Eclesiastés 10 - Qheshwa Biblia DC

Yachaypa sumaj kaynin

¹ Wañusqa ch'uspi sumaj q'apashaj jawinasta asnaykuchin. Ajinata uj chhika sonsera ruwayqa yachayniyojta, allimpaj qhawasqa kajtawan, mana allinman churan.

² Yachayniyoj runaj yachaynenqa pañampi rishan. uj wampu juchasapa runaj yachaynintaj lloq'epi kashan.

³ Chay ñanta rej jina wampu runaqa, mana yachanchu imatachus parlashasqanta. Chay runaqa pitapis wampu kasqallanta nin.

⁴ Sichus uj rey qampa contraykita phiñarikun chayqa, maypichus llank'ashanki chayta ama saqeychu. K'acha sonqo kayqa jatuchaj phiñakuykunasta thasnun.

⁵ Kay pachapi uj mana allin kajta rikuni; chayqa kamachejkunamanta jamun:

⁶ Uj wampu runataqa uj sumaj kamachejmanta churanku; aswan allin kaj runastajrí pisi kamachejmanta churasqas kanku.

⁷ Noqaqa rikuni kamachi runas caballospi purishajta; reyestataj, kamachispis kankuman jina, chakipi purishajta.

⁸ Uj runa jallp'api jusk'uta allajqa, chayllamantaj urmaykun. Perqasta urmachejtaqa, katari khanenqa.

⁹ Rumista ch'eqojqa, chay rumisllawantaj k'utuykuchikun. Llant'ata ch'ejtajqa, chakinta takaykukuyta atin.

¹⁰ Uj hacha muthuyajtenqa, manaña afilayta atikunchu. Chay tukuy imasta ruwanapajqa, yachaypuni aswan allenqa.

¹¹ Sichus uj runata katari khanin, manaraj allinta jap'ishajtin chayqa, mana imapajpis allinchu katarita jap'inaqa.

¹² Yachajniyoj runaj palabrasnenqa k'achapuni. Wampu runaspa palabrasninrí, mana allinchu, manachayqa payllatataj urmachin.

¹³ Qhasi mana kaj sonserasllata parlayta qallarin. Chay palabrasnimpa tukukuynenqa aswan sonseras.

¹⁴ Wampu runaqa astawan palabrasta yapan; mana pipis yachanchu qhepaman imaschus jamunanta. Pitaj payman willanqa, paymanta qhepaman imaschus kanantari?

¹⁵ Wampu runaqa llank'aspa sayk'un, llajtanman rej ñanllatapis mana rejsinchu.

¹⁶ Ay, jallp'a imanankichus, reyniykeqa uj yoqhallalla kajtin. Kurajkunasniykipis jatun mikhuykunasllata mikhuspa sut'iyanku.

¹⁷ Jallp'a, kusikuyniyojmin kanki, reyniyki sumaj runaspa wawan kajtin. Kurajkunasniyki maychus tiempompi mikhojtin, kallpayoj kanampaj mikhojtinku, manataj ujyanallankupajchu.

¹⁸ Qhella runa kasqanrayku wasi techonqa urmaykun; qhella llauch'i makiyoj kasqanrayku, parapis wasi ukhuman sut'uran.

¹⁹ Kusikunankupaj jatuchaj mikhuykunata ruwanku, vinotaj paykunata kusichin, qolqetaj tukuy imapaj.

²⁰ Ama yuyaynillaykipipis reypajqa sajrata rimaychu, nitaj wasiyki ukhupi qhapaj runapajpis sajrata rimaychu; imaraykuchus chay pataspi phawaykachashanku p'isqos, chay parlasqaykita willaykamonqanku.