Esdras 10 - Qheshwa Biblia DC

Waj llajtayoj warmista wijch'unku

¹ Diosta yupaychana wasin punkumpi, Esdras qonqoriykukuspa mañakushajtin, waqaspa juchasninta willakushajtintaj, israelitasmanta ashkha ukhu, qharis warmis ima waqarallarqankutaj jik'un jik'unta, qayllanman muyuykamuspa.

² Chaypacha Jehielpa wawan Secanías, Elampa mirayninmanta ima, Esdrasman parlarqa, nerqataj: Noqaykoqa Diosninchejpa contrampi juchalliyku, imaraykuchus lantista yupaychaj waj llajtasmanta kaj warmiswan casarayku. Chay tukuywampis Israelpajqa suyariy kanraj.

³ Tratota ruwasqayku waj llajtamanta kaj warmismanta wawasninkumanta t'aqakunankuta maychus leypa nisqan junt'akunampaj; imaynatachus qan, chanta pikunachus Señorpa kamachisqanta kasunku chaykuna yuyaychawarqanku chayman jina.

⁴ Sayarikuy, qan ruwanayki tiyan. Noqaykutaj qanwan kasqayku. Umachakuy, qallariypachataj ruwayta, nispa.

⁵ Chaymantaj Esdras sayarerqa, sumajta juramentota ruwacherqa, sacerdotespa kurajninkuta, jinallataj levitaspa kurajninkuta, tukuynin israelitaspa kurajkunasninkutapis trato ruwasqankuta junt'anankupaj. Paykunataj nerqanku junt'anankuta.

⁶ Chaymanta Esdrasqa Diosta yupaychana wasimanta riporqa Eliasibpa wawan Johanampa wasinman rinampaj. Chaypitaj mana imata mikhuspa, nitaj imatapis ujyaspa tutantin karqa, may phutisqataj kasharqa presochasqasmanta kutirimojkuna juchallisqankumanta.

⁷ Chay qhepata tukuynin wajyachisqas karqanku Judapi kajkuna Jerusalempi kajkuna ima, tukuyninku Jerusalempi tantakunankupaj, pikunachus presochasqasmanta kutirimorqanku chaykuna.

⁸ Sichus paykuna kinsa p'unchay junt'api mana chayamunkumanchu, kurajkunaj nisqankuman jina, chanta yuyaychajkunaj nisqankuman jinataj, jallp'ankutapis qhechuchikuspa chaykunaqa presochasqas kutirimojkuna ukhumanta wijch'usqas kanqanku.

⁹ Chayrayku Judamanta kajkuna, Benjaminmanta kajkunapis Jerusalempi tantakorqanku kinsa kaj p'unchaypi isq'on killamanta iskay chunka p'unchaypi. Diosta yupaychana wasej plazampi tukuyninku tiyarakorqanku, kharkatitispa imatachus parlanankumanta, manchayta paramusqanmantawan.

¹⁰ Chaypacha sacerdote Esdrasqa sayarerqa, nerqataj: Qankunapis juchallerqankichej waj llajtayoj warmiswan casaraspa, ajinamanta Israelpa juchanman yapakuspa.

¹¹ Chayrayku tatasniykichejpa Señor Diosnimpa ñaupaqempi qankunaqa juchayoj kasqaykichejta reparakuychej, Señorpa munaynintataj junt'aychej. T'aqakuychej Diosta mana kasojkuna runakunamanta, jinataj waj llajtayoj warmismantapis, nispa.

¹² Tukuynin runastaj jatunmanta qhaparispa kuticherqanku: Arí, imatachá qan kamachiwasqayku chayta ruwasqayku.

¹³ Ashkhamin kayku, manchay parataj kashan. Chantapis mana callepi qhepakuykumanchu. May jatunña kayqa, mana uj p'unchayllapajchu, nitaj iskay p'unchayllapajchu, imaraykuchus ashkha kayku kay juchata ruwajkunaqa.

¹⁴ Aswan allin kanman kurajkunasniyku qhepakunankoqa cuentaykumanta. Tukuy pikunachus llajtasniykupi tiyakunku, waj llajtayoj warmiswantaj casararqanku chaykunaqa uj señalasqa p'unchaypaj, llajtaykupi kamachejkunawan jamuchunku juezkunasninkuwan khuska. Kay jinamanta Diospa k'ajaj phiñakuynin noqaykumanta t'aqakonqa.

