Deuteronomio 32 - Qheshwa Biblia DC

¹ Janaj pacha, uyariwan imatachus parlasaj chayta. Jallp'apis, uyarichun kikin simiypa parlasqasninta.

² Yachachisqayqa para jina jich'akamonqa, yuyasqayqa chhulla jina kanqa, qhora patapi chhillchi jina, ch'iki patapi yaku sut'ushaj jina.

³ Noqa Señorpa sutintaqa yupaychasaj, qankunarí ninkichej Diosninchej may jatun kasqanta.

⁴ Payqa jark'akuwajninchej, ruwasqasnenqa may sumajpuni. Tukuy ñankunasnenqa cheqampuni. Payqa mana llullakoj Dioschu. Payqa mana jayk'ajpis pantanchu. Payqa cheqanmin, cheqa kajta ruwajtaj.

⁵ Machu machu sajra runas, Diosta phiñachejkuna, qankunaqa mana wawasnin ninapaj jinachu kankichej.

⁶ Wampu runas, mana yachayniyojkuna, ajinatachu Señormanqa kutichinkichej? Manachu payqa tataykichej, ruwasojniykichejtaj? Paymin qankunataqa ruwasorqachej, uj ayllullamantaj tukuchisorqachej.

⁷ Unay tiemposmanta yuyarikuychej, ñaupa wata miraykunapi unanchaychej. Tatasniykichejta, ñaupa kurajkunasniykichejtapis, tapukuychej, paykunataj willasonqachej.

⁸ Janaj pachapi kaj Diosqa nacionesman chayaqenkuta qoporqa. Tukuy runasta ch'eqeracherqa. Paykunamantaj jallp'asninkuta rak'erqa, mashkhachus Diospa wawasnin kasqankuman jina.

⁹ Señorqa chayaqenta kikin ayllullantataj ajllakorqa, Jacobpa miraynin kajkunata.

¹⁰ Paykunata ch'in pampaspi tarerqa, wayraj jasut'isqan ch'aki jallp'aspi. Makisninwan ojllaykorqa, yachacherqataj. Paykunata waqaycharqa Pay kikinta jina.

¹¹ Imaynatachus ankaqa thapan patanta phawaykachaspa, irpasninta phawayta yachachin, ajinallatataj Señorqa wawasninta, waqaychan tukuy imamanta jark'aspa.

¹² Ajinata Señorqa sapallan paykunata pusaykacharqa, ni ima diospis paywan khuska karqachu.

¹³ Paykunata pata jallp'asnejta pusarqa, campo poqoykunatapis mikhucherqa. Chhankamanta llojsimoj misk'ita ujyacherqa, sinch'i rumimanta llojsimoj aceiteta ujyacherqa.

¹⁴ Uywasninkoqa qorqanku llujlluta, lechetawan. Wiran kaj ovejasta mikhorqanku, Basanmanta wiran kaj ovejasta, cabrastawan. Sumajnin kaj poqosqa trigota mikhorqanku. Sumaj uvasmanta vinota ujyarqanku.

¹⁵ Israelitasqa manchayta qhapajyarqanku, kayman jaqaymantaj jayt'arakorqanku, Diospa contrantataj oqharikorqanku. Jinamanta wirayarqanku llusk'apacha kanankukama. Ruwajninku Diostataj qonqaporqanku, qhesacharqankutaj jark'akoj Salvadorninkuta.

¹⁶ Waj dioskunata yupaychaspa Diosta mayta phiñacherqanku. Millay lantisninkuwan phiñakuyninta k'ajaricherqanku.

¹⁷ Diosman jaywanankutaqa supayllaman rikuchikusta jaywarqanku, mana jayk'aj rejsisqanku dioskunaman, chaypachalla ruwasqa dioskunaman. Chaykunataqa tatasniykichej mana yupaycharqankuchu.

¹⁸ Israel qanqa qonqapunki jark'akusoj tataykimanta. Kausayta qosoj Diosniykimanta.

¹⁹ Chayta rikuspa Señorqa mayta phiñarikorqa, qhesacharqataj qhari wawasninta, warmi wawasninta ima.

²⁰ Nerqataj: Paykunata mana qhawasajchu, yachasajtaj imapichus tukukunankuta. Cheqamanta paykunaqa sajra runas kanku; paykunaqa tatankuta saqerpayaj wawas kanku.

²¹ Mana dios kajta yupaychaspaqa, sonqoyta nanachiwanku. Lantista ruwakuspa phiñachiwanku. Noqapis paykunaj sonqonkuta nanachisaj, uj manakaj aylluta munakuspa, uj manakaj runaswan paykunata phiñachisaj.

²² Phiñakuyneyqa nina jina k'ajarin, chay ninaqa ukhu pachakama laurarillanqa. Q'olaykonqa jallp'ata, tukuy imasnintinta. Orqosta k'uchunmantapacha q'olaykonqa.

²³ Tukuy mana allinkunata paykunaj patankuman qotuykusaj. Paykunaj contrankuta tukuy wach'inasta kacharisaj.

²⁴ Yarqhaywan, q'oñi onqoywantaj wañonqanku. Uj millay onqoy paykunata tukuchenqa. Paykunaman khanikoj sajra animalesta venenoso kataristawan kachamusaj.

²⁵ Guerra chayamojtin callespi wawasninkoqa wañonqanku, wasi ukhuspitaj manchay manchachikuy kanqa. Jinata wañonqanku waynas, sipaskuna, machu runas, ñuñoj wawas ima.

²⁶ Noqa yuyarqani tukuynejman paykunata ch'eqerachiyta, kay jallp'a patamantataj sutinkuta chinkachiyta.

