Deuteronomio 28 - Qheshwa Biblia DC

Kasukojkunaqa bendicisqas kanqanku

¹ Moisesqa nillarqataj: Sichus Señor Diosniykichejpa tukuy nisqasninta uyarispa junt'ankichej chayqa, pay tukuy nacionesmanta aswan pataman churasonqachej. Chay kamachiykunataqa kunan qoshaykichej.

² Sichus qankuna Señor Diosniykichejpa nisqasninta uyarinkichej chayqa, tukuy kay bendiciones jamusonqachej qankunaman.

³ Bendicisqas kankichej llajtapipis, campopipis.

⁴ Bendicisqasllataj kankichej wawasniyoj kaspa, cosechasniyoj, waka uñasniyoj, oveja uñasniyoj, tukuy uywasniyoj ima kaspa.

⁵ Bendicisqas kankichej jak'uwan, t'antawampis.

⁶ Jinallataj bendicisqas kankichej tukuy ruwasqasniykichejpi.

⁷ Señor atipachisonqachej tukuy enemigosniykichejta. Paykunaqa uj ñannejllata maqanakoj jamusonqachej, waj wajmantaj ch'eqerasqas ayqenqanku.

⁸ Señorqa bendicisonqachej pirwasniykichejman junt'achispa; tukuy ruwasqaykichejpipis bendicisonqachej. Chantapis bendicisonqachej qosonqachej chay jallp'api tiyakojtiykichej.

⁹ Sichus kamachisqasninta sumajta waqaychankichej, ñannintataj allinta purinkichej chayqa, Señor Diosniykichej ajllasqa ayllunta jina tukuy imapi sumajta qhawasonqachej, nisusqaykichejman jina.

¹⁰ Kay pachapi kaj tukuy naciones rikonqanku cheqamanta Señorpa ayllun kasqaykichejta, qankunamantataj manchachikonqanku.

¹¹ Señorqa khuyakuyninta rikuchisonqachej, ashkha wawasta qankunaman qospa, uywasniykichejta ashkhata mirachispa, chajrasniykichejta sumajta poqochispa ima, ñaupa tatasniykichejman qonanta nisqanman jina.

¹² Señorqa qhapaj kaynin janaj pachata kicharipusonqachej, tiempompitaj jallp'aykichejman parachimonqa, tukuy ruwasqasniykichejtataj ñaupajman pusanqa. Qankunaqa ashkha nacionesman manuyta atinkichej, qankunataj ni pimanta manunkichejchu.

¹³ Señorqa ñaupajmampuni churasonqachej, mana qhepamanchu. Qankunaqa patapipuni kankichej, mana urapichu. Sichus Señor Diosniykichejpa kamachisqasninta junt'ankichej chayqa, chay kamachiykunataqa kunan qoshaykichej.

¹⁴ Ajina kanqa chay kamachiykunamanta mana t'aqakojtiykichej, ni pañaman, ni lloq'eman waj dioskunata qhatispa yupaychanaykichejpaj.

Mana kasukusqankumanta

¹⁵ Sichus Señor Diosniykichej qankunaman parlasusqanta mana kasunkichejchu chayqa, nitaj junt'ankichejchu tukuy nisqasninta, leyesnintapis, qankunaman kamachishaykichej chaykunata qankunaj pataykichejman kay tukuy maldiciones jamusonqachej.

¹⁶ Maldicisqas kankichej llajtapipis campopipis.

¹⁷ Maldicisqas kankichej mana jak'uyoj, mana t'antayoj kaspapis.

¹⁸ Maldicisqasllataj kankichej pisi wawasniyoj kaspa, pisi cosechasniyoj, pisi waka uñasniyoj, pisi oveja uñasniyoj, pisi uywasniyoj ima kaspa.

¹⁹ Jinallataj maldicisqas kankichej tukuy ruwasqasniykichejpi.

