Efesios 6 - Qheshwa Biblia DC

¹ Wawas, Señorpa sutimpi tata mamasniykichejta kasuychej, imaraykuchus kayqa cheqamin.

^2-3 Kaymin Diospa ñaupaj kaj kamachiynenqa maypichus uj promesa tiyan: Tataykita mamaykitawan allimpi qhawanki, allin risunampaj, kay jallp'a patapi unayta kausakunaykipaj.

⁴ Tata mamas, qankunaqa ama wawasniykichejta phiñachiychejchu, manachayqa allinta yachachispa, kasuchikuychej, Señorpa k'amiynimpitaj uywaychej.

⁵ Kamachis, kay jallp'a patapi uywaqesniykichejta kasuychej, manchachikuywan, kharkatitiywantaj llamp'u sonqolla, Cristota jina.

⁶ Ama paykunaj qhawaynillankupeqa sirviychejchu, imaynatachus wakenqa runaj rikunallanta ruwanku allin qhawasqa kayta munaspa ajinaqa. Manachayqa Cristoj kamachisnin jina, tukuy sonqowan Diospa munayninta ruwaychej.

⁷ Tukuy sonqo kasuychej Señorta jina, ama runakunata jinallachu.

⁸ Yachankichejña sapa uj allinta ruwasqanman jina, allin kajllatataj Señormanta jap'enqa, kamachipis mana kamachipis kachun.

⁹ Qankunapis kamachejkuna, kikillantataj kamachisniykichejwan allinta kausakuychej, ama paykunata manchachispa. Yachaychej, qankunatapis paykunatapis janaj pacha Señor kamachin, imaraykuchus payqa mana runaj rijch'aynillantachu qhawan.

Señorpi kallpachakunamanta

¹⁰ Chayrayku, kallpachakuychej Señorpi, atiynimpa kallpampi.

¹¹ Diospa maqanakunasninwan, p'achawan jina p'achallikuychej; chaykunawantaj, supay urmachiyta munasojtiykichej sinch'ita sayanaykichejpaj.

¹² Mana kausaj runawanchu maqanakusun, manachayqa maqanakoj sayaykuna atiyniyojkunaj contranta, kay pachapi laqhayayta kamachejkunaj contranta, janaj pachapi sajra espirituspa contranta ima.

¹³ Chayrayku Diospa tukuy maqanakunasninta jap'iychej, sajra p'unchaypi sinch'ita sayanaykichejpaj. Kayta ruwaspataj sinch'ita sayaychej.

¹⁴ Sumajta sayaychej ari, ñañu wasaykichejta cheqa kajwan, chumpiwan jina mat'ita chumpikuspa. Cheqan kajwantaj, pechoquera chalecowan jina churasqas kaychej.

¹⁵ Chakisniykichejmampis ujut'asta churakuychej, sonqo tiyachej evangeliota willanaykichejpaj.

¹⁶ Chay tukuywanqa astawan fepa escudonta jap'iychej. Chaywantaj supaypa tukuy larwashaj wach'inasninta thasnunaykichejpaj.

¹⁷ Salvación monterata umaykichejman churakuychej. Espíritoj espadanta jap'iychej; chaytaj Diospa palabran.

¹⁸ Kay tukuytaqa ruwaychej sapa p'unchay, Diosmanta mañakuspa Espiritupi tukuy mañakuywan. Ama puñuspa qhawaychej, mana sayk'uspa. Mañakuychej Diospata kajkunapaj.

¹⁹ Noqapajpis mañapuwaychej, simiyta kicharejtiy Dios palabranta qonawampaj; ama manchachikuspataj evangelioj pakasqa yachayninta rejsichinaypaj.

²⁰ Diosmin chay evangeliota willanaypaj kachawarqa. Chayrayku cadenaswan watasqa kani. Mañapuwaychej mana manchachikuspa paymanta maychus kasqanta parlanaypaj.

Pablo napaykun hermanosta

²¹ Jinallataj qankuna yachanaykichejpaj, Tíquico may munasqa hermano, Señorpa llank'aynimpi allinta yanapakoj; willasonqachej, imatachus ruwashani chay tukuymanta.

²² Payta kachamorqani imaynachus kashasqaykuta willasunaykichejpaj, sonqoykichejta kallpachanampaj ima.

²³ Dios tatamanta, Señorninchej Jesucristomantawan sonqo tiyasqa kay, munakuywan, fewantaj hermanospaj kachun.

²⁴ Diospa khuyakuynin kachun, Señorninchej Jesucristota tukuy wiñaypaj munakojkunaman.