Esdras 4 - Qheshwa Biblia DC

Chejnejkuna ruwanasta saqechinku

¹ Judata, Benjamintawan chejnejkunaqa yacharqanku, preso jap'isqamanta kutimojkuna, Israelpata Señor Diosnimpa templonta watejmanta ruwashasqankuta.

² Chayrayku rerqanku parlaj Zorobabelwan, Josuewan, chanta aylluspa kuraj runasninkuwan ima, nerqankutaj: Noqayku kay templota ruwaysisqayku. Noqaykupis qankuna jina Diosniykichejman qayllaykullaykutaj. Chanta, Esar-hadón, Asiriapi rey kashajtin kayman pusamuwarqayku. Chay tiempomantapacha Diosman uywasta wañuchispa jaywashayku.

³ Zorobabel, Josué, chanta, wakin Israel aylluspa kuraj runasninku imataj kuticherqanku: Mana qankunawanqa Diosniykoj templonta ruwaykumanchu. Noqallayku ruwanayku tiyan Israelpa Señor Diosnimpa templontaqa. Ajinata kamachiwarqayku Persiapi kaj rey Ciroqa.

⁴ Chaymanta chay jallp'api tiyakoj runasqa, Judamanta kaj runasta iskayrayacherqanku, manchacherqankutaj, templotaqa ama ruwanankupaj.

⁵ Aswampis wakin kurajkunaman qolqeta lluk'iykorqanku. Kaykunataj templo ruwakunanta jark'arqanku, Persiapi rey Ciro kamachisharqa chay tukuy tiempopi, rey Darío, Persiapi kamachej yaykunankama.

⁶ Asuero kamachiyta qallarishajtintaj chay contrallejkunaqa, Judapi tiyakojkunaj contrampi, chanta, Jerusalempi tiyakojkunaj contrampitaj uj qelqasqawan ch'ataykorqanku.

⁷ Persiapi Artajerjes rey kashajtin, Bilsam, Mitridates, Tabeel, chanta, ujkuna kamachej masisninwan ima, Artajerjesman qelqarqanku. Chay cartataj arameo parlaypi qelqasqa karqa, chay qalluman orqhosqataj.

⁸ Rehum kamachejwan, Simsay qelqaj runawan uj cartata qelqallarqankutaj rey Artajerjesman, Jerusalempi tiyakojkunaj contrampi.

⁹ Chay qelqajkunataj kaykuna karqanku: Kamachej Rehum, qelqaj Simsai, kuraj masisninku jueces, chanta kamachejkuna, Persiapi kaj kurajkuna ima, Erecmanta, Babiloniamanta, Susamantawan kaj runas. Paykunaqa Elammanta karqanku.

¹⁰ Chantapis waj nacionesmanta kajkunawan. Tukuy paykunata, jatun kamachej Asnaparqa jap'irachispa apacherqa, Samaria jallp'asmantaj churarqa, Eufrates mayoj inti yaykuyninman.

¹¹ Chay qelqamusqanku cartaqa, kay jinata nerqa: Artajerjes reyniyku, Eufrates mayoj inti yaykuynimpi tiyakoj kamachisniyki napaykamusunku:

¹² Reyniyku, qanman willamuyku, qampamanta jamuwarqayku chay judiokunaqa, Jerusalenman chayamuspa, watejmanta sayarichishanku kay mana kasukoj sajra llajtata. Perqasta oqhariyta qallarikunña, cimientostaqa churaykunkuña.

¹³ Willamullasuykutaj reyniyku, kay llajtachus watejmanta ruwasqa kanqa, perqasnintaj watejmanta sayarichisqa kanqa chaypachaqa, chay runas mana pagayta munanqankuchu tasasta, impuestosta, ni ñan pichaypajpis qonqankuchu. Ajinamanta reypajqa qolqe pisiyanqaña.

^14-15 Noqayku qan reyniykuta sirvishayku, chayrayku noqaykoqa, rey kayniyki qhesachasqa kananta mana munaykuchu. Chaynejta qan reyniykuman kayta willamuyku, mask'achinaykipaj ñaupa tatasniykej librosninkupi. Reyniyku, chaypi tarinki, yachankitaj, kay llajtaqa mana kasukoj kasqanta, reykunapajpis mana allimpuni kasqanta, jinallataj waj provinciaspi kaj runaspajpis mana allimpuni kasqanta. Ñaupa tiempospi runasqa, kay llajtapi tantaykukuspa parlanakusqanku mana kasukunankupaj, chayrayku kay llajtaqa t'unaykusqa kasqa.

¹⁶ Reyniyku, qanman willamuyku, sichus kay llajta watejmanta ruwakonqa, perqasnintaj sayarichisqa kanqa chayqa, manaña kamachiyta atinkichu, Eufrates mayoj inti yaykuynimpi kaj llajtaspi, nispa.

¹⁷ Chaypacha rey Artajerjesqa, kutichispa qelqarqa kay jinata: Rahum kamachej, Simsai qelqaj, chanta, Samariapi tiyakunku chay wakin kamachej masisniykita, jinallataj Eufrates mayoj inti yaykuynimpi tiyakojkunatapis, napaykamuykichej.

¹⁸ Carta apachimuwasqaykichejqa ñaupaqeypi sut'ita leekorqa.

¹⁹ Kamacherqani archivo libropi mask'akunanta niwasqaykichejta. Cheqamanta tarisqa karqa, chay llajtaqa ñaupa tiempopi reykunaj contrampi sayarisqanku, paykunawan churanakunankupaj ch'ajwa ruwanankupajtaj wakichikusqanku.

²⁰ Jerusalempi atiyniyoj reykuna kasqanku. Chaykunataj Eufrates mayoj inti yaykuynejpi kaj llajtasta kamachisqanku. Paykunamantaj pagaj kasqanku impuestosta, tasasta, ñan pichaypaj ima.

²¹ Kunanmanta chay runakunata kamachiychej. Paykuna chay ruwanasninkuta saqechunku. Chay llajtata ama watejmanta ruwachunkuchu, noqamanta kamachi llojsimunankama.

²² Kaytaqa allintapuni qhawaychej, ama astawan mana allin imas yapakunampaj reykunaj contrampi, nispa.

²³ Maypachachus rey Artajerjespa cartan leekorqa, Rehumpa ñaupaqempi, qelqaj Simsaejpa, chanta, kamachej masisnimpa ñaupaqempi ima, chay ratopacha tukuyninku Jerusalemman rerqanku, maypichus judiokuna kasharqanku chayman, may atiywan, armaswantaj chay ruwanasninkuta saqecherqanku.

²⁴ Ajinamanta, Jerusalempi Diospa templonta ruwanankuta saqecherqanku, Persiapi rey Darío iskay watata kamachinankama.