Esdras 1 - Qheshwa Biblia DC

Rey Ciroj kamachisqan

¹ Persiamanta kaj rey Ciro uj watataña kamachishajtin, Señorpa parlasqan, Jeremiaspa siminnejta junt'anampaj, Señorqa rey Ciroman umallicherqa. Tukuynin reinompi kajkunaman willaracherqa, parlaypi, qelqasqapiwan kay kamachisqata:

² Persiamanta rey Ciroqa kay jinata nin: Janaj pachapi kaj Señor Diosqa, tukuynin jallp'api reinosta qopuwan, kamachiwantaj Judapi kaj Jerusalén llajtapi paypaj uj wasita ruwapunayta.

³ Diosqa kachun, pikunachus paypa ayllunmanta kankichej chay tukuywan. Judapi kaj Jerusalenman wicharichun, Israelpata Señor Diosnimpa wasinta ruwamoj. Paymin Jerusalempi tiyakoj Diosqa.

⁴ May llajtaspichá israelitas kausashankuraj, chay llajtayoj runasqa, israelita runasta yanapachunku ripunankupaj qolqewan, qoriwan, imaschus tiyapuyninkuwan, uywasninkuwan ima. Chantapis ofrendasninkuta qochunku atisqankuman jina Diospa templompaj, chaytaj Jerusalempi kashan.

Israelitas Jerusalenman kutimpunku

⁵ Chaypacha Judá ayllumanta, Benjamín ayllumantawan kuraj runas wakichikorqanku Jerusalenman rinankupaj, Señorpa wasinta ruwamunankupaj. Jinallatataj wakichikorqanku sacerdotes, levitas, chantapis pikunatachá Dios umacharqa chaykuna ima.

⁶ Jinataj tukuy qayllankupi tiyakojkuna paykunata yanaparqanku qolqewan, qoriwan, kapuyninkuwan, uywasninkuwan, ashkha valorniyoj imaswantaj; chantapis tukuy laya ofrendasninkuwan atisqankuman jina.

⁷ Rey Cirotaj, orqhochimorqa Señorpa templompi karqanku chay imasta. Chaykunataqa, Nabucodonosor Jerusalenmanta apachispa dioskunasnimpa templonman churachisqa.

⁸ Persiamanta rey Cirotaj chay imasta kutichiporqa tesorero Metridatesnejta. Paytaj yupaykuytawan, Judapi kamachej Sesbasarman jaywarqa.

^9-10 Chay yupasqastaj kaykuna karqanku: Kinsa chunka jatuchej qori vasos, waranqa jatuchaj qolqe vasos, iskay chunka isq'onniyoj cuchilloswan, kinsa chunka qori vasos, tawa pachaj chunkayoj qolqe vasos, waranqa waj imaswan.

¹¹ Tukuy chay qolqemanta qorimantataj kaj imasqa yupakorqa, phishqa waranqa tawa pachajniyoj. Tukuy kay imasta Sesbasarqa watejmanta aparqa Jerusalenman, Babiloniamanta kutipushaspa, presochasqas karqanku chay runaswan khuska.