Esdras 3 - Qheshwa Biblia DC

Watejmanta ruphachinasta jaywayta qallarerqanku

¹ Qanchis kaj killapi, israelitasqa, sapa ujpis llajtankupi tiyakusqantawan, Jerusalempi tukuyninku tantakorqanku uj runa jinalla.

² Chaypacha Josadacpa wawan Josué, chanta sacerdote masisnin, jinallataj Salatielpa wawan Zorobabel, chanta ayllu masisnin ima, Israelpata Diosnimpa altarninta ruwarqanku, chay patapi uywasta wañuchispa ruphachinankupaj, Diospa runan Moisespa leynimpi qelqasqanman jina.

³ Chay jallp'aspi kaj runakunata manchachikushaspapis, altartaqa ruwarqanku, maypischus ñaupajta ruwasqa karqa chayllapitaj. Chay patapitaj ruphacherqanku uywasta wañuchispa.

⁴ Ramada jatun fiestatapis ruwarqanku qelqasqaman jina. Sapa p'unchaytaj uywasta wañuchispa ruphacherqanku yachasqa kasqanman jina, sapa imata p'unchaynimpi.

⁵ Chaymanta aswanqa qollarqankupuni sapa p'unchay ruphachina kajta, jinataj mosoj killapi ruphachina kajta, ajinallataj Señorpaj t'aqasqa p'unchaypi ruphachina kajtapis. Chanta munayninman jina ofrendasninkuta qoj kanku chaykunatawan.

⁶ Manarajpis Señorpa templonta watejmanta ruwayta qallarerqankuchu. Chaywampis qanchis kaj killapi ñaupaj p'unchaymantapacha, Señorman jaywana kajta ruphachiyta qallarerqankuña.

⁷ Chanta ruwanankupaj qolqeta qorqanku, wasita ruwanampaj rumi ch'eqojkunaman, carpinterosman ima. Chanta, Tiromanta kajkunaman, Sidonmanta kajkunamampis, mikhunasta, ujyanasta, aceitetawan qollarqankutaj, cedro k'aspita qochanejta apamunankupaj Libanomanta Jopekama, Persiapi kaj rey Ciroj munayninman jina.

Watejmanta templota ruwayta qallarinku

⁸ Jerusalempi Diospa wasinman chayamusqankumanta, iskay watamanta iskay kaj killapi, Salatielpa wawan Zorobabel, Josadacpa wawan Josuetaj, sacerdote masisninwan, levitaswan ima karqanku. Chaykunawan khuska, chanta pikunachus jap'isqamanta kutimporqanku Jerusalenman, chaykuna Diospa templonta watejmanta ruwayta qallarerqanku. Chayta ruwachinapajqa ajllarqanku, iskay chunka wata kurajniyoj levitasta.

⁹ Josué, wawasninwan, wauqesninwantaj, chanta Judá ayllumanta Cadmiel, wawasninwan, Henadadpa wawasninwan, levita masisninwan ima, uj runa jinalla karqanku. Paykunataj Diospa templonta ruwachinankupaj ajllasqas karqanku.

¹⁰ Maypachachus albañiles Señorpa templonta ruwayta qallarerqanku chaypacha, sacerdotes sayarikorqanku linomanta p'achasninwan p'achallisqas, pututusniyojtaj. Asafpa wawasnin levitastaj platillosniyoj karqanku, Señorta yupaychanankupaj, Israelpi kaj rey Davidpa yachachisqanman jina.

¹¹ Ujkuna alabanzasta takerqanku, wajkunataj yupaycharqanku Señorman graciasta qospa kay jinata: Payqa may k'achapuni, Israeltaqa wiñaypaj munakun. Runasqa llajtantin kusiywanqa qhaparerqanku, yupaycharqankutaj Señorta, paypa templonta watejmanta ruwayta qallarishajta rikusqankurayku.

¹² Ashkha sacerdotes, levitas, chanta familiaspa tatasninkutaj machusña karqanku. Paykunaqa ñaupa templota rejserqanku, chayrayku jatunmanta qhaparispa waqarqanku, Señorpa templonta mosojmanta ruwakushajta rikuspa. Wakintaj kusiywan qhaparisharqanku.

¹³ Mana pipis yachayta aterqachu, kusiywanchus, chayri llakiywanchus qhaparishasqankuta, imaraykuchus karumantapacha runa ch'ajwajqa uyarikorqa.