Eclesiastés 9 - Qheshwa Biblia DC

Wañuymantawan kausaymantawan unanchaykuna

¹ Cheqamanta kay imasta noqaqa tukuy sonqo yachaj churakuni sut'inchanapaj, cheqan runaswan, yachayniyojkunawan, tukuy ruwasqasninkupis Diospa makimpi kasqankuta. Munakuymanta chejninakuymantawan runasqa, mana yachankuchu imaynachus kasqanta ñawisninkupi kashajtimpis.

² Kay tukuy imasqa uj rejllapuni tukuypajpis: Cheqan runaspaj, juchasapa runaspaj; k'acha runaspaj, llimphu runaspaj, mana llimphu runaspajpis; uywa wañuchisqasta jaywajpaj, mana jaywajpajpis, k'acha kajpaj, juchachakoj kajpajpis; juraj kajpaj mana jurayta munajpajpis.

³ Kay pachapi tukuy ima ruwakojkunamantaqa, kaylla mana allinchu uj ima kajpis tukuypaj uj rejlla. Kikillantaj tukuy runaj sonqompi, kay pachapi kausanankamaqa, tukuy sajra kajwan, wampuyaywantaj junt'a kashan. Chay qhepamantaj wañuranku.

⁴ Chay tukuywampis kausashajkunapajqa uj imata ruwanampaj suyaynin kanraj. Uj kausashaj alqoraj aswan allin, uj wañusqa leonmantaqa.

⁵ Kausashajkunaqa wañunankuta yachakunku; wañusqasrí mana imatapis yachankuchu, manataj imatapis tarinkuñachu, imaraykuchus paykunaqa qonqapunku.

⁶ Tukukapullantaj munakuyninku, chejninakuyninku, tukuy ima munapayayninku ima. Jinamanta kay pachapeqa manaña imatapis ruwaysikonqankuñachu.

⁷ Chayrayku qanqa riy, kusiywan t'antaykita mikhuy, vinoykitapis tukuy sonqo ujyarikuy; imaraykuchus ruwasqasniykiwanqa Dios mayta kusikun.

⁸ Tukuy tiempopi yuraj p'achasllatapuni churakuy, umaykiman k'acha q'apaj jawinawan jawiykuypuni.

⁹ Qanqa kausayniykipi kusikuy munakusqayki warmiykiwan kay pachapi qhasi kausayniykipi sapa p'unchay Dios kausayta qosusqanman jina. Kayllamin kay pacha kausayniykipi chay aqeykeqa, samay sik'ikuyta llank'aspa kausanaykikamaqa.

¹⁰ Imaschus ruwanaykipaj jina chaykunata, kallpaykiman jina ruway; imaraykuchus wañuspa maymanchus rinki chaypeqa manaña ima ruwanapis kanchu, ni yuyanapis, ni yachana, nitaj yachaypis.

Kausaypi mana allin kaj imas

¹¹ Kay pachapi ujtawan qhawarispa rikorqani, mana usqhayta correjkunajtachu atipayqa, maqanakupis mana kallpayojkunajtachu, qhepajyaypis mana k'uchi kajkunajtachu, nitaj allin yachachisqaspis allimpi jap'isqachu. Manachayqa tiempo chayamojtinkama kay imasqa tukuyman chayan.

¹² Runaqa kikin tiempontapis mana rejsinchu; imaynatachus challwasqa ch'ipapi ch'ipaykuchikunku; imaynatachus phawajkunaqa tojllaman urmanku, ajinata runaqa mana suyaspalla ch'ipaykuchikun, kaymanta jinalla chay tiempowan jap'ichikuytawan.

¹³ Chanta rikullanitaj kay pachapi yachayqa manchay jatun kasqanta:

¹⁴ Uj juch'uy llajta pisi runasniyoj; chay llajtaj contranta jamun uj atiyniyoj rey, chaytaj chay juch'uy llajtataqa tukuy atiyninwan muyuykun jark'achinasta sayarichispa.

¹⁵ Chay juch'uy llajtapi uj yachayniyoj wajcha runa tiyakun, chaytaj chay llajtataqa yachayninwan salvan; chay wajcha runamantaqa mana pipis yuyarikorqachu.

Tukuy imamanta nisqaqa yachaypuni aswan allin

¹⁶ Chanta noqaqa nerqani: Yachayniyoj kana aswan allin kallpayoj kanamantaqa; chaywampis wajcha runaj yachaynenqa qhesachasqapuni, palabrasnintaj mana kasu ruwasqachu.

¹⁷ Yachayniyojpa llamp'u palabrasnenqa sumaj uyarisqa, wampu runaspa reynimpa qhaparisqanmanta nisqaqa.

¹⁸ Maqanakupaj armasmanta nisqaqa, yachaypuni aswan allin. Uj pantaylla ashkha allin imasta t'unaykun.