Deuteronomio 27 - Qheshwa Biblia DC

Ebal orqopi yuyarikuna rumis

¹ Chaymantaqa Moiseswan tukuy kurajkunawan israelitasta kay jinata kamacherqanku: Kasuychej tukuy kamachiykunata, kunan qoshaykichej chaykunata.

² Maypachachus Jordán mayuta chimpankichej, chayankichejtaj Señor Diosniykichej qosonqachej chay jallp'aman, chaypacha jatuchaj rumista oqharinkichej, calwantaj lluch'aykunkichej.

³ Chay rumispitaj kay tukuy kamachisqasniyta qelqankichej chay jallp'aman chayaytawankama, lechewan misk'iwan yaku jina corrishan chayman. Chay jallp'ata Señor Diosniykichej qosonqachej ñaupa tatasniykichejman nisqanman jina.

⁴ Ajina Jordán mayuta chimpaytawankama kunan kamachisqasuykichejman jina rumista oqharinkichej Ebal orqo patapi calwantaj lluch'ankichej.

⁵ Chaypitaj Señor Diosniykichejpaj uj rumi altarta ruwankichej mana fierromanta ch'eqospalla.

⁶ Ajinamanta altartaqa mana ch'eqosqa rumismanta Señor Diosniykichejpaj ruwankichej. Chay patapitaj ruphachina rikuchikusta Señor Diosniykichejman jaywankichej.

⁷ Chanta jaywallankichejtaj allinyakuy rikuchikusta. Chaypitaj Señor Diosniykichejpa ñaupaqempi mikhunkichej, kusikunkichejtaj.

⁸ Kunan qankunaman kamachisqastaqa chay rumispi sumaj sut'ita qelqankichej, nispa nerqanku.

⁹ Chaymanta Moisesqa sacerdote levitaswan khuska, israelitasman kay jinata nerqa: Ch'inyakuychej, israelitas, uyariychejtaj kayta: Kunan qankunaqa Señor Diosniykichejpa ayllunman tukunkichej.

¹⁰ Chayrayku qankunaqa payta uyarinaykichej tiyan, kamachisqasninta, leyesnintawan junt'anaykichej tiyan, kunan kamachishaykichej chaykunata.

Ebal orqopi maldiciones

¹¹ Chay kikin diapacha Moisesqa israelitasman kay jinata kamacherqa:

¹² Jordán mayuta chimpajtiykichejkama israelitasta bendicinankupajqa Gerizim orqoman wicharenqanku, kay ayllus: Simeón ayllu, Leví ayllu, Judá ayllu, Isacar ayllu, José ayllu, Benjamín ayllu ima.

¹³ Israelitasta maldicinankupajtaj Ebal orqoman wicharenqanku kay ayllus: Rubén ayllu, Gad ayllu, Aser ayllu, Zabulón ayllu, Dan ayllu, Neftalí ayllu ima.

¹⁴ Levitasqa sinch'ita parlaspa, tukuy israelitasman kay jinata nenqanku:

¹⁵ Maldicisqa kachun imallamantapis lantita ruwajqa, pakayllamanta yupaychanampaj. Chay runaj makinwan ruwasqanqa Señorpa ñaupaqempi millay, nispa. Chayta uyarispa israelitas nenqanku: Ajina kachun, nispa.

¹⁶ Tatanta, mamanta qhesachajqa maldicisqa kachun. Tukuy israelitastaj nenqanku: Ajina kachun, nispa.

¹⁷ Maldicisqa kachun qayllampi kaj runa masimpa jallp'anman lindenta suchuchejqa. Tukuy israelitastaj nenqanku: Ajina kachun, nispa.

¹⁸ Maldicisqa kachun uj diegota ñanninmanta pantachejqa. Tukuy israelitastaj nenqanku: Ajina kachun, nispa.

¹⁹ Maldicisqa kachun juiciopi runaspaj mana cheqanta ruwajqa, karu llajtayojpaj, chayri warmi sapapaj, chayri wajcha wawaspaj ima. Tukuy israelitastaj nenqanku: Ajina kachun, nispa.

²⁰ Maldicisqa kachun tatampa warminwan puñuykojqa, p'enqaypi tatanta rikhurichisqanrayku. Tukuy israelitastaj nenqanku: Ajina kachun, nispa.

²¹ Maldicisqa kachun ima animalwampis qhenchachakojqa. Tukuy israelitastaj nenqanku: Ajina kachun, nispa.

²² Maldicisqa kachun tatanmanta pananwan, chayri mamanmanta pananwan puñuykojqa. Tukuy israelitastaj nenqanku: Ajina kachun, nispa.

²³ Maldicisqa kachun warmimpa mamanwan puñuykojqa. Tukuy israelitastaj nenqkanku: Ajina kachun, nispa.

²⁴ Maldicisqa kachun runa masinta pakayllamanta maqaspa wañuchejqa. Tukuy israelitastaj nenqanku: Ajina kachun, nispa.

²⁵ Maldicisqa kachun mana juchayoj runata wañuchinampaj qolqeta jap'ejqa. Tukuy israelitastaj nenqanku: Ajina kachun, nispa.

²⁶ Maldicisqa kachun kay tukuy Diospa nisqasninta mana kasojqa, manataj ruwajqa. Tukuy israelitastaj nenqanku: Ajina kachun, nispa.