqa perqasman tablasta churaykushankuña. May usqhayta ruwarqoshanku. Chay ruwayninkoqa ñaupajmampuni rishan.

⁹ Judiospa kuraj runasninkuta tapuriyku: Pitaj kamachisunkichej mosojmanta templota ruwanaykichejpaj, kay perqastapis muyuykuchinaykichejkamarí?, nispa.

¹⁰ Chantapis tapurillaykutaj, ima sutiyojchus kasqankuta chay ruwachejkuna, sutisninkuta qelqaspa qan reyniykuman apachimunaykupaj.

¹¹ Paykunataj niwarqayku: Noqaykoqa yupaychayku, janaj pachapi jinallataj kay pachapipis kashan chay Diosta. Chantapis nillawaykutaj: Mosojmanta ruwashayku chay temploqa, unay ñaupa tiempospi uj kuti ruwasqaña kasqanta, tukuychasqañataj, Israelmanta uj jatun reynejta.

¹² Nillawarqaykutaj: Tatasniyku chay qhepata janaj pachapi kaj Diosta phiñachisqanku, chayrayku paykunata Dios apachisqa, Babiloniapi kaj rey Nabucodonosorpaman, paytaj caldeo karqa, chay templotataj urmachisqa, israelita runastataj Babiloniaman apachisqa.

¹³ Chay qhepata Ciroqa, uj wataña Babiloniapi rey kashaspa, kamachisqa Diospa templon mosojmanta ruwakunanta.

¹⁴ Nillawarqaykutaj: Rey Nabucodonosorqa, Jerusalempi kaj Diospa wasinmanta qori imasta, qolqe imastawan orqhospa, Babiloniapi kaj templonman churachisqa. Chay qhepatataj rey Ciroqa, chay qori imasta, qolqe imastawan Babiloniapi kaj templomanta orqhochimuspa, qosqa Sesbasar sutiyoj kamachejman.

¹⁵ Payta nisqataj: Kay qori imasta qolqe imastawan Jerusalempi kaj temploman apay. Diospa templontaj, maypichus ñaupajta karqa, chay kikimpi ruwasqa kachun.

¹⁶ Ajinamanta Sesbasar chayamorqa, Jerusalempi Diospa templonta qallaricherqataj. Chaymantapacha temploqa mosojmanta ruwakushan, manataj tukuchasqarajchu kashan.

¹⁷ Kunantaj reyniyku, sichus allin rijch'asunkiman chayqa, mañakuyku Babiloniapi reykunaj archivosninkupi mask'asqa kananta, tapuykachasqataj kananta, cheqatapunichus manachus rey Ciroqa kamachisqanta, Jerusalempi Diospa templon mosojmanta ruwakunanta. Chanta willamuwayku reyniyku imaynatachus ninki kay imasmanta chayta, nispa.