Deuteronomio 23 - Qheshwa Biblia DC

Israelitasmanta t'aqasqas

¹ Señorpa tantakuyninmanqa mana yaykuyta atenqankuchu kapasqas kajkuna, chayri phichilusnin khuchusqas kajkuna.

² Señorpa tantakuyninmanqa mana yaykuyta atenqankuchu mana casamientopi nacesqa wawas, ni chunka mitakamapis.

³ Chay Señorpa tantakuyninmanqa mana jayk'ajpis yaykonqankuchu amonitas, moabitaspis, ni chunka mitamanta qhepamampis.

⁴ Paykunaqa mana yakullatapis qorisorqachejchu, nitaj t'antallatapis, maypachachus qankuna paykunaj jallp'ankuta Egiptomanta llojsimuspa pasarqankichej chaypacha. Chantapis paykunaqa Mesopotamiapi Petormanta Beorpa wawan Balaamman pagarqanku, qankunata maldicichiyta munaspa.

⁵ Señor Diosniykichejtaj Balaamta mana uyarerqachu, manachayqa chay maldicionninta bendicionman tukucherqa qankunapaj, Pay munakususqaykichejrayku.

⁶ Chaynejta ama paykunata yanapaychejchu, nitaj allin kayninkuta ni jayk'ajpis mask'aychejchu.

⁷ Edomitastaqa ama chejnikunkichejchu, imaraykuchus paykunaqa qankunaj ayllullaykichejtaj. Nitaj egipciostapís chejninkichejchu, imaraykuchus paykunaj llajtankupi karu llajtayoj runas jina tiyakorqankichej.

⁸ Chaykunamantaqa kinsa mitamanta qhepaman kajkuna Señorpa tantakuyninman yaykuyta atenqanku.

Mana ch'ichichakunamanta

⁹ Mayk'ajchus enemigosniykichejwan maqanakoj rinkichej chayqa, amapuni ima sajratapis ruwankichejchu.

¹⁰ Sichus tuta puñuypi qharej mujun llojsinman, jaramanta jawaman llojsichun. Ama yaykumuchunchu.

¹¹ Ch'isiyaykuytataj yakuwan mayllakuchun, inti chinkaykuytataj jaraman yaykupuchun.

¹² Jisp'anaykichejpajqa jaramanta jawapi uj cheqata ruwakunkichej.

¹³ Chanta chumpiykichejpi warkhusqata uj k'aspita apaykachankichejpuni, jawaman llojsispataj chay k'aspiwan t'oqota ruwankichej. Chaymantaj jatun jisp'ayniykichejta jallp'awan p'ampankichej.

¹⁴ Señor Diosniykichejqa qankunaj chaupiykichejpi kashan, chay jaraykichejpi ima kajtimpis yanapanasuykichejpaj, enemigosniykichejtapis atipachinasuykichejpaj. Chay jaraykichejqa llimphupuni kanan tiyan, Dios ama chaynejpi ima ch'ichitapis rikunampaj. Mana jina kanqa chayqa Dios qankunamanta karunchakonqa.

Pakakunamanta

¹⁵ Pi kamachipis patronninmanta qankunaman ayqekamusojtiykichej, ama payta ñaupa patronninman kutichinkichejchu.

¹⁶ Chay kamachitaqa saqeychej qankunawan kakojta may llajtapichá tiyakuyta munan chaypi. Amataj pipis payta llakichichunchu.

Waj kamachiykunas

¹⁷ Israel ukhupi mana kanqachu qhenchachakoj warmis, chayri qharispis. Imaynatachus mana cheqan Diospi creejkunaqa templosninkupi ruwanku ajinata.

¹⁸ Ama saqenkichejchu runas apanankuta Señor Diosniykichejpa wasinman qhenchachakuspa qharis, warmispis ganasqanku qolqeta, ni rikuchikusninkutapis. Chay jina ruwaykunataqa Señor mana rikuyllatapis munanchu.

¹⁹ Llajta masiykichejman qolqeta manusqaykichejmanta ama qolqe reditota mañankichejchu, nitaj mikhunamantapis, chayri waj imasta mañarisqaykichejmantapis.

²⁰ Karu llajtayojman qolqeta mañankichej manusqaykichejmanta qolqe reditonta, llajta masiykichejmantari amapuni mañankichejchu. Ajinamanta imatapis ruwajtiykichej Señor Diosniykichej bendicisonqachej, maypichus tiyakunkichej chaypi.

²¹ Imatapis Señor Diosniykichejman qosaj ninkichej chaytaqa, usqhayllata qopunaykichejpuni tiyan. Chaymantaqa allinta yachakuychej, Señor Diosniykichejqa cuentaqa mañasonqachejpuni chay qosaj nisqaykichejmanta. Mana jinata ruwankichej chayqa, juchayoj rikhurinkichej.

²² Sichus imatapis mana qosaj ninkichejchu chayqa, mana juchayojchu kankichej.

²³ Sichus imatapis qankunallamanta qosaj nerqankichej Señor Diosniykichejman chayqa, chay nisqaykichejta junt'anaykichejpuni tiyan.

²⁴ Runa masiykichejpa uvas chajranman yaykunkichej chayqa, mashkhatachus atisqaykichejta uvasta mikhuyta atinkichej, jinapis canastaykichejmanqa ama churankichejchu.

²⁵ Runa masiykichejpa trigo chajranman yaykunkichej chayqa, trigo umasta makillaykichejwan p'itinkichej. Ama josewanqa ruthunkichejchu.