Deuteronomio 34 - Qheshwa Biblia DC

Moisespa wañupuynin

¹ Moisesqa Moab ch'in pampamanta Nebo orqoman wicharerqa, Pisga orqo puntaman. Chaytaj kashan Jericó chimpapi. Chaymantapacha Señorqa rikucherqa, tukuynin Galaad jallp'asta, Dan jallp'askama.

² Chaymantataj rikucherqa Neftalí jallp'asta, Efraín jallp'asta, Manasés jallp'asta ima. Chaymantataj tukuy Judá jallp'astapis Mediterráneo nisqa mar qochakama.

³ Chaymantaqa rikuchillarqataj Neguevta, Jordán valleta, palmeras llajtatawan, Jericó pampasta ima Zoarkama.

⁴ Chaypitaj Señorqa payman nerqa: Kay ari, chay jallp'aqa, Abrahamman, Isaacman, Jacobman juraspa, mirayninman ima qonayta nerqani, chay. Noqa munarqanipuni chay jallp'ata kikin ñawisniykiwan rikunaykita. Manataj chaymanqa yaykunkichu.

⁵ Ajinata Diospa kamachin Moisesqa Moab jallp'api wañuporqa, Señorpa nisqanman jina.

⁶ P'ampasqataj karqa Moab valle jallp'api. Bet-peorpa chimpampi. Chay cheqataqa ni pipis kunankama rejsinchu.

⁷ Payqa wañuporqa pachaj iskay chunka watayoj. Chaypacha payqa sumaj ñawisniyojraj, sumaj kallpayoj ima karqa.

⁸ Israelitasqa Moab ch'in pampapi maytapuni Moisesmanta waqarikorqanku kinsa chunka días junt'ata.

⁹ Numpa wawan Josueqa sumaj yachaywan junt'a karqa, Moisés paypa patanman makisninta churasqanrayku. Israelitasqa payta kasorqanku, ruwarqankutaj imaynatachus Señorqa Moisesman kamachisqanman jina.

¹⁰ Chaymantaqa manaña ujtawan Israelpeqa Moisés jina waj sut'inchaj karqachu; Señorqa paywan uyapura parlaj.

¹¹ Chaymantaqa manaña karqachu Señor kamachejtin pipis pay jina Egiptopi milagrosta ruwaj, may jina t'ukunasta ima faraompa contranta, tukuy jallp'ampa contranta ima.

¹² Manañapuni pipis Moisés jinaqa karqachu israelitas ukhupi, pay jina may atiywan milagrosta, t'ukuna imasta, jatuchaj imastapis ruwajqa.