²⁷ Chaytari mana ruwayta atinichu, enemigosniy wapuykachaspa ama ninankupaj: Mana Señorchu kaytaqa ruwashan, manachayqa noqanchej kaytaqa atiyninchejwan ruwashanchej, nispa.

²⁸ Israelitasqa yuyayninkuta chinkachinku. Mana umachakuyta atinkuchu.

²⁹ Sichus paykuna yachayniyoj kankuman chayqa, umachakunkuman, imamanchus tukunankuta.

³⁰ Imaynamantataj uj runalla waranqa runasta qhatiykachayta atinmanri? Imaynamantataj iskay runaslla chunka waranqa runasta ayqechiyta atinkumanri? Ajina kanqa jark'akojtinku paykunata saqerpayasqanrayku, Señorninku enemigosninkuman entregasqanrayku.

³¹ Jark'ajninku chhankaqa, mana jark'awajninchej chhanka jinachu. Chaytaqa enemigosninchej yachanku.

³² Uvasninkoqa Sodomamanta, Gomorramantawan uvas jina. Chaykunaqa jaya k'allku wañuchikoj uvas.

³³ Vinonkoqa katarej venenon jina wañuchin.

³⁴ Kay tukuy imastaqa yuyarikushani, sonqoypi sumajta waqaychaspa.

³⁵ Ayniyta kutichina diapaj, chaypi ruwasqankuman jina qopunayaj urmanqanku chaypacha. Chinkananku diaqa chayamushanña. Ñapis qayllamushanña.

³⁶ Chaypacha Señorqa ayllunta yanapanqa pisi kallpayojta rikuspa. Señorqa kamachisninta khuyapayanqa, manaña pipis kasqanta rikuspa, kallpayoj kaj, mana kallpayoj kajpis.

³⁷ Chaypitaj paykunaman nenqa: Maypitaj kunan dioskunasniykichejri? Maypitaj kunan jark'asojniykichej chhanka pakakunaykichejpajri?

³⁸ Maypitaj kunan rikuchikusta jaywasqaykichejmanta wirasta mikhojkunari? Vino ofrendasta jaywasqaykichejmanta vinota ujyajkunari? Kunanqa sayarimuchunku qankunata yanapaj! Jamuchunku qankunata jark'akoj!

³⁹ Yachaychej noqalla Dios kasqayta. Yachallaychejtaj mana waj dios kasqanta. Noqalla kausayta qoni, qhechunitaj. Noqalla nanachini, thañichinitaj. Ni pipis noqaj makiymanta kacharikuyta atinchu.

⁴⁰ Noqaqa makiyta janaj pachaman oqharisaj, nisajtaj wiñaypaj kausasqayta.

⁴¹ Sumaj lliphipishaj espadayta filoyachejtiytaj, cheqanchaytataj qallarejtiy, chaypacha enemigosniyman aynita kutichipusaj. Chejniwajkunaman ruwasqankuman jina qopusaj.

⁴² T'ojsinasniyta yawarman chhapusaj. Espadayqa aychawan sajsakonqa. Wañusqaspa yawarninman, presochasqaspa yawarninman ima chhapusaj. Espadayqa enemigosniypa umasninkuwan sajsakonqa.

⁴³ Naciones kusikuychej Diospa ayllunwan. Diosqa aynita kutichenqa kamachisninta wañuchisqankumanta. Enemigosninman aynita kutichenqa. Payqa jallp'anta, aylluntawan llimphuchanqa.

Moisespa qhepa parlaykunasnin

⁴⁴ Moisesqa jamuytawan, Numpa wawan Josuepiwan, kay takiyta israelitaspa ñaupaqempi qallariyninmanta tukukuyninkama leerqanku.

⁴⁵ Ajinata Moisesqa israelitaspaj leeporqa.

⁴⁶ Chaymantataj Moisesqa israelitasman nerqa: Kay tukuy nisqasniyta allinta sonqoykichejpi unanchaychej, kunan nishaykichej chaymanta. Ajinamanta mirayniykichejta kamachinaykichejpaj, tukuy kay leyta waqaychanankuta, junt'anankuta ima.

⁴⁷ Chay nisqayqa mana yanqha mana kajchu, kay leyqa qankunapaj, qankunaj kausayniykichej. Chaynejqa qankunaqa unayta kausankichej Jordán mayu chimpa jallp'api, chayaqeykichejpaj jap'ikunkichej chaypi.

Diosqa Moisesman Israel jallp'ata rikuchin

^48-49 Chay kikin diapacha Señorqa Moisesman parlarqa kay jinata: Abarim orqosman rispa, Nebo orqoman wichariy; chay orqoqa Moab jallp'api kashan, Jericó llajtaj chimpampi. Chay orqomanta rikunki Canaán jallp'ata, chaytaqa israelitasman qosaj, paykunajta kanampaj.

⁵⁰ Qanqa wañupunki mayqen orqomanchus wicharinki chaypi. Jinamanta ripunki ñaupajta wañoj ayllusniykiwan tantakamoj. Imaynatachus wauqeyki Aarompis Hor nisqa orqopi wañuporqa, rerqataj wañoj ayllusninwan tinkukamoj, ajinata.

⁵¹ Chayqa kanqa qankuna noqaj contrayta juchallikusqaykichejrayku israelitaspa ñaupaqempi, Sin nisqa ch'in pampapi yaku llojsimushajtin Cades Meribapi.

⁵² Qankunaqa israelitaspa ñaupaqempi mana yupaychawarqankichejchu. Qanqa karullamanta rikunki israelitasman qosaj chay jallp'ata. Jinamanta qanqa manaña chay jallp'aman yaykunkichu.