¹⁵ Asaelpa wawan Jonatanlla, Ticvaj wawan Jahaziaswan mana munarqankuchu. Paykunata yanapajkunataj karqanku Mesulam, chanta Sabetai levitawan.

¹⁶ Jap'isqamanta kutirimojkuna, chanta Esdras sacerdoteqa chay jinata ruwaykunapaj tukuy sonqos karqanku. Ajllarqa, churarqataj pay kikinmanta wakin runakunata familiankumanta kurajkuna karqanku chaykunata. Chunka kaj killamanta ñaupaj kaj p'unchaypi sutisninkuman jina tantakuspa parlarqanku sapa ujmanta sut'ita yachanankupaj.

¹⁷ Ñaupaj p'unchaypi, ñaupaj killapi parlayta tukorqanku waj llajtayoj warmiswan casarasqanku chay runasmanta.

¹⁸ Waj llajtayoj warmiswan casarasqanku chay sacerdotesta tarerqanku, kaykunataj karqanku: Josadacpa wawan Josuejpa mirayninmantawan wauqesninmantawan karqanku kaykuna: Maazías, Eliezer, Jarib, Gedalías ima.

¹⁹ Paykunaqa warminkuta kacharpayapunankuta nerqanku, uj carnerotataj juchankumanta qorqanku.

²⁰ Imerpa mirayninmanta karqanku: Ananiwan Zebadiaswan.

²¹ Harimpa mirayninmanta karqanku: Maasías, Elías, Semaías, Jehiel, Uzías ima.

²² Pasurpa mirayninmanta karqanku: Elioenai, Maasías, Ismael, Natanael, Jozabad, Elasa ima.

²³ Levitaspa mirayninmanta karqanku: Jozabad, Simei, Kelaía, [kayqa Kelita], Petaías, Judá, Eliezer ima.

²⁴ Takejkunamanta karqa Elizsib. Punkuta qhawajkunamanta karqanku: Salum, Telem, Uri ima.

²⁵ Israelitasmanta Parospa mirayninmanta karqanku: Ramía, Jezías, Malquías, Mijamín, Eleazar, Malquías, Benaía ima.

²⁶ Elampa mirayninmanta kajkuna: Matanías, Zacarías, Jehiel, Abdi, Jeremot, Elías ima.

²⁷ Zatuj mirayninmanta karqanku: Elioenai, Eliasib, Matanías, Jeremot, Zabad, Aziza ima.

²⁸ Bebaejpa mirayninmanta karqanku: Johanán, Hananías, Zabai, Atlai ima.

²⁹ Banej mirayninmanta karqanku: Mesulam, Maluc, Adaía, Jasub, Seal, Ramot ima.

³⁰ Pahat-moabpa mirayninmanta karqanku: Adna, Quedal, Benaía, Maasías, Matanías, Bezaleel, Binuy, Manasés ima.

³¹ Harimpa mirayninmanta karqanku: Eliezer, Isías, Malquías, Semaías, Simeón,

³² Benjamín, Maluc, Semarías ima.

³³ Hasumpa mirayninmanta karqanku: Matenai, Matata, Zabad, Elifelet, Jeremai, Manasés, Simei ima.

³⁴ Banej mirayninmanta karqanku: Madai, Amram, Uel,

³⁵ Benaía, Bedías, Queluhi,

³⁶ Vanías, Meremot, Eliasib,

³⁷ Matanías, Matenai, Jaasai ima.

³⁸ Binuypa mirayninmanta karqanku: Simei

³⁹ Selemías, Natán, Adaía,

⁴⁰ Macnadebai, Sasai, Sarai,

⁴¹ Azareel, Selemías, Semarías,

⁴² Salum, Amaraís, José ima.

⁴³ Neboj mirayninmanta karqanku: Jeiel, Matatías, Zabad, Zebina, Jadau, Joel, Benaía ima.

⁴⁴ Kay tukuyninku waj llajtayoj warmiswan casarasqanku. Chay warmisninkutataj wawasninkutawan kacharpayarqanku.