Eclesiastés 4 - Qheshwa Biblia DC

¹ Noqa rikuni kay pachapi runasqa tukuy sajra imasta ruwasqankuta. Wajcha runaspa waqasqankuta, mana pipis sonqochaykurej kanchu. Enemigosninkoqa manchayta ñak'arichinku, ni pipis paykunaman sayakoj kanchu sonqochaykurinampaj.

² Chayrayku noqaqa yuyani wañupojkunaqa aswan kusisqas kasqankuta, kausashajkunamanta nisqaqa.

³ Noqaqa yuyani manaraj nacejkunaqa aswan kusisqaraj kasqankuta, chay iskaymanta nisqaqa. Paykunaqa mana rikunkurajchu ima sajra imastachus kay pachapi ruwasqankuta.

⁴ Chanta reparallanitaj, tukuy ima ruwaykuna, sumajta imastapis ruwasqasqa runasta munapayayman pusan, ajinamanta runa masisninkuta chejnikunampaj. Chaypis qhasi mana kajllataj wayra jap'ikuy jinalla.

⁵ Qhella wampu runaqa makisninta simp'aykukuspalla chukun, pay kikimpa aychallantataj mikhukun.

⁶ Noqaqa nini, uj chhikan samarinaqa aswan allimpuni kasqanta, iskay laya llakiywan kanamanta nisqaqa, chayqa wayra jap'ikuy jinalla.

⁷ Ujninman qhawarispataj rikullanitaj, chay imasqa kay pachapi qhasi mana kajlla kasqanta.

⁸ Uj sapan kaj runaqa mana yanapayniyoj, ni jayk'aj samarikunchu ima ruwaymantapis, qhapajyayninta qhawaspallapuni mana sayk'unchu, nitaj tapurikunchu: Pipajtaj kay jinata llank'ashaniri, almayta allin imasmanta ch'aukiyaspari?, nispallapis. Chaypis qhasi mana kajlla, qhasi mana kajpajtaj llank'arqa.

Ujchasqa kaypeqa kallpa tiyan

⁹ Aswan walej iskay ukhu kayqa sapalla kanamanta nisqaqa; imaraykuchus aswan yapasqata iskayninkumantaqa qolqeta jap'iyta atinku.

¹⁰ Sichus ujnin urman chayqa, ujnin kaj aysarin. Sichus ujqa sapallan kashaspa urman chayqa, mana pipis aysarejqa kanmanchu.

¹¹ Jinallataj iskay ukhu puñunkuman chayqa, purajmanta q'oñichinakuyta atinku. Pipis sapallan puñunman chayqa, mana q'oñichakuyta atinchu.

¹² Pipis uj runallataqa atipanman, iskay ukhutarí mana atipayta atinmanchu. Jinallataj uj ch'ankullaqa kinsa q'aytumanta ruwasqaqa mana p'itikullanmanchu.

Yachayqa mana machuyaypichu kashan

¹³ Aswan allenqa uj wajcha waynaqa yachayniyoj kanan, uj wampu machu rey manaña yuyaychasqatapis jap'ikunchu chaymanta nisqaqa.

¹⁴ Waynaqa kamachinampaj carcelmanta llojsimorqa, chaywampis kamachinampeqa khuyay wajcha nacerqa.

¹⁵ Kay pachapi noqaqa rikorqani, reypa cuentanmanta yaykoj wajcha waynawan tukuy runas purishajta.

¹⁶ Chay runatataj ashkha mana yupay atina runas qhaterqanku, chaywampis qhepamanqa paywan amichikonqanku, qhepa mitaspis manaña paytaqa kasuta ruwanqankuchu. Chaypis qhasi manakajllataj, wayra jap'ikuy jinalla.