^20-21 Señor maldicionta apachimusonqachej, iskayrayayta, imaymana sajratapis tukuy ima ruwasqaykichejpi. Ajinamanta pisi tiempollapi qankuna chay llakiykunaswan tukuchisqas kankichej. Sichus Señorta millay ruwasqasniykichejwan saqerparinkichej chayqa, Señorqa apachimusonqachej onqoykunata, maypichus tiyakoj rerqankichej, chay jallp'amanta chinkachisqas kanaykichejkama.

²² Chantaqa apachimullasonqachejtaj wañuchej ch'ojo onqoykunata, q'oñi onqoykunata, punkiy onqoykunata, mana muchuy atina k'arajta, ch'aki watasta, imaymana onqoykunatataj trigo chajrasniykichejman. Chay onqoykunaqa qhatiykachasonqachej wañuchisunaykichejkama.

²³ Janaj pachaqa mana parata qosonqachejchu, kay pachapi jallp'aykichejtaj sinch'i, fierro jina kanqa.

²⁴ Señorqa pataykichejman parachimusonqachej ñut'u jallp'ata, t'iyuta ima, qankuna chinkachisqas kanaykichejkama.

²⁵ Chanta Señorqa qankunata enemigosniykichejwan atipachisonqachej. Qankuna uj ñannejllata enemigosniykichejwan maqanakoj rinkichej, waj ñannejtataj ch'eqerasqas kayman jaqayman ayqenkichej. Kay pachamanta tukuy nacionestaj t'ukuspa manchachikuywan qhawasonqachej.

²⁶ Tukuy phawaj p'isqos, tukuy kay pachapi kaj k'ita animalespis ayasniykichejta mikhonqanku, ni pipis paykunataqa manchachenqachu.

²⁷ Señorqa egipciosta jina llijti onqoywan llakichisonqachej, ch'upuwan, sarnawan, qhasqa onqoywan ima, nitaj imawampis jampikuyta atinkichejchu chaykunamanta.

²⁸ Señorqa locoyachisonqachej, ciegoyachisonqachej, yuyayniykichejtapis chinkachenqa.

²⁹ Qankunaqa ciego jina khuskan p'unchayta thamaykachaspa purinkichej tutayajpi jina. Ni ima ruwasqaykichejpi allinchu risonqachej. Qankunaqa tukuy imapi sarusqas kankichej, suwasqastaj, nitaj pipis yanapasonqachejchu.

³⁰ Sapa ujniykichejpa casaranampaj parlasqan chay warmeqa, ujwantaj riponqa. Sapa ujniykichej wasita ruwakunkichej, nitaj chaypi tiyakunkichejchu. Uvas sach'asta churankichej, nitaj poqoyninta mikhunkichejchu.

³¹ Ñaupaqeykichejpi wakasniykichej qhawashajtiykichej ñak'asqas kanqanku, nitaj aychankuta mikhunkichejchu. Burrosniykichejta ñaupaqeykichejmanta qhawashajtiykichej ujkunataj apanqanku, nitaj kutichimpusonqachejchu. Ovejasniykichejta enemigosniykichej jap'ikaponqanku, nitaj pipis qhechuysisoj kanqachu.

³² Qankunaj ñaupaqeykichejmanta wawasniykichej karu llajtayojkunaman qosqas kanqanku. Qankunaqa onqonkichej wawasniykichejta rikuyta munaspa, nitaj ni imata ruwayta atinkichejchu.

³³ Jallp'asniykichejpi llank'aspa poqochikusqaykichejta mana rejsisqaykichej runas mikhonqanku. Sapa kuti sarusqas, k'umuykuchisqas kankichej.

³⁴ Chay imasta rikuspataj locoyankichej.

³⁵ Señorqa millay llejti onqoyta qosonqachej, moqosniykichejpi, chakisniykichejpipis chay onqoyqa chaki t'ajlluykichejmantapacha umaykichej puntakama jap'isonqachej, manataj thañiyta atinkichejchu.

³⁶ Señorqa qankunata, ajllakusqaykichej reyniykichejtawan waj nacionesman apachisonqachej, chay naciontaqa ni qankuna, nitaj tatasniykichejpis rejserqankichejchu. Chaypitaj, k'aspimanta, rumimanta ima ruwasqa waj dioskunata yupaychamunkichej.

