Eclesiastés 12 - Qheshwa Biblia DC

Waynakunapaj yuyaychaykuna

¹ Wayna kashaspa ruwajniykimanta yuyarikuy, amaraj sajra p'unchaykuna jamushasojtin. Chay watas chayamusojtintaj ama ninaykipaj: Mana chaykunapeqa kausayta tarinichu, nispa.

² Chayrayku qanqa yuyarikuypuni: Amaraj inti laqhaykushajtin, amaraj k'anchay, killa, qoyllurkuna, nitaj phuyuspis paraj rikhurimushajtin.

³ Chaypacha, palaciota qhawajkunaqa mayta kharkatitenqanku, may kallpayoj runas llauch'iyanqanku; jak'uta ruwajkuna pisiyanqanku; ventanasmanta qhawajkunata laqhaykonqa.

⁴ Calle punkus wisq'akonqa; molinoqa pisimanta pisi ch'inyaponqa. P'isqos takiyta qallarejtinkama, sipaskunaj takisqasninkoqa ch'inyaponqa.

⁵ Wichay kajtin manchachikonqanku; ñankunapi manchay manchachikuy kanqa. Almendrapis t'ikayta qallarenqa, langostaqa llasaman tukonqa, tukuy munapayaytaj chinkaponqa. Runaqa wiñaypaj tiyakunanman riponqa; waqajkunaqa callespi waqaspa purenqanku, imaynatachus wañunankumanta.

⁶ Yuyarikuy ruwasajniykimanta, amaraj qolqe cadena p'itikushajtin, amaraj qolqe k'anchana p'akikushajtin, amaraj yaku yurupis yaku juturi cantopi p'akikushajtin, amaraj yaku aysana waska p'itikushajtin.

⁷ Chaypacha, ñut'u jallp'aqa, jallp'allamantaj tukonqa ñaupajta karqa ajinaman, runaman qosqan almataj Diosllaman kutiponqa.

⁸ Kay imasta willajqa nin: Qhasi manakaj, qhasi manakajlla kay imasqa. Tukuy imapis qhasi manakajlla.

Runaj imatachus ruwanan

⁹ Kay imasta willajqa sumaj yachayniyoj karqa, runasmampis yachaymanta yachacherqa; sumajta uyaricherqa, sumajta unanchacherqa, ashkha yachay palabrastataj ruwarqa.

¹⁰ Chay willajqa sumaj k'acha palabrasta mask'arqa, cheqantataj palabrastataj qelqarqa.

¹¹ Yachayniyojkunaj palabrasnenqa wach'ina jina. Yachachejkunaj palabrasnin tantasqasqa tantakojtinku ch'akarpu jina sumaj takasqa, uj sumaj michejpa churasqampis kanman jina.

¹² Kunanqa wawáy, amaña kaymanta jawaqa imastapis mask'aychu, librosta ruwanaqa manapuni jayk'ajpis tukukunmanchu. Anchataña imasmantapis yachayta munayqa sayk'uchikun.

¹³ Kay tukuy imasta uyarisqaykimantaqa kayta ruwan: Diosta munakuy, kamachisqasnenqa waqaychay. Kay imasllata runaqa astawan ruwanan tiyan.

¹⁴ Diosqa tukuy ima ruwasqasninchejmanta cuentata mañawasunchej, pakasqa kajmanta, sut'ipi kajmanta, allin kajmantapis, mana allin kajmantapis.