Deuteronomio 24 - Qheshwa Biblia DC

Casarajkunaj t'aqakunanmanta

¹ Sichus uj qhari uj warmiwan casarakun, chay qhepamantataj warminta qhesachan, mana allinta kausasqankurayku chayqa, uj t'aqakuy papelta warminman jaywachun, wasinmantataj kachapuchun.

² Jinamanta chay warmeqa ripuytawan waj qhariwanñataj casarakuyta atinman.

^3-4 Sichus qhepan kaj qhariñataj payta chejninman chayqa, uj t'aqakuy papelta payman jaywanqa, jinaspataj wasinmanta kachaponqa. Chayri sichus chay qhepa kaj qhari wañupun chayqa, chaypacha ñaupaj kaj qosanqa manaña atenqachu paywan ujtawan casarakuyta, chay warmi mana llimphuman tukusqanrayku, imaraykuchus chay jina ruwayqa millay Señorpa ñaupaqempi. Ama ch'ichichankichejchu Señor Diosniykichej qosunkichej chay jallp'ata.

Tukuy imasmanta kamachiykunas

⁵ Uj qhari chaypachallaraj casarakun chayqa, amaraj maqanakoj renqachu, nitaj imallapipis llank'achenqankuchu. Mana ni ima ruwanayoj kanqa uj wata junt'ata, wasimpi warminwan kusisqas kanankupaj.

⁶ Ama pejpatapis molino ruminta prendata jina mañankichejchu, ni patan kajta nitaj uran kajta. Jinata ruwankichej chayqa, chay runaj kausayninta prendata jap'ishawajchej jina kanman.

⁷ Sichus mayqellampis israelita masinta suwaspa apashan kamachimpaj, chayri vendemunampaj, chayta ruwashaspa jap'ichikun chayqa, chay runa wañuchisqa kanqa. Ajinamanta chay sajrata qankuna ukhumanta chinkachinkichej.

⁸ Lepra onqoymantaqa ruwaychej imaynatachus sacerdote levitas kamachisusqaykichejman jina. Chaytaqa kikintapuni ruwaychej, imaynatachus noqa paykunaman kamachisqayman jina.

⁹ Imaynatachus Señor Diosniykichej Egiptomanta llojsimuspa ñampi Mariata leprawan onqoykuchisqanta qankunaqa allinta yuyarikuychej.

¹⁰ Sichus imallatapis runa masiykichejman manurinkichej chayqa, ama wasinman yaykuspa imantapis prendata apamunkichejchu.

¹¹ Qankunaqa jawallapi suyankichej imatapis orqhomuspa prendata qosunaykichejpaj.

¹² Sichus chay runa wajchalla chayqa, ama tutantinta chay prendata jap'ikunkichejchu.

¹³ Inti chinkaykuyta prendanta qopunkichejpacha, p'achanwan qhataykukuspa allinta puñukunampaj. Paytaj bendicisonqachej. Chay ruwasqaykichejtaj Señor Diosniykichejpa ñaupaqempi allimpaj qhawasqa kanqa.

¹⁴ Llank'apusojniykichej wajcha mana kapuyniyoj runataqa ama llakichinkichejchu. Qankunaj llajta masiykichejpis kachun, chayri llajtaykichejpi tiyakoj karu llajtayojpis kachun.

¹⁵ Chay kikin diapacha, manaraj inti chinkaykushajtin llank'achisqaykichejmanta pagonta qopuychej. Payqa wajchamin, chay qolqeta suyashan kausakunampaj. Chayta ruwankichej chayqa, mana Señor qankunaj contraykichejta qheparenqachu, qankunarí mana juchachasqaschu kankichej.

¹⁶ Mana ni pipis wañonqachu wawampa juchanrayku, mana ni pipis wañonqachu tatampa juchanrayku. Manachayqa sapa uj wañonqa juchasninrayku.

¹⁷ Ama karu llajtayojpajqa imachus mana cheqan kajtaqa ruwapunkichejchu, ni wajcha wawaspajpis, nitaj warmi sapasmantapis p'achasninkuta prendapaj jap'ikapunkichejchu.

¹⁸ Qankunaqa ama qonqaychejchu Egiptopi kamachis kasqaykichejta, Señor Diosniykichej chaymanta orqhomususqaykichejta. Chayrayku noqaqa kamachiykichej kay tukuy imasta junt'anaykichejta.

¹⁹ Sichus ruthuytawan apashaspa uj marq'ata qonqaspa saqerparisqankichej chayqa, amaña chayta oqharej kutinkichejchu. Saqeychej mayqen karu llajtayojpis oqharikunanta, chayri uj wajcha runa, chayri uj warmi sapa, Señor Diosniykichej bendicisunaykichejpaj tukuy ruwasqasniykichejpi.

²⁰ Aceitunasta pallaspañaqa amaña ujtawan pallankichejchu, saqeychej karu llajtayojkuna, wajcha wawas, warmi sapas ima chajmakunankuta.

²¹ Uvasta pallaspañaqa amaña ujtawan pallankichejchu, saqenkichej karu llajtayojkuna, wajcha wawas, warmi sapas ima chajmakunankuta.

²² Qankunaqa ama qonqaychejchu Egipto jallp'api kamachis kasqaykichejta. Chayrayku kay tukuy imasta kamachiykichej junt'anaykichejta.