Deuteronomio 26 - Qheshwa Biblia DC

Ñaupaj poqoykunamanta rikuchikus

^1-2 Mayk'ajchus yaykunkichej Señor Diosniykichej chayaqeykichejpaj jallp'ata qopusonqachej chayman, chaypitaj tiyakapunkichej, chaypacha chay jallp'aj ñaupaj poqoyninta sapa cosechamanta rikuchikusta t'aqankichej. Chaytataj apankichej kanastapi may cheqapichus Señor Diosniykichej ajllakun sutin jatunchasqa kanampaj, chayman.

³ Chaypitaj sacerdote mit'ampi kashajman qayllankichej, ninkichejtaj: Noqaqa kunan nini Señor Diosniypa ñaupaqempi chay jallp'aman yaykusqayta Señor Diosninchej ñaupa tatasninchejman nisqanta qonawanchejta, chayman.

⁴ Sacerdotetaj chay apasqaykichej canastata jap'enqa, churanqataj Señor Diosniykichejpa altarninman.

⁵ Qankunataj Señor Diosniykichejpa ñaupaqempi kay jinata ninkichej: Ñaupa tatayqa arameo purej karqa. Egiptoman riporqa, chaypitaj tiyakorqa ayllun pisilla kashajtin. Chantaqa miraynin jatun nacionman tukorqa. Chay aylloqa atiyniyoj, ashkha runasniyojtaj karqa.

⁶ Chaypitaj Egipciosqa mayta ñak'arichiwarqanchej, llakichiwarqanchej, sinch'itataj llakichiwarqanchej.

⁷ Chaypacha mañakorqanchej ñaupa tatasninchejta Señor Diosninmanta yanapanawanchejta. Paytaj uyariwarqanchej mañakusqanchejta, rikorqataj llakiyninchejta, ñak'ariyninchejtapis.

⁸ Jinata Señorqa Egiptomasta orqhomuwarqanchej jatun atiyninta rikuchispa, sinch'i manchachiywan, señaleswn, milagroswan ima.

⁹ Chaymanta kayman pusamuwarqanchej, qowarqanchejtaj lechewan misk'iwan corrishaj jallp'ata. Chayrayku kunan apamuni Señorpa qowasqan jallp'aj ñaupaj poqoyninta, nispa ninkichej.

¹⁰ Jinata niytawanqa chay canastata Señor Diosniykichejpa ñaupaqenman churankichej, chaymantataj qonqorikunkichej.

¹¹ Chaymantaqa Señor Diosniykichej tukuy imasta qosusqaykichejmanta mayta kusikunkichej, tukuy familiaykichejwan, qanwan tiyakoj levitaswan, jinallataj llajtaykichejpi tiyakoj karu llajtayojkunawan ima.

Sapa chunkamanta ujta Señorman qonamanta

¹² Kinsa wata kajpi, chay chunkamanta ujninta qona watapi tukuy poqochisqaykichejmanta sapa chunkamanta ujninta t'aqankichej. Chay t'aqasqaykichejtaqa qonkichej levitasman, llajtaykichejpi tiyakoj karu llajtayojkunaman, wajcha wawasman, warmi sapasman ima, paykuna llajtaykichejpi sajsakunankukama mikhunankupaj.

¹³ Chaymantataj Señor Diosniykichejpa ñaupaqempi ninkichej: Imatachus Señor Diosniykipaj t'aqasqaykuta wasiykumanta orqhomuspa qoykuña, levitasman, karu llajtayojkuna kaypi tiyakojkunaman, wajcha wawasman, warmi sapasman ima, tukuyta niwasqaykuman jina kamachiwasqasniykuta kasukuspa; mana qonqaspataj, tukuyninta junt'ani.

¹⁴ Chay t'aqasqaykumantaqa mana mikhuykuchu wañusqayoj llakisqa kashajtiykupis, nitaj mana llimphupaj qhawasqa kashajtiykupis, nitaj wañusqasmampis apaykuchu. Señor Diosniyku imatachá niwasqaykuta kasuyku tukuy imata ruwaspa kamachiwasqasniykuman jina.

¹⁵ Kunanqa qhaway janaj pachamantapacha, tiyakunki chaymantapacha, bendiciytaj kay Israel aylluykita, kay qowasqayku jallp'aykuta; lechewan, misk'iwan yaku jina corrishan chayta, ñaupa tatasniykuman nisqaykiman jina.

Israelqa Señorpa ayllun

¹⁶ Señor Diosniykichej kunan kamachisunkichej, kay leyesta, kay kamachisqasnintataj junt'anaykichejta. Chaykunataqa tukuy sonqoykichejwan, tukuy almaykichejwan ima kasunkichej.

¹⁷ Kunanqa niykichejña Señorqa Diosniykichej kasqanta, ninkichejtaj ñankunasninta purinaykichejta, ninkichejtaj kasunaykichejtapuni leyesninta, kamachisqasninta ima, nisqasninta junt'aspa.

¹⁸ Señorpis kunanqa nillantaj, qankunalla paypa ayllun kasqaykichejta nisusqaykichejman jina, nisqasninta junt'anaykichejta.

¹⁹ Tukuy ruwasqan nacionesmanta qankunata aswan pataman churasonqachej, Pay yupaychasqa, rejsisqa, jatunchasqataj kanampaj. Ajinaqa qankunalla Señor Diosniykichejpa ajllasqa ayllun kankichej nisqanman jina.