³⁷ Chantaqa maymanchá Señorqa apachisonqachej chay llajtaspi, millaypaj qhawasqas kankichej, imaymanatataj kajta mana kajta parlakusonqachej, asipayasonqachejtaj.

³⁸ Jallp'asniykichejpi ashkhasta tarpunkichej, pisistataj cosechasta oqharinkichej, imaraykuchus langostaslla mikhukaponqanku.

³⁹ Uvas sach'asta churankichej, sumajtataj qhawankichej, manataj vinonta ujyankichejchu, ni poqoynintapis pallankichejchu, imaraykuchus khuruslla tukuyninta tukukaponqanku.

⁴⁰ Olivo sach'asta tukuy jallp'aykichejman tarpunkichej, aceitenwantaj mana jawikunkichejchu, imaraykuchus aceitunasqa urmaraponqa.

⁴¹ Qhari wawasniyoj, warmi wawasniyoj ima kankichej, manataj qankunawanchu paykunaqa kanqanku, imaraykuchus waj nacionesman apachisqas kanqanku.

⁴² Tukuy sach'asniykichejta, jallp'asniykichejpa poqoynintapis onqoy chinkachenqa.

⁴³ Llajtasniykichejpi tiyanku karu llajtayojkuna, astawan astawan atiyniyojman tukonqanku, qankunataj astawan astawan mana atiyniyojman tukunkichej.

⁴⁴ Paykuna manusonqachej, qankunataj mana imatapis manuyta atinkichejchu. Paykunaqa patapi kanqanku, qankunataj urapipuni kankichej.

⁴⁵ Kay tukuy maldiciones qankunaman jamusonqachej, qhatiykachasonqachejtaj taripaspa tukuchinasuykichejkama, Señor Diosniykichejpa nisqasninta mana uyarisqaykichejrayku, nitaj kamachisqasninta, leyesnintapis junt'asqaykichejrayku Pay kamachisorqachej chayta.

⁴⁶ Kaykuna uj t'ukuna señal qankunapaj kanqa, jinallataj mirayniykichejpajpis wiñaypaj.

⁴⁷ Señor Diosniykichejta mana kusiywanchu, nitaj tukuy sonqochu, yupaychasqaykichejrayku chay chhika imasta qoshasojtiykichej.

⁴⁸ Señorpa kachamusqan enemigosniykichejpa kamachisqasninta ruwankichej. Chantapis yarqhayniyoj, ch'akiyniyoj, pisi p'achayoj ima kankichej, tukuy imataj pisisonqachej. Señor sinch'ita llakichisonqachej chinkanaykichejkama.

⁴⁹ Qankunaj contraykichejta karumanta mundoj cantosninmantapacha Señorqa waj llajtayojkuna runasta kachamusonqachej. Chay runaspa parlayninkutataj mana entiendeyta atinkichejchu, paykunaqa anka jina usqhayllata chayamusonqachej.

⁵⁰ Chay sajra runasqa machu runasta, wawastapis mana khuyakonqankuchu.

⁵¹ Paykunaqa uywasniykichejpa umasninta mikhonqanku, jinallataj chajrasniykichejpa poqoynintapis, mana imayoj kanaykichejkama. Jinamanta paykunaqa mana saqepusonqachejchu trigota, vinota, aceiteta, wakasniykichejpa uñasninta, nitaj ovejasniykichejpa uñasnintapis. Qankunataj yarqhaywan wañunkichej.

⁵² Llajtasniykichejta muyuykonqanku qankunawan maqanakuspa, aswan sumaj alto perqasta urmachinankukama mana jayk'ajpis urmajchu chaykunata. Jallp'asniykichejpi kaj tukuy llajtasniykichejman yaykonqanku, nacionesta muyuykuspa tukuy llajtasta urmachenqanku Señor Diosniykichej qosorqachej chaykunaman.

⁵³ Enemigosniykichejqa chay jinata llajtaykichejman yaykuyta munashajtinku, qankunaqa sinch'i yarqhayniykichejpi mana imata mikhuyta atispa, kikin wawasniykichejta mikhunkichej, Señor Diosniykichej qosorqachej chaykunata.

