Deuteronomio 9 - Qheshwa Biblia DC

Diospa nisqanman jina kanan tiyan

¹ Uyariychej israelitas: Kunanqa Jordán mayuta chimpanaykichejña tiyan. Qankunamanta aswan ashkha runasniyoj nacionesta, aswan atiyniyojkunatataj jallp'asninkumanta qharqonaykichejpaj, jap'ikapunkichejtaj jatuchaj perqawan muyuykusqa llajtasninkuta.

² Chaypi tiyakojkunaqa Anacpa wawasnin jatuchaj runas kanku. Chaykunamanta nejta uyarinkichej: Pitaj sayayta atinman anaquitaspa wawasnimpa ñaupaqempiri?, nispa.

³ Kunanqa yachanaykichej tiyan, qankunaj ñaupaqeykichejta Señor Diosniykichej renqa. Payqa uj k'ajashaj nina nina ruphaspa k'umuykachachenqa ñaupaqeykichejpi nacionesta chinkachinankama. Qankuna chay llajtasninkumanta qharqospa ujllapi chinkachinkichej, imaynatachus Señor qankunaman nisqaykichejman jina.

⁴ Maypachachus ñaupaqeykichejmanta Señor Diosniykichej paykunata qharqonqa chayqa, ama sonqoykichejpi ninkichejchu: Noqanchej allin kasqanchejrayku Señorqa kay jallp'asman chayachimuwanchej, nispa. Señorqa chay runasta juchasninkurayku qharqon.

⁵ Mana qankuna allin kasqaykichejraykuchu, nitaj cheqan kajta ruwasqaykichejraykuchu, paykunaj jallp'asninkuta jap'ikapunkichej. Señorpuni ñaupaqeykichejmanta paykunata juchachakusqankurayku wijch'un junt'anampaj ñaupa tatasniykichejman Abrahamman, Isaacman, Jacobman ima imatachus nisqanta.

⁶ Yachaychejpuni kayta: Manamin qankuna allin kasqaykichejraykuchu chay sumaj jallp'asta Señor Diosniykichejqa qosunkichej. Qankunaqa rumi sonqos kankichej.

Horeb orqopi israelitas Diospa contranta oqharikunku

⁷ Yuyarikuychejpuni Señor Diosniykichejta ch'in pampapi phiñachisqaykichejta, Egiptomanta llojsimuqaykichejmantapacha, kay jallp'aman chayamunaykichejkama, Señorpa contranta oqharikorqankichej.

⁸ Horeb orqopi Señorta phiñacherqankichejña. Paypis qankunapaj phiñakuspa tukuchinasuykichejpajña kasharqa.

⁹ Chay orqoman wicharerqani Señormanta jap'imoj palqayoj p'alta rumipi qelqasqa kamachiykunata, qankunawan Señor tratota ruwarqa chaykunata. Chaypitaj chinkamorqani tawa chunka p'unchaykunata tawa chunka tutastawan mana t'antata mikhuspa, nitaj yakuta ujyaspa.

¹⁰ Chaypi Señorqa qowarqa chay p'alqayoj rumita, pay kikimpa qelqasqasninta. Chay palabrasqa karqanku ima nispachus Horeb orqopi nina chaupimanta parlamusorqachej chaykuna, maypichus tantasqa kasharqanchej, chaypi.

¹¹ Tawa chunka p'unchaykuna tawa chunka tutas junt'akojtintaj Señorqa jaywawarqa palqayoj rumipi qelqasqata, trato ruwasqa qelqasqata.

¹² Niwarqataj Señorqa: Kunanqa usqhayta rispa kaymanta uraykuy, imaraykuchus Egiptomanta orqhomusqayki runasqa, noqaj kamachisqasniyta mana kasukuspa mana allinta ruwashanku. Noqaj kamachisqasniyta mana junt'aspa saqerparinku, uj lantitataj ruwakunku.

