Efesios 3 - Qheshwa Biblia DC

Pablo evangeliota gentilesman willan

¹ Chayrayku noqa Pablo, qankuna gentilesrayku Cristo Jesuspa preson kani.

² Qankuna uyarerqankichejña, Diospa khuyakuyninmanta qankunawan llank'anaypaj kamachisqa kasqayta.

³ Dios pakasqa kaj imasninmanta sut'inchawarqa, yachachiwarqataj, imaynatachus ñaupajta pisita escribimorqaykichejña.

⁴ Chayta leespa yachayta atinkichej, Cristoj pakasqa imasninta rejsisqayta.

⁵ Chay pakasqa kajqa mana rikuchisqachu karqa, waj miraykunapi runaj churisninman. Kunanrí Espiritunejta sut'inchan ajllasqa apostolesninman, profetasman ima.

⁶ Gentilkunaqa, chay kikin chayaqellatataj jap'enqanku judioswan ujllaña kaspa. Diospa qosqayki nisqantapis Cristo Jesuspi jap'illanqankutaj evangelionejta.

⁷ Chay evangeliota willanaypajtaj noqa churasqa karqani, mana chaypaj jina kashajtiypis. Chaytarí ruwarqa Dios atiyninman jina.

⁸ Diospa tukuy ajllasqasninmanta aswan juch'uy kashajtiypis, Diosqa atiyta qowarqa, Cristoj qhapaj kapuyninta mana rejsiy atina evangeliota gentilesman willanaypaj.

⁹ Wiñaymantapacha Diospi pakasqa imasta, tukuyman sut'inchanaypaj atiyta qowarqa; chay tukuy imastataj pay ruwarqa.

¹⁰ Diospa tukuy imaymana yachaynin, kunan rejsichisqa kachun iglesiasnejta kamachejkunaman, janaj pachapi atiyniyojkunamampis.

¹¹ Kayta Dios ruwarqa wiñay munayninman jina, Cristo Jesús Señorninchejpi ruwasqa kanampaj.

¹² Diosman qayllanapuni tukuy sonqo Cristopi creespa.

¹³ Chayrayku mañakuykichej, qankunarayku ñak'arisqaymanta ama manchariychejchu, imaraykuchus kaykunaqa qankunapaj uj sumaj kusiy.

Cristoj munakuynin

¹⁴ Chayrayku [Señorninchej Jesucristoj] Tatampa ñaupaqempi qonqorikuni.

¹⁵ Tukuy ayllu paymanta jap'in sutita janaj pachapi jinallataj kay pachapipis.

¹⁶ Janaj pacha qhapaj kayninman jina qosunkichej atiyta, Santo Espiritunejta kallpachasqas kanaykichejpaj.

¹⁷ Creesqaykichejrayku Cristo sonqoykichejpi tiyakuchun, munakuypi sumaj saphinchasqas sayanaykichejpaj.

¹⁸ Tukuy ajllasqaswan khuska sumajta unanchayta atinaykichejpaj, may jinachus Cristoj munakuynin kasqanta, kinrayninman, sayt'unman, ukhuman, pataman ima.

¹⁹ Chantapis Cristoj munakuynintapis rejsinaykichejpaj, mayqenchus tukuy runakunaj yuyayninta atipan Diospa junt'a kayninwan, junt'asqas kanaykichejpaj.

²⁰ Diosqa tukuy imata ruwayta atin, mañakusqanchejmantapis aswan ashkhataraj, jinallataj yuyaychakusqanchejmantapis noqanchejpi atiynin kasqanman jina.

²¹ Diosqa yupaychasqa kachun, iglesiapi Cristo Jesuspi, tukuy runaj miraynimpi wiñaypa wiñaynintinkama. Amén.