⁵⁴ Qankuna ukhupi aswan k'acha khuyakoj sonqoyoj runapis, millay asjra ñawiwan qhawanqa wauqenta, munasqa warminta, chay kausashankuraj chay wawasninta ima.

⁵⁵ Ajinata qhawanqa mana paykunaman qoyta munaspa, wañusqa wawasnimpa aychanmanta, pay mikhushanqa chaymanta, sinch'i llakiypi mana ni ima puchupusqanrayku, enemigosniykichej llajtasniykichejman yaykuyta munashajtinku.

⁵⁶ Qankuna ukhupi aswan k'acha sonqo khuyakoj warmipis, mayqenchus ni jayk'aj chakisninta pampaman churanayanqachu ancha wawachasqa kasqanrayku. Chay warmi millay sajra ñawiwan qhawanqa munasqa qosanta, wawasninta ima.

⁵⁷ Ajinaqa pakayllamanta tukuyninta mikhukaponqanku ukhunmanta llojsimoj placentanta, nacej wawasnintapis sinch'i llakiypi mana ni ima kapusqanrayku, enemigosniykichej llajtasniykichejman yaykuyta munashajtinku.

^58-59 Sichus kay libropi sumaj kamachiykuna qelqasqa kashan chaykunata mana junt'ankichejchu, nitaj Señor Diosniykichejpa, manchachikunapaj jina sumaj k'acha sutintapis yupaychankichejchu chayqa, Señorqa apachimusonqachej qankunaman, mirayniykichejmampis unaypaj manchay nanaykunata, millay onqoykunatapis mana thañiy atejta.

⁶⁰ Qankunamampis apachimusonqachej Egiptopi tukuy sajra nanaykunata, qankuna manchachikorqankichej chaykunata. Chay onqoykuna unaypaj k'askaykukusonqachej.

⁶¹ Chantapis apachimullasonqachejtaj waj onqoykunata, nanaykunatawan, kay libropi mana qelqasqa kajkunamanta qankuna tukukunaykichejkama.

⁶² Qankunaqa, israelitas, mana yupay atina estrellas jina kasqaykichejmantaqa pisiman tukunkichej Señor Diosniykichejta mana kasusqaykichejrayku.

⁶³ Imaynatachus ñaupajta Señor kusikorqa yanapasuspa, mirachisuspataj, ajinallatataj kunanqa tukuchisuspa chinkachisuspa ima kusikonqa. Ujllata orqhosqas kankichej chay jallp'aman tiyakoj yaykunkichej chaymanta.

⁶⁴ Señorqa tukuynej nacionesman ch'eqerachisonqachej, kay mundoj cantosninkama; chaypitaj waj dioskunata yupaychankichej, k'aspimanta, rumismanta ima ruwasqasta. Chaykunata qankunaqa, ñaupa tatasniykichejpis ni jayk'aj rejserqankichejchu.

⁶⁵ Chay nacionespi mana sonqo tiyasqa kayta atinkichejchu, nitaj uj cheqallapi kakuytapis. Señorqa sustullichisonqachej, tukuchisonqachejtaj waqay ñawisniyojman, llakisqa sonqosniyojman ima.

⁶⁶ Wañuy patapi jinalla kausankichej tutapis p'unchaypis manchachikuspa. Mayk'ajpis atillankichej wañuyta.

⁶⁷ Sut'iyayta ninkichej: Ch'isiyallanmanña, nispa. Ch'isintaj ninkichej: Sut'iyallanmanña, nispa. Chay jinatapuni sonqoykichejpi manchachikusqaykichejrayku, chaykunatataj rikusqaykichejrayku ima.

⁶⁸ Señorqa Egiptoman barcospi kutirichimusonqachej nishasojtiykichejpis mana ni jayk'aj chay jallp'aman kutirinkichejchu, nispa. Qankuna kikiykichej enemigosniykichejman vendekuyta munankichej wata runas kanaykichejpaj. Chaypitaj ni pipis rantiyta munasonqachejchu.