¹³ Señorqa nillawarqataj: Ña noqaqa rikuniña kay runasqa ancha rumi sonqos kasqankuta.

¹⁴ Kunanqa saqeway ari kay runasta chinkachinayta. Jallp'a patamanta sutisninkuta qhechusaj. Qanmantataj ruwasaj uj jatun nacionta, paykunamanta aswan ashkhata, kallpayojtataj.

¹⁵ Chay orqomanta uraykamushajtiy, chay makiypi apamorqani trato ruwasqa chay qelqasqata, chay orqopi nina laurashallarqapuni.

^16-17 Qankuna Señor Diosniykichejpa contranta juchallikusqaykichejta rikuspa, uj waka uña lantita mineralta unuyachispa ruwasqaykichejta, Señorpa ñanninta rikuchisqasuykichejta saqespa kajtiykichej, makiypi jap'isharqani chay qelqasqa kamachiykunata, ñaupaqeykichejman choqaspa t'unarqani.

¹⁸ Chaymantataj Señorpa ñaupaqenman qonqorikorqani ñaupajta jina, tawa chunka p'unchaykunata, tawa chunka tutastawan, mana t'antata mikhuspa, nitaj yakuta ujyaspa. Chayta ruwarqani qankuna juchachakusqaykichejrayku, Diospa contranta, Payta phiñachispa.

¹⁹ Noqaqa maytapuni mancharikorqani qankunaj contraykichejta Señor phiñarikusqanta rikuspa, qankunata ujllapi chinkachiyta yuyaspa. Walejta Señorqa paymanta mañakojtiy uyariwan.

²⁰ Chanta Señorqa Aarompajwan mayta phiñakorqa payta chinkachiyta munaspa, noqataj Diosmanta mañakorqani ama Aaronta wañuchinanta.

²¹ Chaymantataj chay waka uña ruwasqaykichejta, mayqenwanchus juchallikorqankichej chayta oqharispa ninaman khanaykorqani. Sumaj ñut'uta kutachispataj, orqomanta uraykamushaj chay yakuman wijch'uykorqani.

²² Chaymantaqa Taberapi, Masahpi, Qibrot-hataavapi ima Señorta phiñacherqankichej.

²³ Maypachachus Señorqa kamachisorqachej Cades-barneamanta rinaykichejta, nispataj: Wichariychej ima jallp'atachus qoykichej chayman; qankunaqa chayta mana munarqankichejchu. Mana paypi creerqankichejchu, nitaj kasorqankichejchu.

²⁴ Qankunaqa Señorta manapuni kasuyta munankichejchu rejsisqasuykichejmantapacha.

²⁵ Chaypacha Señorqa qankunata chinkachiyta munasqanrayku noqaqa Señorpa ñaupaqempi qonqoriykukorqani tawa chunka p'unchaykunata, tawa chunka tutastawan.

²⁶ Chaypacha Señorman nerqani, mañakorqanitaj kay jinata: Señorníy, kay qampa runasniykita ama chinkachiychu ari. Qan kacharicherqanki jatun kayniykiwan, Egiptomanta jatun atiyniykiwan orqhomorqanki.

²⁷ Yuyarikuy ari kamachisniyki Abrahammanta, Isaacmanta, Jacobmanta ima. Ama qhawaychu ari rumi sonqos kasqankuta, sajra kayninkuta, nitaj juchasninkutapis.

²⁸ May llajtamantachus orqhomuwarqayku chay llajtayojkunaqa nenqanku: Señorqa mana atinchu, ima jallp'atachus qonan karqa chayman pusaykuyta. Kaymantaqa orqhorqa ch'inkunapi wañurachimunampaj, paykunata chejnisqanrayku.

²⁹ Paykunaqa kanku qampa aylluyki, qampa chayaqeyki. Qanmin paykunata Egiptomanta orqhomorqanki jatun kayniykiwan, atiyniykiwantaj, nispa.