Efesios 5 - Qheshwa Biblia DC

Diospa wawasnin jina kausaychej

¹ Diosmanta yachakuychej munasqa wawasnin jina.

² Munakuypitaj puriychej, imaynatachus Cristopis munakuwarqanchej ajinata. Pay kikin entregakorqa noqanchejrayku Diosman ofrenda jina, ruphachisqa cordero jinataj k'acha q'apayniyoj.

³ Ama kachunchu qhenchachakuy, tukuy ch'ichi kay, chayrí munapayay ima. Chaykunataqa ama parlarillaychejpischu, imaynatachus Diospa ajllasqasnimpaj allin kan, ajinata.

⁴ Ama p'enqay millaykunata parlaychejchu, nitaj qhasi mana kajta nitaj sajra palabrastapis. Manachayqa Diosman graciasta qoychej.

⁵ Kayta yachaychej: Qhenchachakojqa, ch'ichi imasta ruwajqa, lantita yupaychajman rijch'akoj mich'a kajpis, mana chayaqeta jap'enqankuchu Cristojtawan, Diospatawan reinonkupi.

⁶ Ama piwampis qhasi mana kaj palabraswan ch'aukiyachikuychejchu, imaraykuchus kay imasrayku Diospa k'ajaj phiñakuynin jamun mana kasukojkunaj patanman.

⁷ Ama paykunawan chay imaspi chajrukuychejchu.

⁸ Ñaupajtaqa laqhapi karqankichej, kunanrí Señorpi k'anchay kankichej. Puriychejtaj k'anchaypa wawasnin jina.

⁹ K'anchaypa poqoynenqa tukuy k'acha kaypi, cheqan kaypi, cheqa kaypitaj.

¹⁰ Allinta yachaychej, imachus Señorpaj k'acha kasqanta.

¹¹ Laqhapi kajkunaj qhasi mana kaj ruwasqasninkuta ama ruwaysiychejchu. Manachayqa paykunata k'amiychej.

¹² Uj p'enqay pakaypi ruwasqasninkumanta parlayllapis.

¹³ K'anchaynejta tukuy ima sut'inchakun.

¹⁴ Ninkumin: Puñuyniykimanta rijch'ariy, sayariytaj wañusqakunamanta, Cristotaj k'anchaykusonqa, nispa.

¹⁵ Allinta qhawakuychej imaynatachus purisqaykichejta, amataj mana yuyayniyoj wampus jinaqa, manachayrí, yachayniyojkuna jina.

¹⁶ Tiempota kashajtinrajqa allin kajta ruwaychej, imaraykuchus kunan p'unchaykunaqa mana allinchu.

¹⁷ Chayrayku ama wampus kaychejchu; manachayqa yachaychej mayqenchus Señorpa munaynin kasqanta.

¹⁸ Ama vinowan machaykuychejchu. Chaypi sajra kausay tiyan. Astawanqa Espirituwan junt'a kaychej.

¹⁹ Qankuna ukhupi salmoswan parlaychej, takiychejtaj. Espirituman jina Señorta yupaychaychej sonqoykichejpi.

²⁰ Señorninchej Jesucristoj sutimpi tukuy imamanta Dios Tataman graciasta qoychejpuni.

Familia ukhupi kausanamanta

²¹ Cristota manchachikuspa purajmanta kasunakuychej.

²² Qosayoj warmisqa qosasninkuta kasuchunku Señorta jina.

²³ Qosaqa warmimpa umanmin imaynachus Cristopis iglesiaj uman, ajina. Ajinallataj iglesiaqa paypa cuerpon, Cristotaj salvajnin.

²⁴ Imaynatachus iglesiapis Cristota kasun, ajinallatataj qosayoj warmispis qosasninkuta kasuchunku tukuy imapi.

²⁵ Qosas, warmisniykichejta munakuychej imaynatachus Cristo iglesiata munakorqa, ajinata, payraykutaj kausayninta qorqa.

²⁶ Kayta Cristo ruwarqa juchamanta t'aqaspa, palabranwan mayllaspataj llimphucharqa yakuwan jina.

²⁷ Pay kikimpaj rikuchinampaj uj sumaj qhawasqa iglesiata, mana ch'ichiyojta, mana k'usuyojta, nitaj chay imasman rijch'akojta. Manachayqa juchamanta t'aqasqata, llimphuchasqatataj rikuchinampaj.

²⁸ Ajinata qosaspis warmisninkuta munakuchunku ukhunkuta jina. Pillapis warminta munakojqa pay kikinta munakun.

²⁹ Mana pipis kikin cuerponta chejnikunchu, astawanqa allinta mikhuchin, allintataj qhawan, imaynatachus Cristopis iglesiata munakorqa, ajinata.

³⁰ Paypa cuerponmanta kanchej, [aychanmanta, tullusninmanta ima].

³¹ Chayrayku qhareqa tatanta, mamantawan saqespa, warminwan tantakaponqa, iskayninkutaj uj aychallaña kanqanku.

³² Kay pakasqa yachayqa jatunmin. Kayta nini Cristomanta, iglesiamantawan.

³³ Chayrayku qankunamanta sapa uj munakuchun warminta, pay kikinta jina. Warmipis qosanta allimpi qhawachun tukuy imapi.