Deuteronomio 6 - Qheshwa Biblia DC

Jatun kaj kamachiy

¹ Kaykuna kanku kamachiykunas, leyes, imachus ruwana, Señor Diosniykichej niwasqasnin qankunaman yachachinaypaj, chaykunata ruwanaykichejpaj ima jallp'atachus jap'ikunkichej chaypi.

² Ajinamanta Señor Diosniykichejta manchachikunkichej, junt'ankichejtaj tukuy kausayniykichejpi leyesninta, kamachiykunasninta ima, qankunaman yachachisqayta wawasniykichejwan, allchhisniykichejwan ima, unaytataj kausakunaykichejpaj.

³ Uyarikuychej ari israelitas, allinta chaykunata ruwaychej. Ajinamanta allin risonqachej lechewan, misk'iwan yaku jina corrishaj chay llajtapi, chaypitaj ashkhata mirankichej, imaynatachus ñaupa tatasniykichejpa Señor Diosnin nisorqachej chayman jina.

⁴ Israelitas uyariychej ari: Señor Diosninchejqa payllamin Señorqa.

⁵ Munakuy Señor Diosniykita tukuy sonqoykiwan, tukuy almaykiwan, tukuy kallpaykiwantaj.

⁶ Kay tukuy ima nisusqasniyta sumajta umaykipi jap'iy.

⁷ Sapa kuti wawasniykiman yachachinki. Kay kamachiykunamanta willaypuni, wasiykipi, jinallataj ñan purisqasniykipipis chanta samarishaspa, jatarisqa kaspa ima.

⁸ Kay kamachiykunastaqa apaykachay señalesta jina makisniykiman wataykukuspa, chanta ñawisniyki pataman k'askachikuspa ima.

⁹ Chanta wasi punku kurkusniykiman qelqaspa k'askachiy, wasiyki wisq'anaman ima.

Israelitasqa Diosta kasunanku tiyan

¹⁰ Señor Diosniykichej pusasonqachej chay jallp'asman, ñaupa tatasniykichej Abrahamman, Isaacman, Jacobman ima qonanta nerqa chayman. Chay jallp'aqa jatuchaj k'acha llajtasniyoj. Qankunaqa mana chaykunastaqa ruwarqankichejchu.

¹¹ Chantapis chay wasisqa tukuy k'acha imaswan junt'a. Chaykunata qankunaqa mana churarqankichejchu. Chanta yaku pozosniyoj. Chaykunataqa mana qankunachu allarqankichej. Uvas sach'asniyojtaj, olivo sach'asniyoj ima. Chaykunatapis qankunaqa mana churarqankichejchu. Chay poqoykunatataj sajsakunaykichejkama mikhunkichej.

¹² Chaypacha amapuni Señorta qonqapunkichejchu. Paymin Egiptomantaqa orqhomusorqachej kamachis kashajtiykichej.

¹³ Señor Diosniykichejta manchachikuychej. Pay sapallanta yupaychaychej. Juraspapis Señorpa sutillanta oqhariychej.

¹⁴ Qayllaykichejpi llajtaspa lantisninkuta amapuni yupaychankichejchu.

¹⁵ Señor Diosniykichejqa qankunawan kashan. Pay manapuni munanchu waj dioskunata munakunaykichejta. Payqa atin sinch'ita phiñakuyta, jinamanta chinkachisunkichejman.

¹⁶ Señor Diosniykichejpa contranta amapuni imatapis ruwankichejchu, Masah llajtapi ruwarqankichej jinataqa.

¹⁷ Allinta waqaychaychej Señor Diosniykichejpa kamachisqasninta, leyesninta ima nisusqaykichejman jina.

¹⁸ Imachus cheqan kajta Señorpa ñaupaqempi chayta ruwaychej, allin risunaykichejpaj sumaj jallp'ata jap'ikunaykichejpaj. Señorqa juraspa nerqa ñaupa tatasniykichejman qonanta, chaypi.

¹⁹ Ajinamanta enemigosniykichejqa ñaupaqeykichejmanta ayqenqanku, Señor nisqanman jina.

^20-21 Mayk'ajllapis wawasniykichej tapusojtiykichejqa: Imatataj niyta munan kay kamachiykunas, leyes, imastachus Señorpa nisqasnin, chayri Señorpa kamachiwasqasninchejri?, nispa chayqa, qankuna ninkichej: Noqanchejqa Egiptopi faraompa kamachisnin karqanchej, chaymanta Señorqa jatun atiyninwan orqhomuwarqanchej.

²² Chaypacha Señorqa Egiptopi noqanchej rikushajtinchej ruwarqa señalesta, milagrosta, may t'ukuna ruwaykunasta faraompa contranta, jinallataj tukuy runasninta.

²³ Chaymanta orqhospa kayman pusamuwarqanchej kay jallp'ata qopunawanchejpaj, imaynatachus Señorqa juraspa nerqa ajinata ñaupa tatasninchejman.

²⁴ Chay qhepata Señorqa kamachiwarqanchej kamachiykunasninta allinta ruwaspa waqaychananchejta, payllaman k'umuykunanchejta, allin rinawanchejpaj, allinta kamachinawanchejpaj kunankama jina.

²⁵ Ajinaqa sumaj kanman tukuy kamachiykunasninta junt'ananchej Señor Diosninchejpa ñaupaqempi, imaynatachus niwasqanchejman jina.